YƐSÃÃ 78:3-72

³Ti kèè tì kɛ ti yɛ̃́, ti yɛmbɛ̀ ti tùo ntì.

⁴Ti bɑ́ɑ́ tì sɔ̀nnɛ ti bí, ti yóó ti tùòmmu ti yɑɑ̀bí, Ti Yiɛ̀ nKuyie nkó disɑ̃nni nɛ̀ ku kó muwɛ̃rímú, nɛ̀ tidiɛtì kù dɔ̀ɔ̀ tì.

⁵Kuù dɔúnnɛ̀ Sɑkɔbu yɑɑ̀bí ku tié, kuù duɔ́ nku kuɔ́ Isidɑyɛɛribɛ, kɛ nɑ̀kɛ́ ti yɛmbɛ̀ kɛ tú bɛ̀ɛ tì tié mbɛ bí.

⁶Kɛ̀ dɛ̀ɛ yie nkɛ̀ kutɔ̃nkù kùù tũ̀nní kɛ̀ kù ntì yɛ̃́, ibí bɛ̀ bo piɛ́ ì kɛ̀ ìi tì tùo nyi kó ibí.

⁷Kɛ̀ dɛ̀ɛ yie nkɛ̀ bɛ̀ mbúɔ́ Kuyie, kɛ bɑ́ɑ́ yɛ̃̀ nku tɔ̃mmú, bɛ̀ ntũ nku tɑnnɔ̀.

⁸Kɛ bɑ́ ndònnɛ̀ bɛ yɛmbɛ̀ kɛ̀ bɛ to nkpeńnì, kɛ̀ bɛ̀ nyetírí Kuyie nkpɛti, kɛ́ntú bɛ̀ɛ̀ yɛ̀mmɛ̀ í fííkú, bɛ̀ɛ̀ í tũ Kuyie nsɛ́i.

⁹Efɑdɑimmu kɔbɛ tú bɛtɑ̃nnuɔmbɛ mbɛ, kɛ kũ̀ńnɛ́ mudoò kɛ bùtínnɛ́ kɛ cokɛ́.

¹⁰Bɛ̀ í yie nkɛ pĩ́ mmɛtɑummɛ̀ Kuyie mbɛ̀ dɔ̀ɔ̀nɛ̀ mɛ̀, bɛ̀ í yie nkɛ tũ̀nnɛ ku kuɔ́.

¹¹Kɛ yɛ̃̀ mmutɔ̃ndiɛmù kù do dɔ̀ɔ̀ mù, bɛ̀ do yɑ̀ tìì diɛtì kó dimɑ̀ɑ̀.

¹²Kuyie ndo dɔ̀ɔ̀mu tidiɛtì bɛ yɛmbɛ̀ nuɔ mmiɛkɛ, Esibiti tenkɛ̀ Soɑ̃ɑ̃ tempɛ̃ miɛkɛ.

¹³Kuù do kèétɛ́ dɑ̀mɛ́ɛ̀rì kɛ̀ bɛ̀ɛ séntɛ́, kɛ̀ mɛniɛ ncómmú kɛ́ndò nkuduotí.

¹⁴Kɛ̀ kù níí mbɛ̀ ni nɛ̀ diwɛtirì kuyie, kɛyènkɛ̀ kɛ̀ dì mbɛ̀ mí muhɑ̃ɑ̃́.

¹⁵Kɛ̀ kùu dennɛní mɛniɛ ndipèrì miɛkɛ, kɛ̀ mɛ̀ɛ pɔ̃ntɛ́ mɛdiɛ̀ nkɛ̀ bɛ̀ɛ yɑ̃̀.

¹⁶Kuù do yɑtɛ́ dipèrì dikpɑ́ɑ̀ cuokɛ̀ kɛ̀ mɛniɛ ncóúnní mɛdiɛ̀, kuù do dènnɛní mɛniɛ nkɛ̀ mɛ̀ɛ puɔ̃́ sikondɑkɛsí nɛ̀ ikó ndiɛyì kɔ̃mɛ.

¹⁷Nɛ̀ mɛmmɛ kɛ̀ bɛ̀ nsɔkɛ́ kɛ cɑɑ̀ri Kuyie, kɛ yetírí Kuyie nkùù bɑkɛ́ kɛĩ́nkɛ̀ nɛ̀ kɛtenkɛ̀ ku kpɛti tɛdɔnkpetɛ̀ ĩ́nkɛ̀.

