Y Salmo Sija 57:1-11

¹GAEASE nu guajo, O Yuus, gaease nu guajo; sa y antijo guinegüe güe guiya jago: magajet, y anineng y papamo ugogüeyo asta qui manmalofan y chinatsaga.

²Bae juagang si Yuus Gueftaquilo; si Yuus ni y jafatinas todo y güinaja para guajo.

³Ufanago guinin y langet ya unalibreyo; anae jalalatde ayo y malago pumañotyo. Sila. Si Yuus utago y minaaseña yan y minagajetña.

⁴Y antijo gaegue gui entalo y león sija: ya umaasonyo gui entalo ayo sija y minañila guafe, junggan, yan y lalajin taotao sija ni y nifenñija y lansa sija, yan flecha sija, ya y jilañija malagtos na espada.

⁵Nadangculojao gui jilo y langet, O Yuus; polo y inenramo todo gui sanjilo tano.

⁶Jagas mamatinas laso, para y pinecatto; y antijo tumecon papa; jagas manmaguadog joyo gui menajo; ya sija mamodong maesaja gui taloloja. Sila.

⁷Y corasonjo, esta meton, O Yuus, y corasonjo esta meton; bae jucanta, magajetja, jucanta alabansa sija.

⁸Fagmata, inenrajo; fagmata, guitala yan atpa; guajoja na maesa magmatayo taftaf.

⁹Bae junaetjao grasias, O Jeova, gui entalo y taotao sija; jucantayejao alabansa sija gui entalo y nasion sija.

¹⁰Sa asta y langet, dangculo y minaasemo, yan asta y mapagajes y minagajetmo.

¹¹Nadangculojao gui jilo y langet, O Yuus; polo y minalagmo todo gui sanjilo y tano.