YƐSÃÃ 51:4-19

⁴Nh ɔ́útɛ́ pɑ́íí kɛ́ n wénkùnnɛ n yɛi.

⁵M bɑntɛ́mu n cɑ̀ɑ̀rɛ̀mɛ̀, n wúómmu n yɛi n sɑ̃́ɑ̃̀.

⁶N yetɛ́nɛ̀ fɔ̃́ nwe ɑmɑ́ɑ̀, kɛ dɔ̀ɔ̀ ɑ í dɔ́ dɛ̀, dɛɛ̀ te kɑ̀ɑ yó nni nkpɑnnɛ̀ kɛ nɑɑti, òmɔù bɑ́ɑ́ sɛi nhɑ beéntì.

⁷N tú mɛyɛi nyiɛ̀ nwe nɛ̀ bɛ̀ m pɛinímɛ̀, nɛ̀ mɛyɛi mmɛ n yɔ̃ m pùónnímmɛ̀.

⁸A dɔ́ dɛ̀ onìtì yɛ̀mmɛ̀ miɛkɛ dɛɛ̀ tu: Ò bo ntũmmɛ̀ timɔ́mmɔnti. N duɔ́ mmɛciì n yɛ̀mmɛ̀ miɛkɛ.

⁹N wénkùnnɛ nɛ̀ ìsɔ́pù kó tifɑ̃ɑ̃̀tì kɛ n wenkɛ pɑ́íí, nh ɔ́útɛ́ kɛ n wenkɛ kɛ́nɑɑ́nnɛ̀ kupɑ̀ɑ̀kónkù.

¹⁰Nɑ́ríkùnnɛ n yɛ̀mmɛ̀, n duɔ́ ndiwɛ̀ì, kɛ̀ n yɛ̀mmɛ̀ɛ cɑ́tɛ́, mí nhɑ potɛ́ wè kɛ n nɑ̀ntoo.

¹¹Ũtɛ́ n yɛi mmɛmɔu, bútínnɛ́ n cɑɑ̀rìmɛ̀.

¹²Áú Kuyie! Nh ɑ̃nnɛ́ mɛyɛnwennimɛ, tũntɛ n yɛ̀mmɛ̀ kɛ̀ mɛ̀ mbo ɑ bíɛ́kɛ̀.

¹³Kuyie mbɑ́ m bɔntóo, bɑ́ɑ́ dɛitɛ ɑ kó Muyɑɑ́nsɑ̀ɑ̀mù m miɛkɛ.

¹⁴Wɛ̃tɛ kɛ́ n duɔ́ mmɛdɛɛtímɛ̀ kó diwɛ̀ì kɛ̀ nní ndɑ dɔ́, n duɔ́ mmɛyɛ̀mmɛ̀ m bo nyíénnɛ̀mɛ̀ ɑ kpɛti.

¹⁵N yóó bɛnkɛmu ɑ cɛ bɛ̀ɛ̀ yetɛ ɑ kpɛti, kɛ̀ bɛyɛibɛɛ wɛ̃tɛní ɑ borɛ̀.

¹⁶Áú Kuyie! Kuyie n dɛɛtíwè, n nɔ̀ùtɛ̀ tɛɛ̀ yetɛ́. N dɛɛtɛ́ kɛ̀ nní mpĩɛ̃kù ɑ n dɛɛtɛ́mɛ̀.

¹⁷N Yiɛ̀ nKuyie nhɑɑ n nùù, kɛ̀ n nɑ kɛ́ dɑ sɑ̃ntɛ.

¹⁸A í dɔ́ iwũɔ̃ bɛ̀ dɑ feu ì, ɑ í yíé mbɛ̀ dɑ feu ì kɛ tuɔ̀, n nɑ nyì ndɑ fìému,

¹⁹Kuyie nhɑ dɔ́ yɛ̀ɛ̀ pɑ̃rɛ̀ tu idebìi nyi, onìtì wèè bɑntɛ́ o cɑɑ̀rìmɛ̀. Áú Kuyie nhɑ í yetírí idebìi mɔ́mmɔnyi.