¹⁸Nɛ̀ bɛ yɛ̀mmɛ̀ miɛkɛ kɛ̀ bɛ̀ ìínko Kuyie mmiɛkɛ, kɛ kù bèkú tidiitì bɛ̀ dɔ́ tì.

¹⁹Kɛ̀ bɛ̀ n wɑ́tìrì Kuyie nkɛ tú: Kuyie mbo nɑ kɛ́ ti duɔ́ ndikpɑ́ɑ̀ diì mmiɛkɛ mudiì kɛ̀ ti diɑ̀?

²⁰Ntɛ kù potɛ́mɛ̀ dipèrì kɛ̀ mɛniɛ nni mpuunní kɛ pũɔ̃̀ nyikó kɔ̃mɛ, kù bo nɑ kɛ ti duɔ́ mmudiì nɛ̀ imɑɑnnɑɑ̀?

²¹Kɛ̀ ti Yiɛ̀ nKuyie ti kèè kɛ̀ ku miɛkɛɛ pɛikɛ Sɑkɔbu yɑɑ̀bí, kɛ́fɑ̃ntɛ mɛdiɛ̀ kɛ́tuɔ nyIsidɑyɛɛribɛ.

²²Bɛ̀ í yie mmɛ̀ɛ̀ kpɛ́í nku kpɛti, bɛ̀ í tɑ̃́mɛ̀ kɛ dò nkù bo bɛ̀ dɛɛtɛ́.

²³Mɛmmɛ kù pɛ́immɛ̀ yɛwɛtɛ̀, kɛ́kpetɛ́ yɛwɛtibòrɛ̀,

²⁴kɛ́cṹũnní mɑ́nnì, kɛĩ́nkɛ̀ kó mudiì mmu kù do bɛ̀ duɔnnímɛ̀.

²⁵Bɛmbɛ bɛnìtìbɛ̀ kɛ̀ bɛ̀ɛ di bɛnitidiɛbɛ̀ kó mudiì, kɛ̀ kù mbɛ̀ duɔ̀ mudiì bɛ̀ dɔ́ mɛ̀ɛ̀ botí.

²⁶Kɛ̀ Kuyie nduɔ́ nkɛ̀ diyiè yìɛ̀ní kɛ̀ɛ̀ bíɛ́kɛ̀ kó kuyɑɑkùu fuutɛ, nɛ̀ ku kó tikpetì miɛkɛ kɛ̀ kùu duɔ́ nkɛ̀ kubɑkù cɑ̃̀nku kó kuyɑɑkùu fuutɛ.

²⁷Kɛ̀ kùu cṹũnní imɑɑ mbɛ cuokɛ̀ kɛ̀ ì nsũ kɛ dò mmubirímú, kɛ́tɔní yɛpɛ̀pɛ́rɛ̀ kɛ̀ yɛ̀ nsũ dɑ̀mɛ́ɛ̀rì kó mubirímú dòmmɛ̀.

²⁸Kɛ̀ Kuyie nduɔ́ nkɛ̀ yɛ̀ nduò bɛ kɑrì kɛ ncóú cóú kɛ́fitɛ́ bɛ touti.

²⁹Kɛ̀ bɛ̀ɛ di bɛ̀ dɔ́mɛ̀ kɛ́nsɑ̀nnɛ̀, kɛ̀ kùu bɛ̀ duɔ́ mbɛ yɛ̀mmɛ̀ kó mudiì.

³⁰Kɛ̀ bɛ̀ nkpɑɑ́ kɛ mu nyí mù dɛ, kɛ̀ dɛ kó tidiitì nkpɑɑ́ bo bɛ nɔ̀ miɛkɛ,

³¹Kɛ̀ Kuyie mmiɛkɛɛ bɛ yɛ̀, kɛ̀ kùu kuɔ yɛdɑkperɛ̀, nɛ̀ bɛdɑpɑ̀mbɛ̀ Isidɑyɛɛribɛ cuokɛ̀.

