YƐSÃÃ 94:4-14

⁴Bɛ̀ nɑ́ɑntɛ bɛtɔbɛ̀ kpɛ́í nkɛ, kɛ pɛ̃ĩti pɛ̃ĩti, kɛ nɑ́ɑntɛ sipɔɔ kó tinɑ́ɑǹtì, kɛ tú mɛyɛi ndɔɔ̀rìbɛ̀.

⁵Ti Yiɛ̀ nKuyie mbɛ̀ fɛ̃́ũnko ɑ nìtìbɛ̀ mbɛ, bɛ̀ diinko ɑ kɔbɛ mbɛ mɛsémmɛ̀.

⁶Bɛ̀ kɔ̀ù bɛkúpobɛ̀ mbɛ nɛ̀ bɛpɔ̀ɔ̀bɛ̀. Kɛ feu iciribí.

⁷Kɛ nɑ́ɑ́ nkɛ tú: Ti Yiɛ̀ nKuyie nyí wúó, ti Yiɛ̀ nKuyie nSɑkɔbu do tũ nkù í dɑkɛ.

⁸Díndi tiyɛìntì dɔɔ̀nɛ̀ mɛyɔɔ̀mmɛ̀. Tidìɛ̀ntì díndi dɛ̀ yó nkɑ̃́ɑ̃́kɛ́ dɛ kɛ̀ di mɔɔtɛ mɛyɛ̀mmɛ̀?

⁹Kuyie nkùù ɑ̃nnɛ́ onìtì yɛto, kù bo yĩɛ̃kɛ kù bo keèmɑ̀ɑ̀? Kunku kùù ɑ̃nnɛ́ onìtì inuɔ kù bo yĩɛ̃kɛ kù bo yɑ̀mɑ̀ɑ̀?

¹⁰Kunku kùù tiè nyɛbotɛ̀ kù bɑ́ɑ́ nɑ kɛ́ bɛ̀ potɑ́ɑ̀? Kuù í duɔ̀ mbɛnìtìbɛ̀ mɛciìnɑ̀ɑ̀?

¹¹Ti Yiɛ̀ nKuyie nyɛ̃́mu onìtì kó iyɛǹtotí, kù yɛ̃́mu ì tumɛ̀ kuyɑɑkù.

¹²Dɛ̀ nnɑɑti onìtì ti Yiɛ̀ nKuyie ntié nwè, kù ciìkùnko wè nɛ̀ ku kuɔ́.

¹³Dɛɛ̀ yó nhò kɑ̃nkɛ́ diyiè yɛiri yiè, kɛ bɑɑnɛ̀ bɛ̀ bo keúmɛ̀ oyɛiwe fɔ̃ti.

¹⁴Kɛ yɛ̃́ ti Yiɛ̀ nKuyie nhɔ̃ í ndootóomɛ̀ ku kó bɛnìtìbɛ̀, kù í yóó yóu ku te bɛ̀.