Y Salmo Sija 44:2-23

²Nu y canaemoja unyute y nasion, ya unpolo sija; unnafantriste y taotao sija, ya unnafanjanao.

³Sa ti inchile y tano pot espadanñija para iyonñija, ni ti unnafanlibre pot y canaeñija; lao y agapa na canaemo yan y canaemo, yan y minalag y matamo, sa unguaeya sija.

⁴Jago y Rayjo, O Yuus: fanago linibre para si Jacob.

⁵Pot jago na inyite papa y enemigonmame: pot y naanmo, na ingacha y mangajulo contra jame.

⁶Sa ti juangocoyo ni y flechaco, ni y espadajo ti ulibreyo.

⁷Sa jago umadadajejam gui enemigonmame; ya y chumatliijam unnafanmamajlao.

⁸Ya gui as Yuus tatunanmaesa jit todot dia; ya para taejinecog, intina y naanmo.

⁹Lao pago unyute jam, ya unnafanmamajlaojam; ya ti jumanaojao yan y inetnon sendalonmame.

¹⁰Unbirajam tate guinin y enemigonmame; ya ayo sija y chumatliijam, manmañaque para sija namaesa.

¹¹Unpolojam taegüije y quinilo ni y para umacano; ya janafanmachalaponjam gui entalo y nasion.

¹²Unbende y taotaomo pot taya; ya ti mumegae y güinajamo pot y balenñija.

¹³Unnafanmamajlaojam ni y tiguangmame; pot y manmanmofefea, yan manmanbotlelea ni y mangaegue gui oriyanmame.

¹⁴Unnafanmafa y sinanganjam gui entalo y nasion, pot y yinengyong y ilonñija gui entalo y taotao sija.

¹⁵Y desenrajo gaegueja gui menajo todot dia; ya y minamajlao y matajo jatampe yo.

¹⁶Sa y inagang ayo y numanamamajlao, yan y chumatfino contra si Yuus; pot y enemigo yan y taotao ni y maneemog.

¹⁷Todo este manmato guiya jame; lao ti manmalelefajam nu jago, ni ti manmatinasjam mandague ni y tratumo.

¹⁸Y corasonmame ti inbira tate; ni y pinecatmame ti sumuja gui chalanmo.

¹⁹Masqueseaja unyamagjam gui sagan y jacal sija, ya untampejam ni y aninen y finatae.

²⁰Yanguin manmalefajam ni y naan Yuusmame, ya inestira y canaemame pot y otro Yuus;

²¹Ada ti ualigaojam si Yuus? Sa jatungoja y secreton y corason.

²²Junggan, pot y jago manmapunojam todo y inanaco y jaane; manmatufongjam taegüije y quinilo ni y para umapuno.

²³Fagmata, jafajao na mamaego, Señot? Cajulo, chamojam yumuyute para siempre.