³²Bɑ́ nɛ̀ mɛmmɛ kɛ̀ bɛ̀ nsɔkɛ́ kɛ cɑɑri, bɛ̀ í nyie nkɛ́ntɑ̃́ Kuyie ndɔ̀ɔ̀ tìì diɛtì.

³³Mɛmmɛ kɛ̀ Kuyie mbɛ̀ fùùtɛ muyɑɑ́ nkɛ̀ bɛ̀ɛ kú, kɛ̀ mɛyɛi mbɛ̀ do kɛ kṹntɛ́ bɛ fòmmu.

³⁴Kɛ̀ Kuyie mbɛ̀ potɛ́ dìì mɔ̀nnì bɛ̀ɛ kù wɑmmú, kɛ́wɛ̃ɛ̃tɛní ku bíɛ́kɛ̀, kɛ́cokɛ́ní ku borɛ̀,

³⁵kɛ́dentɛní Kuyie nkuù do túmɛ̀ bɛ kó dipèrì, kunku kùù bɑkɛ́ kɛĩ́nkɛ̀ nɛ̀ kɛtenkɛ̀ kuù tumɛ̀ bɛ kóo donti.

³⁶Kɛ nɛ́ nku cií, kɛ kù nɑ̀ɑ́ nsiyɑ́ɑ̀bìsí mɑ́ɑ̀.

³⁷Bɛ yɛ̀mmɛ̀ do í fííkú ku ĩ́nkɛ̀, bɛ̀ í mpĩ́ nkù bɛ̀ dɔ̀ɔ̀nɛ̀ mɛ̀ɛ̀ tɑummɛ̀.

³⁸Nɛ̀ ku sémmɛ̀ diɛmɛ̀ kpɛ́í nkɛ̀ kù mbɛ̀ cĩ́ɛ̃́mmu, bɑ́ kù í mbɛ̀ kùɔ kɛ́deè, kucɛ mɛ̀pɛ́u kɛ́ mbɛ̀ mɔ̀kɛnɛ̀ mɛminnímɛ̀ bɑ́ kù í nyóu kɛ̀ ku miɛkɛɛ bɛ̀ yɛ̀ mɛdiɛ̀.

³⁹Kù do yɛ̃́mu bɛ̀ tumɛ̀ bɛnìtìbɛ̀ mbɛ, kɛ do mmuyɑɑ́ kɛ yóó pɛ̃ɛ̃tɛ́ kɛ̀ dɛ̀ɛ deè.

⁴⁰Kɛ̀ bɛ̀ɛ yetɛ ku kpɛti kucɛ mɛ̀pɛ́u dikpɑ́ɑ̀ miɛkɛ, kɛ́mpɛ́íkùnko ku miɛkɛ kucɛ mɛ̀pɛ́u tɛdɔnkpetɛ̀ ĩ́nkɛ̀.

⁴¹Kɛ̀ bɛ̀ nsɔkɛ́ kɛ beú Kuyie, kɛ íinko ku miɛkɛ kunku kùù bɛ̀ te bɛmbɛ Isidɑyɛɛribɛ.

⁴²Bɛ̀ í ndenniní Kuyie nwɛ̃rímú kpɛ́í, bɛ̀ í nkpɑɑ́ yɛ̃́ kù bɛ̀ dɛɛtɛ́ dìì yiè nɛ̀ bɛ dootitɔbɛ̀.

⁴³Bɛ̀ í kpɑɑ́ yɛ̃́ kuù do dɔ̀ɔ̀mɛ̀ tidiɛtì Esibiti, nɛ̀ kù do dɔ̀ɔ̀ mɛ̀ɛ̀ bɛnkùmɛ̀ Soɑ̃ɑ̃ tempɛ̃.

⁴⁴Bɛ̀ í kpɑɑ́ yɛ̃́ kù do cèètɛmɛ̀ ikó nkó mɛniɛ kɛ̀ mɛ̀ɛ nɑɑ́ mmɛyĩ̀ĩ̀, kɛ̀ Esibiti kɔbɛɛ mɛ yĩɛ̃kɛ muyɑ̃̀ɑ̃̀.

⁴⁵Kù do duɔ́mmɛ̀ kɛ̀ sikonsɑpoo yɛ̀nní kɛ́ mbɛ̀ dɔmmù, kɛ̀ yɛcɛdɑkɛ̀ɛ píɛ nkɛ cɑkɛ dihɛì.

