YƐSÃÃ 37:4-27

⁴A yɛ̀mmɛ̀ nnɑɑtinɛ̀ ɑ Yiɛ̀ nKuyie, kù bo dɑ duɔ́ nhɑ yɛ̀mmɛ̀ dɔ́ dɛ̀.

⁵Duɔ́ nhɑmɑ́ɑ̀ ɑ Yiɛ̀ nKuyie, kɛ́ nkù bùɔ́, kɛ̀ kùu pĩ́ mmutɔ̃mmú,

⁶kɛ́fei nhɑ borimɛ sɑ̀ɑ̀mɛ̀ kuwenniku kɔ̃mɛ, kɛ́fei nhɑ kó timɔ́mmɔnti diyiè ɔ̃ ncómmú yɛyɔ kɛ dòmmɛ̀.

⁷Ndò nyúóó Kuyie nyììkɛ̀ kɛ kù kèḿmú, ɑ miɛkɛ bɑ́ mpɛ́ì wèè kpɛrɛ yíé, ɑ miɛkɛ bɑ́ mpɛ́ì wèè dɔ̀ɔ̀ mɛyɛi nhò tɑ̃ɑ̃tɛ́ kɛ bo dɔɔ̀ mɛ̀.

⁸Yóu kunɑupíɛ́, yóu kɛmiɛtonnìkɛ̀, ɑ miɛkɛ bɑ́ ncɔ́ú, dɛ̀ ce mmɛyɛi mmɛ.

⁹Kuyie nyóó dɛitɛmu bɛ̀ɛ̀ dɔ̀ɔ̀ri mɛyɛi, kɛ̀ bɛ̀ɛ̀ kù duɔ́ mbɛmɑ́ɑ̀ kɛ̀ bɛ̀ɛ tiekɛ dihɛì.

¹⁰Dɛ̀ kpɑɑ́ sɑ́m̀pɔ́ nwe kɛ̀ bɛyɛibɛɛ deè, kɑ̀ɑ wɑmmú bɛ̀ do borɛ̀ ɑ bɑ́ɑ́ yɑ̀ òmɔù.

¹¹Bɛ̀ɛ̀ yɛ̀mmɛ̀ boo kɛ̀ bɛ̀ɛ tiekɛ dihɛì, kɛ́mbonɛ̀ kunɑɑtí nɛ̀ diwɛ̀ì mɔ́mmɔnni.

¹²Onitiyɛiwe weè wɑntinɛ̀ osɑ̀ù mɛyɛi, kɛ mɛ́ìrì o nɔ̀ùtɛ̀.

¹³Kɛ̀ ti Yiɛ̀ nnɛ́ ò wùó nkɛ dɑú, kɛ yɛ̃́ o yiè duunnímɛ̀.

¹⁴Bɛnitiyɛibɛ bɛɛ̀ kpɑ̀tɛ bɛ kpɑ̀rìse, kɛ deenko bɛ tɑ̃nnɛ̀, kɛ bo dokɛ́nɛ̀ ocĩ̀rì nɛ̀ osénnìwè, kɛ́kuɔ bɛ̀ɛ̀ borimɛ wenni.

¹⁵Bɛ se yóó kóntɛ́ kɛ́kṹṹ bɛ dirɛ nyɛ, kɛ̀ bɛ tɑ̃nnɛ̀ɛ kékɛ́.

¹⁶Dɛsɑ́m̀pɔ́rