Y Salmo Sija 69:7-35

⁷Sa pot jago jupadese y linalatde: minamajlao tumampe y matajo.

⁸Guinin manataotao juyong yo nii mañelujo; yan taotao juyongyo gui famaguon nanajo.

⁹Sa y inigo y guimamo cumanoyo: ya y linalatdeñija y ayo sija nii lumalatde jao manbasnag guiya guajo.

¹⁰Anae tumangesyo ya junamajalang y antijo pot ti chumocho, este y para malalatdeco.

¹¹Anae jufatinas y luto para magagujo, jumuyongyo un cuentos nu sija.

¹²Ya ayo y manmatatachong gui petta, manadingan contra guajo: ya guajo y cantasionñija anae mangacanta y manbulacho.

¹³Lao guajoja, y tinaetaejo guiya jago, O Jeova, gui tiempon y finaboresemo: O Yuus, pot y minegae y minaasemo opeyo gui minagajet y satbasionmo.

¹⁴Nalibreyo gui liño ya chajo mamagño: polo ya ulibreyo güije sija nii chumatliiyo, yan gui y tinadong y janom sija.

¹⁵Chamo pumopolo y minilalag na janom na ufalofan gui jilojo, ni unpolo y tinadong na upañotyo; chamo pumopolo y joyo na ujuchom y pachotña gui jilojo.

¹⁶Opeyo, O Jeova; sa y minaasemo gosmauleg: taemanoja y minegae y minaasemo, birajao guiya guajo.

¹⁷Chamo na aatog y matamo gui tentagomo; sa gaegue yo gui chinatsaga: opeyo guse.

¹⁸Najijot jao gui antijo ya unnalibre: rescatayo sa juguaja y enimigujo sija.

¹⁹Jago tumungo y malalatdeco, yan y minamajlaojo yan y madesonraco: y contrariojo mangaegue todo gui menamo.

²⁰Y linalatde yumulang y corasonjo: yan bulayo y pinite: ya manaliligaoyo jaye upinite, lao taya ni uno: yan y numamagofyo lao ti jusoda ni uno.

²¹Sija numaeyo locue lalaet para nengcanojo: yan anae majoyo, sija numaeyo binagle para juguimen.

²²Polo ya lamasañija mamalaso gui menanñija: polo ya yaguin gaegue sija gui pas, este para ocodo.

²³Polo ya ujomjom y atadogñija para chañija fanmalilie; yan janayeyengyong nii sinturanñija para todo y tiempo.

²⁴Basija gui jiloñija y binibumo, ya polo y dangculon linalalomo ya ufanjeniguif sija.

²⁵Polo y sagañija ya umayulang: yan taya ni uno siña sumaga gui tiendañija.

²⁶Sa sija pumetsigue ayo sija y sinaolagmo: ya sija sumangan y pinitinja ni y ninafanlamenmo.

²⁷Naye mas taelaye y tinaelayeñija, ya chamo munafanjajalom gui tininasmo.

²⁸Palo ya umafunas sija gui leblon linâlâ: ya munga manmatugue sija yan y manunas.

²⁹Lao guajo pobleyo yan tristeyo: polo y satbasionmo, O Yuus, ya upoloyo guiya jululo.

³⁰Guajo bae jualaba y naan Yuus nu y cantasion, ya junadangculo güe nu y inefresen grasias.

³¹Ya este munaguefmagof si Jeova mas qui y nobiyo, pat y toro nii mangaecángjilon yan papaquis.

³²Y manmanso, jalie este ya ninafanmagof: ya y corasonmiyo ufanlâlâ y unaaliligao si Yuus.

³³Sa si Jeova jajungog y mannesesitao ya ti jachatlie y prenesuña sija.

³⁴Polo y langet yan tano ya umaalaba güe, yan y tase sija yan todo y güinaja nii mangalalamten gui sanjalomña.

³⁵Sa si Yuus ujasatba y Sion yan ujafatinas y siuda sija guiya Juda: para usiña sija mañaga güije yan uguaja para y iyonñija.