YƐSÃÃ 50:6-21

⁶Kɛĩ́nkɛ̀ nɑ̀ɑ́mmu Kuyie nwennimɛ̀, kuù tu obeéntì.

⁷Isidɑyɛɛribɛ kéntɛ́nɛ̀, n dɔ́ kɛ di bɛ́innɛ̀mu, N kó bɛnìtìbɛ̀ n nɑ́ɑ́nnɛ̀ dí mbɛ kɛ di sɛí, mí nKuyie ndi tũ nkù.

⁸N yí di sɛí nyiwũɔ̃ di n feu ì kpɛ́í, di ì nni nfeumu sɑ̃́ɑ̃̀.

⁹N yí yóó pĩ́ nyɛnɑɑdɑkɛ̀ di cɛ̃́ĩ miɛkɛ, yoo yɛbɔdɑkɛ̀ di bɔtuo miɛkɛ.

¹⁰Míì te ikpɑwũɔ̃ imɔu, yɛtɑ̃rɛ̀ ĩ́nkɛ̀ kó siweí ticɛ̃nti ticɛ̃nti, míì sì te.

¹¹N yɛ̃́mu tinɔ̀tì timɔu, tikpɑsĩ̀ntì timɔu tu n kpɛti nti.

¹²Kɛ̀ dikònnì do m bo m bɑ́ɑ́ di nɑ́kɛ́, míì te kutenkù kumɔu nɛ̀ dɛ̀ɛ̀ bo ku miɛkɛ.

¹³N cɑ́ɑ́mmu yɛnɑɑdɑkɛ̀ kó imɑɑ nnɑɑ̀? N yɔ̃̀mmu yɛbɔdɑkɛ̀ kó mɛyĩ̀ĩ̀ nnɑ̀ɑ̀?

¹⁴Di bo nni mpɑ̃ɑ̃mmɛ̀ yɛpɑ̃rɛ̀, pètìnkɛ nni nsɑ̃ntínɛ̀mu mí nKuyie ndi tũ nkù, ndɔɔrinɛ̀ mí nKuyie nkùù bɑkɛ́ kɛĩ́nkɛ̀ nɛ̀ kɛtenkɛ̀ di yɛ̃ ndi yó n dɔɔ̀ tì.

¹⁵Kɛ̀ dɛ̀ di di dìì yiè dí n yú kɛ̀ n di dɛɛtɛ́, kɛ̀ di nni nsɑ̃ntí.

¹⁶Kuyie mmɛ nnɑ̀ɑ́mmu oyɛiwe kɛ tú: Bɑ́ nnɑ́ɑ́nnɛ̀ ɑ nùù n kuɔ́, bɑ́ nnɑ́ɑ́nnɛ̀ ɑ nùù n tɑnnɔ̀.

¹⁷Fɔ̃́ nwèè sènku n tié, kɛ dokoo n kpɛti.

¹⁸Kɑ̀ɑ yɑ̀ oyúókù dɛ̀ ndɑ nɑɑtinɛ̀ we, kòo nitipowɑntì mɛ nni nwe dí nnɛí.

¹⁹Kɑ̀ɑ nùù tɔ tinɑ́ɑǹyɛiti, kɑ̀ɑ nɔ́ndɛnfɛ̀ nɔnnɛ̀ fɛ̀ bo ciitɛ́mɛ̀ otɔù.

²⁰Kɑ̀ɑ nɑ́ɑntɛ ɑ kou kpɛ́í, kɛ sĩnkùnko ɑ yɔ̃fũ̀ɔ̃̀ kou yètìrì.

²¹Ntɛ ɑ dɔ̀ɔ̀ tì kɑ̀ɑ yɛ̀mmɛ̀ dò nni ncĩ́ɛ̃́kɛ́, kɛ yɛ̃́ kɛ tú n dònnɛ̀ fɔ̃́ nwe, n nɛ́ yóó dɑ bɛnkɛmu ɑ dɔ̀ɔ̀ mɛ̀ɛ̀ yɛi mɛmɔu.