Y Salmo Sija 22:1-24

¹YUUSSO, Yuusso, sa jafa na undingo yo? sa jafa chago jao gui inayudajo yan y finijo gui inigongjo.

²O Yuusso, juagang gui jaane ya ti unope: ya gui puenge lao jusoda y descanso.

³Ya y santos jao, O jago ni y sumasaga gui alabansan Israel.

⁴Yya jago nae manangoco y tatanmame: manangoco ya unnafanlibre sija.

⁵Maaagang jao ya ninafanlibre: manmanangoco nu jago ya ti manmamajlao.

⁶Ya guajo y gâgâ ilo ya ti taotao: namamajlao gui lalaje ya madespresia gui taotao.

⁷Todo y lumiiyo manatchatgue pot guajo mamuyuyueyo ya jayeyengyong y ilonñija.

⁸Angoco jao as Jeova; polo ya ulibre gue: polo ya ulibre güe sa güinaeya güe.

⁹Sa jago y chumule yo gui tiyan: ya unnafanangoco anae gaegue yo gui jaof nanajo.

¹⁰Gui jilomo mayute yo guinin y tiyan: desde y tiyan nanajo jago Yuusso.

¹¹Chamo chachago guiya guajo; sa y chinatsagaco esta jijot, sa taya jaye yo uayuda.

¹²Megae na toro jaoriyayeyo: manmetgot na toron Básan jumijujuteyo.

¹³Ya jabababa y pachotñija guiya guajo taegüije y león ni tegcho yan cumate.

¹⁴Janamachuda yo taegüije y janom, todo y telangjo manápula: y corasonjo taegüije y danges; esta madirite gui talo gui sanjalomjo.

¹⁵Anglo y minetgotto taegüije y pedason an mafag: ya y jilajo cheton gui paladatto: ya gui petbos finatae nae unpoloyo.

¹⁶Sa maoriyayayeyo y galago sija: majijujuteyo y inetnon y manaelaye; ya manadochon gui canaejo yan y adengjo.

¹⁷Mojon jusangan todo ni y telangjo: sija jaatanyo ya jaconsidedera.

¹⁸Maipe gui entaloñija todo y bestidujo: ya y magagujo marifa.

¹⁹Lao jago, O Jeova, chamo chachago: O jago, minetgotto, chadig yan unayudayo.

²⁰Nalibre gui espada y antijo: y beyan corasonjo, guinin y ninasiñan y galago.

²¹Nalibreyo gui pachot y león; magajet, guinin y canggilon y nubiyo ni titogcha, unope yo.

²²Bae jusaasgane y mañelujo y naanmo: ya gui entalo gui inetnon taotao bae jualalabajao.

²³Ya y manmaañao as Jeova, fanmanalaba nu güiya: todo y semiyan Jacob fanmanonra nu güiya: ya fanmaañao nu güiya todo y semiyan Israel.

²⁴Sa ti guinin jadespresia ni jachatlie y pinadesen y pebble; ni unaatog y mataña guiya güiya: ya anae jaagang guiya güiya, jajungog.