YƐSÃÃ 88:1-12

¹Bɛdèmbɛ̀ kóo kótì Kodee dentĩ̀nnì dìèmmɛ̀ Emɑnni Esidɑiti botí kou keutɛ́ fɛ̀ɛ̀ sɑ́útìyɛ̀nfɛ̀ kɛ eunɛ̀ fɛtɑ̃rifɛ.

²N Yiɛ̀ nKuyie n dɛɛtíwè, nh ɔ̃ ntṹṹ nkɛ yu fɔ̃́ nwe, kɛ̀ dɛ̀ bììtɛ nní ndɑ kuɔ̀nnɛ̀.

³Keè m bɑ́ɑmmìi, kéntɛ́ n dɑbònnì.

⁴Dɛ̀ bi n wɛ̃nnì ndi, n duúnnɛ̀ kudɔnkù nku.

⁵Bɛ̀ n wèńtɛ́ ocíì nwe, n wɛ̃rímú í kpɑɑ́.

⁶Nɛ̀ bɛ̀ɛ̀ duɔ́ kudɔnkù tíì wɛ̃ ndidɔ́ù, n sɑ̃̀ɑ̃́tɛ́nɛ̀ ocíì nwe wèè bo kudɔnkù, ɑ yɛ̃̀ nwèè kpɛ́í, ɑ nɔ̀ùtɛ̀ dɛ̀tɛ́nɛ̀ wè.

⁷A n dootóo difɔ̃̀tìrì cũmpuri ndi, dibiìnnì diɛrì miɛkɛ kudɔnkù.

⁸A miɛkɛ kɛmɔu kɛɛ̀ do n yĩ́nkɛ̀ kɛ n yɔ̃̀ntɛ, ɑ yɛ̃ĩti timɔu sɑ̃rì n yĩ́nkɛ̀ nkɛ.

⁹Kɑ̀ɑ n dɛ́tinnɛ n kɔbɛ kɛ̀ n nɑɑ́ nyisíɛ́ bɛ kpɛ́í n kpetímu, n yí mɔkɛ m bo yɛ̀ dɛ̀.

¹⁰N tɑ mɛfɛ̃́ṹtímɛ̀ mmɛ kɛ kɔmmú kɛ̀ n nuɔ ntiikɛ. N Yiɛ̀ nKuyie n kuɔ̀nnɛ̀ fɔ̃́ nwe yɛwe yɛmɔu, n yuo n nɔu fɔ̃́ɔ̃̀ bíɛ́kɛ̀.

¹¹Bɛcíríbɛ̀ kpɛ́í nkɛ ɑ dɔɔrimɛ̀ tidiɛtɑ̀ɑ̀? Bɛdɔmbìùbɛ̀ bo entɛ kɛ dɑ sɑ̃ntɑɑ̀?

¹²Bɛ̀ɛ̀ bo difɔ̃̀tìrì miɛkɛ bɛ̀ nɑ̀ɑ́ nhɑ kó mɛsɑ̀ɑ̀ nkpɛ́ínɑ́ɑ̀? Yɑ́ɑ̀ bɛ̀ɛ̀ duɔ́ kudɔnkù bɛ̀ bo nɑ́kɛ́ ɑ túmɛ̀ timɔ́mmɔnti yiɛ̀?