YƐSÃÃ 71:8-24

⁸A sɑ̃nni mbo n nùù miɛkɛ, kɛ̀ nni ndɛ́úkùnko ɑ yètìrì sɑ̃́ɑ̃̀.

⁹Kɛ̀ n kòtɛ́, ɑ bɑ́ m bɔntóo, kɛ̀ n wɛ̃rímú dèè ɑ bɑ́ n yóu.

¹⁰N dootitɔbɛ̀ nɑ́ɑntɛ n kpɛ́í nkɛ, bɛ̀ɛ̀ m pɑkíí bɛ̀ dɑ̀kiimu n kpɛ́í.

¹¹Kɛ tú: Kuyie nhò dootóomu, bɛtinɛ̀ we, pĩ́nnɛ̀ we, òmɔù í yóó ò dɛɛtɛ́.

¹²Kuyie mbɑ́ n dɛ́tɛ́nɛ̀, mɔ́nnɛ́ní mɛcɑ̃ɑ̃ kɛ́ n teennɛ̀.

¹³Ifɛi nɛ̀ mɛyɛi ndɛ̀ɛ do bɛ̀ɛ̀ n wɑ́tìrì, bɛ̀ɛ̀ n dɔ́nɛ̀ mɛyɛi mbɛ̀ɛ bɛ̀ sènkɛ̀rì kɛ̀ bɛ̀ɛ di ifɛi.

¹⁴Mí m búɔ́ fɔ̃́ nwe sɑ̃́ɑ̃̀, kɛ yó ndɑ sɑ̃ntí sɑ̃́ɑ̃̀, kɛ bɑɑ dɑ sɑ̃ntí kɛ dɑ sɑ̃ntí.

¹⁵N níí bo ntṹṹ nkɛ nɑ́ɑ́ nhɑ túmɛ̀ timɔ́mmɔnti yiɛ̀, kɛ nɑ́ɑ́ nhɑ dɛɛrímɛ̀, kɑ̀ɑ sɑ̀ɑ̀ nsũ kɛ í dò nkɑɑ̀ nkɛ́deè.

¹⁶N Yiɛ̀ nKuyie m bo pĩ́ mmutɔ̃ndiɛmù nɛ̀ ɑ kó muwɛ̃rímú, kɛ́nnɑ́ɑ́ nhɑ kó timɔ́mmɔnti kpɛ́í mmɑ́ɑ̀.

¹⁷Kuyie nhɑ n tièmmu nɛ̀ m bíbɛ́ǹtì, nɛ̀ yíenní kɛ n nɑ́ɑ́ nhɑ diɛtì.

¹⁸Nɛ̀ m bo kotɛ́mɛ̀ kɛ̀ n yùtì pɛikɛ, ɑ́ú Kuyie nhɑ bɑ́ m bɔntóo n dɔ́ kɛ́nɑ́kɛ́mu di mmɔ̀nnì kɔbɛ ɑ wɛ̃rímú, kɛ́nɑ́kɛ́ bɛ̀ɛ̀ kpɑɑní ɑ kpeńnìmɛ̀.

¹⁹Kuyie nhɑ mɔ́mmɔnti dɛumu kɛ tuɔkù kɛĩ́nkɛ̀, fɔ̃́ɔ̃̀ dɔ̀ɔ̀ dɛdiɛrɛ̀ dɛmɔu, we ndɑ mɑ̀nnɛ̀?

²⁰Fɔ̃́ɔ̃̀ duɔ́ nkɛ̀ n yɑ̀ mɛhɑ́ɑ́rìmɛ̀ nɛ̀ mɛsémmɛ̀, kɑ̀ɑ yó n fòùkùnnɛ, kɛ́ n dennɛní kudɔnkù.

²¹A yóó wɛ̃tɛ kɛ́ m bɑ́ntɛ̀mu, kɛ́ndɛ́úkùnnɛ.

²²N yó ndɑ sɑ̃ntínɛ̀ kubómbonku nku, ɑ tú mɛ̀ɛ̀ kpɛ́í ntimɔ́mmɔnti yiɛ̀ nfɔ̃́ nKuyie. M bo ndɛ́úkùnko ɑ yètìrì nɛ̀ kukùtìdùkù, fɔ̃́ nKuyie nyIsidɑyɛɛribɛ tũ nkù ɑ sɑ̀mu.

²³M bo ndiè nkɛ dɑ sɑ̃ntí kɛ́ndɛ́úkùnkoo ɑ yètìrì ɑ n dɛɛtɛ́ mɛ̀ɛ̀ kpɛ́í.

²⁴N níí yó ntṹṹ nkɛ nɑ́ɑ́mmu ɑ kó timɔ́mmɔnti kpɛ́í, ifɛi pĩ́mmu bɛ̀ɛ̀ n dɔ́nɛ̀ mɛyɛi nkɛ̀ bɛ̀ sĩ̀ńnɛ́.