YƐSÃÃ 45:5-16

⁵Túótɛ́ ɑ tɑ̃mmù kɛ́kétɛ́ dekɛ ɑ sɑ̃ntɛ̀, kpɑ ntimɔ́mmɔnti kpɛ́í, kónnɛ́ bɛcĩ̀rìbɛ̀. Kónnɛ́ bɛ̀ɛ̀ nɑɑti. A wɛ̃rímú muù yó nte kɑ̀ɑ nɑ dikpɑ̀nnì diɛrì.

⁶Nɛ̀ ɑ penyómmɛ̀ mmɛ ɑ yóó buɔ́mmɛ̀ ibotí, okpɑ̀ɑ̀tì, ɑ yóó mɛ nkuɔnɛ̀ ɑ dootitɔbɛ̀.

⁷Dikpɑ̀ɑ̀tìkɑ̀rì Kuyie ndɑ duɔ́ ndì yó mbomu sɑ̃́ɑ̃̀, ɑ bɑkɛ́ nɛ̀ timɔ́mmɔnti nti.

⁸A dɔ́ timɔ́mmɔnti nti, ɑ í dɔ́ mɛyɛi, dɛɛ̀ te kɛ̀ Kuyie nhɑ Yiɛ̀ ndɑ tɑ̃ɑ̃tɛ́ ɑ kɔbɛ miɛkɛ kɛ wɑɑrɛ ɑ yuu mɛkùɔ̀, kɛ dɑ dɔ̀ɔ̀ diwɛ̀ì.

⁹A yɑ̀ɑ̀tì ɑ̃ tudɑ̀ɑ̀ríbɛ̀ bɛ̀ tu bɛ̀ míírì nɛ̀ ɑdòwɛ́ɛ̀ nɛ̀ kɑ́sì bɛ kó kufɔ̃ɔ̃ku nku, kɑ̀ɑ cĩ́ɛ̃̀tɛ̀ sɑ̃̀ri yɛpɑ́pɑ́nìì nkó tisɑ̃tì kɛ̀ bɛ̀ bie dɛbémbénnɛ̀ ɑ cĩ́ɛ̃̀tɛ̀ kɛ̀ dɛ̀ dɑ nɑɑti.

¹⁰Bɛkpɑ̀ɑ̀tìsɑpɑ̀mbɛ̀ bɛɛ̀ ɔ̃ɔ̃ dɑ́ co, onitipokpɑ̀ɑ̀tì ɔ̃ ncómmú ɑ píkù nku kɛ sɑ̃̀ri mɛsɔɔ nsɑ̀ɑ̀mɛ̀ kó tisɑ̃tì.

¹¹N kóo sɑpɑ̀ɑ̀, nkéntɛ́ mɛsɑ̀ɑ̀ nkɛ́keè! A tɛ̃́nkɛ bɑ́ ntoti ɑ yɛ̀mmɛ̀ ɑ botí kɔbɛ nɛ̀ ɑ cĩ́ɛ̃̀tɛ̀ kɔbɛ kpɛ́í.

¹²Okpɑ̀ɑ̀tì dɑ dɔ́ mɛdiɛ̀ mmɛ ɑ wenniku kpɛ́í, ò tu ɑ yiɛ̀ nwe, nnínkú o ììkɛ̀.

¹³Tiiri ɛì kɔbɛ bɛdítíkpɑ̀ɑ̀tìbɛ̀ yóó dɑ wɑmmú nɛ̀ yɛpɑ̃rɛ̀ nyɛ.

¹⁴Okpɑ̀ɑ̀tìsɑpɑ̀ɑ̀ mbo tɛkpɑ̀ɑ̀tìcĩ́ɛ̃̀tɛ̀ ntɛ kɛ wenni kɛ dɑ́ɑ́tí tiyɑɑ̀sɑ̀ɑ̀tì tìì dùɔ̀kɛnɛ̀ musɔɔpɑ̀ɑ̀kómmú.

¹⁵Kɛ̀ tì kpɛ̃̀ nkɛ kpɛ̃̀ mmɛɔ̃̀rìmɛ̀ mɛbotí mɛbotí, kɛ̀ bɛ̀ ò tɑtinɛ̀ okpɑ̀ɑ̀tì borɛ̀ kòo dúɔ̀bɛ̀ ò urí.

¹⁶Kɛ̀ bɛ̀ mbɛ̀ urí kɛ yɑ̃nku nɛ̀ diwɛ̀ì kɛ́tɑnnɛ̀nko okpɑ̀ɑ̀tì cĩ́ɛ̃̀tɛ̀.