⁴⁶Kɛ̀ fɛcofɛɛ cɑ́ɑ́kɛ́ bɛ diitì, kɛ̀ yɛcɑ́dúɔ̀ ndɛ́útóo bɛ ɔ̀ùtì kó mucɔ̃́ntimu.

⁴⁷Kɛ̀ fɛtɑɑfɛ̀ mɑ́tɑ̃́rɛ̀ɛ cɑkɛ bɛ tie mbɛ̀ tu dɛ̀ fínyĩ̀, kɛ̀ fɛtɑdiɛ̀fɛ̀ɛ kuɔ dɛtie mbɛ̀ tu dɛ̀ Sìkòmɔ́ɔ̀.

⁴⁸Kɛ̀ fɛtɑɑfɛ̀ mɑ́tɑ̃́rɛ̀ɛ kuɔ bɛ wũɔ̃, kɛ̀ fɛtɑpíɛ̀fɛ̀ɛ kuɔ bɛ nɑɑcɛ̃nti.

⁴⁹Kɛ̀ ku miɛkɛɛ bɛ̀ pɛikɛ mɛsɑ̀ɑ̀, kɛ́fɑ̃ntɛ kɛ́ bɛ̀ tùɔ nkɛ̀ dɛ̀ nyóù mɛdiɛ̀, kɛ̀ kùu bɛ̀ duɔnní ku tɔ̃rɛ̀ yɛ̀ɛ̀ kɔ̀ù kucɛ̃nku.

⁵⁰Ku miɛkɛ do bɛ̀ yɛ̀mu kɛ́tontɛ́, bɑ́ kù í mbɛ̀ coo, kɛ́ bɛ̀ bɔntɛ́ mutenkṹṹ nyɛimu,

⁵¹kɛ́potɛ́ bɛ̀ɛ̀ kó dimɑ̀ɑ̀ tu Mpo bɛmɔu Esibiti, bɛ̀ɛ̀ kó dimɑ̀ɑ̀ do tú bɛketibɛ̀ Kɑmmu kó kuwuɔ mmiɛkɛ.

⁵²Kɛ̀ kùu dennɛ ku nìtìbɛ̀ onìtì ɔ̃ɔ̃ dennɛmɛ̀ o pe, kɛ́ mbɛ̀ cɛ̃mmú onìtì ɔ̃ ncɛ̃mmúmɛ̀ o wũɔ̃ dikpɑ́ɑ̀ miɛkɛ.

⁵³Kɛ̀ kù mbɛ̀ cɛ̃mmú bɛ́ù bɑ́ bɛ̀ í nyĩɛ̃̀kù, kɛ̀ mɛniɛ mpɔ̃ntɛ́nɛ̀ bɛ dootitɔbɛ̀.

⁵⁴Kɛ̀ kùu bɛ̀ tɑnnɛ́ bɛ ɛì kù cɑ̃̀ńnɛ́ dì bɛ kpɛ́í, ku tɑ̃sɑ̀ɑ̀rì kù fìètɛ dì nɛ̀ ku wɛ̃rímú.

⁵⁵Kɛ̀ kùu bɛti yɛbotɛ̀ yɛ̀ɛ̀ do dɛ̀ bo, kɛ́berí kɛtenkɛ̀ kɛ́ bɛ̀ totí, kɛ̀ Isidɑyɛɛribɛ tiekɛ bɛ cɛ̃́ĩ kɛ́mbo.

⁵⁶Nɛ̀ mɛmmɛ kɛ̀ bɛ̀ nyíinko Kuyie nkùù bɑkɛ́ kɛĩ́nkɛ̀ nɛ̀ kɛtenkɛ̀ ku miɛkɛ, kɛ́yetɛ ku kpɛti, bɛ̀ í ndɑkɛ ku kuɔ́ kpɛti.

⁵⁷Kɛ̀ bɛ̀ɛ dɛ́tɛ́nɛ̀ Kuyie mbɛ yɛmbɛ̀ kɔ̃mɛ, kɛ́ nkù soú kɛ í ndò nhɑ́ nɑ kɛ́ mbɛ̀ tɑ̃́, mutɑ̃mmù mùù í fĩ mmɛsɑ̀ɑ̀ mu kɔ̃mɛ.

