YƐSÃÃ 69:1-20

¹Bɛdèmbɛ̀ kóo kótì dìèmmɛ̀ Dɑfiti yɛ̀nfɛ̀ kɛ bie ntibómbonti.

²Áú Kuyie n dɛɛtɛ́! N tɑ mɛniɛ mmɛ kɛ tùɔ̀kɛ n fɔ̃̀níí.

³N fìíkú disɑ̃̀ũ̀ ndi, n yí pɛ̀tɛ́ dɛkperɛ̀ kɛ nɑ, n tɑ dɛcũmpurɛ ndɛ, fɛnɛ́wuonfɛ fɛɛ̀ n tɔ.

⁴N kɔmmú kɛ ɔ̀umu kɛ̀ n níí kpeí, m bɔ̀útɛ́ kɛ bɔ̀útɛ́ Kuyie nkùù n te kùnku kɛ̀ n nuɔ nyetɛ.

⁵Bɛ̀ɛ̀ n nìí nkɛ dɔ́ kɛ́ n kuɔ bɛ̀ sũmu kɛ pɛ̃ɛ̃tɛ́ n yùtì, bɛ̀ n dɔ̀ɔ̀ bɛ dootitɔù nwe dɛtetìrɛ̀, bɛ̀ kpeńnì kɛ m pɛ̃ɛ̃tɛ́mu kɛ yó n kuɔ, kɛ duɔ́ nkɛ̀ n yietí n yí yùúkú dɛ̀.

⁶Kuyie nhɑ yɛ̃́mu n yɛìntì, n cɑɑ̀rìmɛ̀ í sɔri ɑ ììkɛ̀.

⁷Kuyie Mpɑkɛdɑɑ, ɑ bɑ́ɑ́ yóu kɛ̀ míì nte, kɛ̀ bɛ̀ɛ̀ dɑ búɔ́ kɛ̀ bɛ̀ɛ di ifɛi. Fɔ̃́ nKuyie ntínti Isidɑyɛɛribɛ ti tũ nkù, ɑ bɑ́ɑ́ yóu kɛ̀ míì nte kɛ̀ bɛ̀ɛ̀ dɑ wɑɑ̀ nkɛ̀ bɛ̀ɛ di ifɛi.

⁸Fɔ̃́ɔ̃̀ kpɛ́í nkɛ bɛ̀ n sɑ̃̀ɑ̃́mmɛ̀, n yo nyifɛi fɔ̃́ɔ̃̀ kpɛ́í.

⁹N nɑɑ́ nhopɔ̀ɔ̀ nwe n kɔbɛ cuokɛ̀, n yɔ̃ fũ̀ɔ̃̀ kɔbɛ tɛ̃́nkɛ í n yɛ̃́.

¹⁰Kɛ yɛ̃́ n dɔ́mɛ̀ ɑ cĩ́ɛ̃̀tɛ̀ mɛdiɛ̀ nkɛ̀ dɛ̀ n tùɔ̀, bɛ̀ dɑ sɑ̃́ɑ̃́ nyɛ̀ɛ̀ sɑ̃́ɑ̃̀mbɛ̀ duò n yuu ĩ́nkɛ̀ nkɛ.

¹¹M boú dinùù ndi kɛ kuɔ̀, nɛ̀ dɛ kpɛ́í nkɛ̀ bɛ̀ n dɑú.

¹²N dɑ̀ɑ́tí kufɔ̀ɔ̀tɔ̃̀nkù nku, kɛ̀ bɛ̀ nɑ́ɑntɛ n kpɛ́í kɛ n dɑú,

¹³Bɛ̀ kɑ̀tìnɛ̀ mí nwe yɛteyɔ, míì nɑɑ́ nfɛnɑɑyɑ̃̀ɑ̃̀yɛ̀nfɛ̀.

¹⁴Mí nyie n kuɔ̀nnɛ̀ fɔ̃́ nwe n Yiɛ̀ nKuyie, dɛ̀ tùɔ̀kɛmu ɑ bo n tee ndɛ̀. Áú Kuyie! A sɑ̀ɑ̀ ndɛumu, n kéntɛ́, n yɛ̃́mu nweti weti kɛ dò nhɑ yó n dɛɛtɛ́.

¹⁵Nh uutɛ́ disɑ̃̀ũ̀, kɛ̀ n tɛ̃́nkɛ bɑ́ nfṹṹkú n dennɛní dibinni, n dɛɛtɛ́nɛ̀ bɛ̀ɛ̀ ǹ nìí.

¹⁶Bɑ́ɑ́ yóu kɛ̀ mɛniɛ nni mpɔ̃ntɛ́nɛ̀, bɑ́ɑ́ yóu kɛ̀ n do kudúókù, bɑ́ɑ́ yóu kɛ̀ tɛbintɛ n yɑ̃kɛ!

¹⁷Kuyie nhɑ n kéntɛ́ kɛ yɛ̃́ ɑ sɑ̀mɛ̀mu kɛ dɔɔri mɛsɑ̀ɑ̀, wɛ̃ɛ̃tɛní m bíɛ́kɛ̀ ɑ sémmɛ̀ dɛu mɛ̀ɛ̀ kpɛ́í.

¹⁸Bɑ́ m bútínnɛ́ mí nhɑ kóo tɔ̃ntì, nh ɑ́ɑ̀rìmu, cɑ̃rikɛní.

¹⁹Kɔtɛní kɛ́dontɛ́ nh ɔ̃nnì, n dɛɛtɛ́nɛ̀ n dootitɔbɛ̀.

²⁰A wúómmu bɛ̀ n sɑ̃̀ɑ̃́mmɛ̀, kɛ yɛ̃́ n yo nyìì fɛi kɛ kɛ̃kɛ, n dootitɔbɛ̀ í dɑ sɔrìnɛ̀.