Y Salmo Sija 36:1-12

¹YINEMBESTE y taelaye, ilegña gui corasonjo, taya minaañao as Yuus gui menan atadogña.

²Sa pot enao jafaande maesa güe gui atadogña, ya ti usoda y taelayeña ya umachatlie gue.

³Y finijo gui pachotña manaelaye yan finababa: basta güe ni utungo yan ufatinas y mauleg.

⁴Y tinaelaye jajajaso gui jilo camaña: japolo maesa güe gui un chalan ni y ti mauleg: ti jachatlie y inacacha.

⁵O Jeova, asta y langet y güinaeyamo; y minagajetmo inataca asta y mapagajes.

⁶Y tininasmo taegüije y egso Yuus; y juisiomo sija dangculoña tinadong: y taotao yan y gâgâ, jago umadadaje, O Jeova.

⁷Gosdangculo y balotña y güinaeyamo, O Yuus! ya y famaguon taotao ufanmagogue gui papa y anineng y papamo.

⁸Ufansennajong ni y minegae y guimamo: ya jago unnafanguimen ni y sadog y minagofmo.

⁹Sa iyajago nae gaegue y bebô y linâlâ: ya y ininamo nae infanmalie inina.

¹⁰Sisigueja y güinaeyamo para y tumungo jao; ya y tininasmo para manunas na corason.

¹¹Chamo pumopolo ya ufato contra guajo y patas y sobetbio: ni y canae y manaelaye unasuja yo.

¹²Ayo nae mamodong y manmamatitinas ni y taelaye: sija manmachoneg ya ti siña ufangajulo.