⁵⁸Kɛ̀ bɛ̀ nfeu yɛtɔ̀rɛ̀ kɛ íinkoo Kuyie mmiɛkɛ, kɛ feu yɛbɔkɛ̀ kɛ̀ dɛ̀ kù yóù.

⁵⁹Kɛ̀ Kuyie ndɛ̀ yɑ̀ kɛ̀ kù miɛkɛɛ pɛikɛ, kɛ̀ kùu pɛ̃ nyIsidɑyɛɛribɛ pɑ́íí.

⁶⁰Kɛ̀ dɛɛ̀ nte kɛ̀ kùu ítɛ́ ku kɑ̀rì Sidoo, di tou kù do bo dì bɛnìtìbɛ̀ cuokɛ̀.

⁶¹Kɛ̀ kùu yóu kɛ̀ ibotí tɛì kònnɛ̀ ku tɑummɛ̀ tɔu, dìì bɛnkú ku diɛtì nɛ̀ ku wɛ̃rímú kɛ̀ dìi tɑ bɛ dootitɔbɛ̀ nɔu miɛkɛ.

⁶²Kɛ̀ kùu yóu kɛ̀ bɛ̀ nkɔù ku nìtìbɛ̀, ku miɛkɛ kɛɛ̀ do yɛ̀ ku kó bɛnìtìbɛ̀ kù te bɛ̀.

⁶³Kɛ̀ muhɑ̃ɑ̃́ ncɔ́útɛ́ bɛdɑcɛ̃mbɛ̀, kɛ̀ bɛporicɛ̃mbɛ̀ɛ pɑɑ̀ bɛ dɑɑbɛ̀.

⁶⁴Kɛ̀ ikuɔ́ nìùbɛ̀ɛ kú mudoò miɛkɛ, bɑ́ bɛkúpobɛ̀ í nkuɔ́.

⁶⁵Kɛ̀ ti Yiɛ̀ nKuyie nyítɛ́ kɛ́ndò nkù do yɛ̃̀ nkɛ duɔ́, okpɑ̀rìnuɔnti ɔ̃ɔ̃ yɑ̃̀ mɛnɑɑ̀ nkɛ́muɔ́ kɛ̀ mɛ̀ɛ̀ íimmɛ̀ o kɔ̃̀ntì.

⁶⁶Kɛ̀ bɛ̀ ncooti kɛ̀ kù tũ nkɛ poti, kɛ̀ bɛ̀ɛ dì ifɛi sɑ̃́ɑ̃̀.

⁶⁷Kɛ̀ kùu dootóo Sosɛfu kó tɛcĩ́ɛ̃̀tɛ̀, kɛ́yetɛ kù bo tɑ̃ɑ̃tɛ́mɛ̀ Efɑdɑimmu kó kuwuɔ.

⁶⁸Kɛ nɛ́ tɑ̃ɑ̃tɛ́ Sudɑɑ kó kuwuɔ, Siyɔ̃ɔ̃ tɑ̃rì kù dɔ́ dì.

⁶⁹Kù dɛ nfìí nku cĩ́ɛ̃̀tɛ̀ kɛ̀ tɛ okùmɛ̀ mmɑ̀nnɛ̀ yɛtɑ̃diɛyɛ̀, kɛ́ndò nkɛtenkɛ̀ dòmmɛ̀ kɛ fííkú sɑ̃́ɑ̃̀.

⁷⁰Kuù tɑ̃ɑ̃tɛ́ ku kóo tɔ̃ntì Dɑfiti, koò dɛ̀ìtɛní mupecɛ̃mmu miɛkɛ.

⁷¹Ò do cɛ̃mmú ipe nyi kɛ̀ kùu ò dɛ̀ìtɛní, kòò bo ncɛ̃mmú ku nìtìbɛ̀ Sɑkɔbu yɑɑ̀bí, nɛ̀ Isidɑyɛɛribɛ kù te bɛ̀.

⁷²Kɛ̀ Dɑfiti mbɛ̀ cɛ̃mmù nɛ̀ mɛyɛ̀mmɛ̀ mɛmɔu, kɛ́ mbɛ̀ ni kɛ̀ dɛ̀ dò nsɛ́i.