Y Salmo Sija 48:1-13

¹DANGCULO si Yuus, ya para umagueftuna, gui siuda y Yuusta, gui egso y sinantosña.

²Bonito na sagayan, y minagof todo gui tano, y egso Sion gui sumanlago na banda, siuda y dangculo na ray.

³Si Yuus esta matungo gui jalom y palasyoña, na para y guinegüe.

⁴Sa estagüe y ray sija na mandaña, manmalofan ya mandadañaja.

⁵Manmalie, ya luego ninafanmanman; ninafañatsaga, ya maninalulula manjanao.

⁶Y mayengyong gumote sija güije; yan y pinite taegüije y palaoan yan para ufañago.

⁷Jago yumamag y batcon Tarsis, ni y manglo sancatan.

⁸Jaftaemanoja y jiningogmame, taegüijeja liniimame gui siuda y Señot y inetnon sendalo; gui siuda y Yuusmame: si Yuus plumanta para taejinecog. Sila.

⁹Injaso y güinaeyamo, O Yuus, gui talo gui templomo.

¹⁰Jaftaemanoja y naanmo, O Yuus, taegüijeja y tininamo asta y uttimon y tano: y agapa na canaemo, bula ni y tininas.

¹¹Namagof y egso Sion, yan sija jagan Juda ufanmagof; pot y jinisgamo sija.

¹²Famocat gui Sion, ya unjanagüe y oriyaña; ya untufong y tore güije.

¹³Matca y colatña ni y munaseguguro, ya injaso y palasyoña; para usiña jamyo insangane y generasion ni y mamamaela.