YƐSÃÃ 44:2-16

²Ti kèèmu nɛ̀ ti to, ti yɛmbɛ̀ ti nɑ̀kɛ́mu ɑ do dɔ̀ɔ̀ dɛ̀ dimɔ̀nnì kótírì miɛkɛ.

³Fɔ̃́ɔ̃̀ bɛ̀ti ibotí kɛ kɑ̀nnɛ ti kɔku, kɛ potɛ́ ibotí kɛ̀ bɛ̀ kɑ̀ri kɛ pitɛ́.

⁴Dɛ̀ í tú nɛ̀ bɛ kpɑ̀rìse nyɛ bɛ tiekɛmɛ̀ dihɛì, dɛ̀ í tú nɛ̀ bɛ wɛ̃rímú mmu bɛ̀ nɑmɛ̀, nɛ̀ ɑ nɔyɔ̃nkperì ndi bɛ nɑmɛ̀ kɛ yɛ̃́ ɑ do bɛ̀ kòḿmúmɛ̀ ɑ bɛ̀ dɔ́ mɛ̀ɛ̀ kpɛ́í.

⁵N Yiɛ̀ nKuyie, nfɔ̃́ɔ̃̀ tu nkóo kpɑ̀ɑ̀tì, fɔ̃́ɔ̃̀ ɔ̃ɔ̃ duɔ́ nkɑ̀ɑ kɔbɛɛ nɑ.

⁶Fɔ̃́ɔ̃̀ te kɛ̀ ti bɛ̀ti ti dootitɔbɛ̀ nɛ̀ ɑ kó diyètìrì ndi ti nɑumɛ̀ bɛ̀ɛ̀ ti dokùnɛ̀

⁷n yí tɑ̃́ n tɑ̃mmù mmu, n siè diì í dɛɛrí.

⁸Fɔ̃́ɔ̃̀ ti dɛɛrínɛ̀ ti dootitɔbɛ̀, kɛ fɛikùnko bɛ̀ɛ̀ í ti dɔ́.

⁹Ti Yiɛ̀ nKuyie nti pɔtìnɛ̀ ɑ yètìrì ndi yɛwe yɛmɔu, kɛ dɑ sɑ̃ntí sɑ̃́ɑ̃̀.

¹⁰Nɛ̀ mɛmmɛ kɑ̀ɑ ti yetɛ kɛ ti ɑ̃nnɛ́ ifɛi, ɑ tɛ̃́nkɛ í niɛ̀nɛ̀ ti kó bɛhɑ̃ɑ̃pɔ̀mbɛ̀ dikpɑ̀nnì.

¹¹Fɔ̃́ɔ̃̀ duɔ́ nkɛ̀ ti cokù ti dootitɔbɛ̀, kɛ̀ bɛ̀ɛ̀ ti níí nkɛ̀ bɛ̀ ɛí ti kpɛrɛ bɛ̀ dɔ́mɛ̀.

¹²Fɔ̃́ɔ̃̀ bɛ̀ nti duɔ́ nyiwũɔ̃ bɛ̀ kɔ̀ù ì kɔ̃mɛ, kɛ ti cíɛnko kɛ̀ ti tɑɑ̀ yɛhɛkɛ̀ tɛyɛ̀.

¹³A fiiti ɑ nìtìbɛ̀ mbɛ dɛtetìrɛ̀ ɑ bɛ̀ fiiti fɑ̀ɑ̀rɛ̀ fɑ̀ɑ̀rɛ̀ nwe.

¹⁴Kɛ yóu kɛ̀ ti cɛ̃pɛɛtitɔbɛ̀ ti senku, kɛ̀ bɛ̀ɛ̀ ti tɔ́kɛ́nɛ̀ kɛ̀ bɛ̀ ti dɑú.

¹⁵Fɔ̃́ɔ̃̀ duɔ́ nkɛ̀ ibotí ti diè, bɛ̀ ti dɑúmu kɛ éùròo.

¹⁶Nh ɔ̃ nkɛ̀ n kèè n kpɑntídɛ̀ntɔbɛ̀ tɑmmɛ̀ ifɛi iì ɔ̃ mpĩ́ kɛ̀ m pi n yììkɛ̀, nh ɔ̃ nkɛ̀ n yɑ̀ n dootitɔbɛ̀ bɛ̀ɛ̀ ti sɑ̃́ɑ̃́ nkɛ ti wɛ̃́nnì kɛ dɔ́ kɛ́pɛitɛ nh ɔ̃ senkɛ̀rì mmɑ́ɑ̀ ndi.