Y Salmo Sija 139:8-22

⁸Yaguin cumajuloyo gui langet gaegueja jao güije; yanguin jujuto y camajo guiya sasalaguan, gaegueja jao locue güije.

⁹Yanguin juchule y papan y egaan, ya jusaga gui uttimon y tase;

¹⁰Asta ayo gaegueja y canaemo na jaosgagaejonyo, ya y agapa na canaemo umantieneyo.

¹¹Yanguin jualog: Magajet na utampeyo y jemjom: asta y puenge uinayo.

¹²Asta y jemjom ti uninatogüe: lao y puenge ufanina taegüije y jaane: y jemjom yan y mananana manparejoja para jago.

¹³Jago tumungo yo, sa jago magas y sumanjalomjo; guinin untampeyo gui jalom tiyan nanajo.

¹⁴Junae jao grasias: sa gosnamaañao yan gosnamanman y mafatinasso: mannamanman y chechomo; ya y antijo jagostungo este.

¹⁵Y tataotaojo ti umatog guiya jago, anae mafatinasyo gui secreto; ya matufog yo ni namanman, gui mas tagpapa na lugat gui tano.

¹⁶Y atadogmo lumie y tataotaojo ya ti cabales: ya y lebblomo nae manmatugue todo y pedason tataotaojo, ya taya ufatta.

¹⁷Jafa muna guaguan y jinasomo guiya guajo, O Yuus! Jafa muna megae sumaña!

¹⁸Yanguin jutufong sija, manmegaeña y numeroña qui y inae: yanguin magmatayo, gaeguejayo trabia guiya jago.

¹⁹Seguro na unpuno y taelaye, O Yuus: enaomina mañuja guiya guajo y manmejga na taotao sija.

²⁰Sa manguentos taelaye contra jago, ya y enimigumo sija machule y naanmo pot taya.

²¹Ada ti juchatlie ayo sija, O Jeova, y chumatlie jao? yan ada ti unatristeyo pot ayo sija y mangajulo contra jago?

²²Juchatlie sija ni y cabales na chinatlie: jutufong sija pot y enemigujo.