Y Salmo Sija 147:4-20

⁴Jasangan y numeron y pution sija; jafanaan todo sija ni y naanñija.

⁵Dangculo y Yuusta, yan matatnga gui ninasiña; tiningoña taeuttimo.

⁶Si Jeova jumajatsa y manmanso: ya jachule papa y manaelaye gui jilo oda.

⁷Cantaye si Jeova ni y finatinas grasias; cantaye alabansa sija gui atpa, para y Yuusta.

⁸Ni y jatatampe y langet ni y mapagages, ya jalilisto y ichan para y tano, ya janafandodoco y chaguan gui jilo ogso sija.

⁹Güiya numannae y gâgâ sija nañija, yan y fumaguon y aga sija ni y manaagang.

¹⁰Güiya ti ninamamagof ni y ninasiñan y cabayo: ni ti ninamamagof güe ni y adeng y taotao.

¹¹Si Jeova ninamamagof güe ni y manmaañao nu güiya, ni y umangoco sija gui minaaseña.

¹²Alaba si Jeova, O Jerusalem; alaba si Yuusmo, O Sion.

¹³Sa janafanfitme y rejas y trangcamo: jabendise y famaguonmo gui sumanjalommo.

¹⁴Jafatinas pas gui jalom uttimomo, ya ninabula jao ni y guesmauleg na trigo.

¹⁵Janajanao y tinagoña gui jilo tano: y sinanganña malalago goschadig.

¹⁶Mannae niebe calang pulo: jachalapon y manengjeng na sereno calang apo.

¹⁷Jayute y aesña calang andesmorona sija: jaye siña tumojgue gui menan y manengjengña?

¹⁸Janajanao y sinanganña, ya jadirite: janafanguaefe y mangloña, ya y janom sija manmilalag.

¹⁹Jafanue si Jacob ni y sinanganña, ya y layña sija yan y juisioña sija y Israel.

²⁰Ti jafatinas taegüine gui un nasion: ya y juisioña, sija ti manmatungo sija. Fanmanalaba jamyo as Jeova.