Y Salmo Sija 49:2-17

²Jamyo todo mandaña, y managpapa, y managquilo, y manrico, yan y mamoble.

³Y pachotto usangan y minalate; ya y jinason y corasonjo y tiningo.

⁴Bae juecungog y parabola; ya jubaba y jemjom sinanganjo gui atpa.

⁵Sajafa na maañaoyo gui jaanen y tinaelaye, anae y tinaelayen y dedegoco jaoriyayayeyo?

⁶Ayo y umangongoco sija ni y güinajañija, yan jatunanmaesaja ni y minegae y riniconñija;

⁷Taya guiya sija siña umapasiye y cheluña, ni unae si Yuus ni y rumescata güe;

⁸(Sa y ninálibre y antinñija, dangculo presiuña, ya para upolu para siempre.)

⁹Para ulâlâ asta y taejinecog, ya ti ulie minitong.

¹⁰Sa jalie na y manmalate na taotao sija manmamataeja, y manaejinaso yan y manbababa, manmalingo, ya japolo y güinajañija para y palo.

¹¹Y jinason y sumanjalomñija, na y guimañija usaga para taejinecog, ya y anae mañasaga na lugat para y todo generasion sija; ya jafanaan y tanoñija, ni y naanñijaja.

¹²Lao y taotao ti sumaga gui onraña, parejoja yan y gâgâ na matae.

¹³Este y jinanaoñiñija, y binabanñiñijaja; ya anae esta manmapos, manmagof y taotao nu y sinanganñija. Sila.

¹⁴Sija ufanquinano gui naftan parejoja yan y manadan quinilo y finatae upinasto sija; ya y manunas mangaeninasiña gui jiloñija gui egaan; ya y boninituñija, para ulachae gui jalom naftan, sa taya sagaña.

¹⁵Lao si Yuus unalibre y antijo gui ninasiñan y naftan; sa uresibeyo. Sila.

¹⁶Chamo maaañao, yanguin guaja taotao urico; yanguin y güinaja, y guimaña mumémegae;

¹⁷Sa yanguin matae, taya uchule; y güinajaña, ti udinalalaggüe.