Y Salmo Sija 18:14-44

¹⁴Ya jatago y flechaña ya manchinalapon: ya magajet, megae na lamlam ya manyinilang.

¹⁵Ayonae esta malie y tinadong y janom, ya janamababa y simiento y tano sija pot y linalatdemo, O Jeova, pot y güinaefen y jinagong gui güiingmo.

¹⁶Jatago desde sanjilo, jachuleyo; ya jaatoyo guinin y megae na janom.

¹⁷Janalibrego gui manmetgot na enimigujo, yan y chumatliéyo, sa sija mas manmetgot qui guajo.

¹⁸Sija manmato guiya guajo gui un jaanen y chinatsagaco: lao si Jeova, güiya y fanapojo.

¹⁹Ya jachuleyo locue gui anae ancho na lugat: janalibreyo sa ninamagof ni guajo.

²⁰Si Jeova jaapaseyo taemanoja y y tininasso: taemanoja y guinasgas y canaejo unaeyo.

²¹Sa juadaje y chalan Jeova: ya ti taelaye yo na juapattayo gui as Yuusso.

²²Sa todo y jinasoña mangaegue gui menajo: ya ti junajanao guiya guajo y tinagoña.

²³Ya guajo cabales guiya güiya: ya juadaje yo guinin y tinaelayeco.

²⁴Pot este jaapaseyo si Jeova taemanoja y tininasso: taemanoja y guinasgas y canaejo gui menan atadogña.

²⁵Ya y gaemaase unfanue na gaemaasejao: ya y taotao ni y cabales, unfanue na cabales jao.

²⁶Ya y gasgas unfanue na gasgasjao: ya y camten unfanue na camtenjao.

²⁷Sa jago munalibre y mangaepinite na taotao; ya y sobetbio na atadog jago munatunog.

²⁸Sa jago munamalag y candetto: si Jeova, Yuusso, namanana y jemjom guiya guajo.

²⁹Sa pot jago na jufalagüe y inetnon sendalo: ya pot y Yuusso jugope y quelat.

³⁰Ya si Yuus, cabales y chalanña: y fino Jeova esta machague: patang güe para todo y numanangga güe.

³¹Jaye si Yuus yaguin ti si Jeova güe? ya jaye y acho, jaguin ti si Yuusta?

³²Si Yuus jagogode yo ni y minetgot: ya jafatitinas cabales y chalanjo?

³³Jafatitinas y adengjo taegüije y adeng y benado: ya janasagayo gui taquilo na sagajo sija.

³⁴Jafanagüe y canaejo para y guera: ya enaomina y canaejo judobla y atcas bronse.

³⁵Ya unnaeyo locue ni y patang gui satbasionmo: ya y agapa na canaemo mumantietieneyo; ya y minansomo munamegaeyo.

³⁶Unnadangculo y pinecatto gui papajo; ya y adengjo ti usulong.

³⁷Judulalag y enimigujo sija, ya jugâchâ: ya ti jubirago talo asta que jocog.

³⁸Junafanmañetnot, ya ti siña mangajulo: mamodong sija gui papa adengjo.

³⁹Sa guinin ungode yo ni y minetgot para y guera: unnafanecon y enimigujo gui papajo.

⁴⁰Guinin unfatinas ni y enimigujo na unaeyo ni y tataloñija, para juyulang y chumatliiyo.

⁴¹Manaagang, ya taya jaye ufansinatba: manaagange si Jeova ya ti manjiningog.

⁴²Ayonae juguleg sija taegüije y petbos gui menan y manglo; taegüije y fache gui chalan ni y manmachalapon.

⁴³Guinin unnalibre yo gui y inaguaguat y taotao: guinin unadaje yo para jumagas gui nasion sija: y taotao sija ni ti jutungo ujasesetbeyo.

⁴⁴Ya anae jajungog guiya guajo ujaosgueyo: ya y taotao juyong ujaosgueyo ni y dinague.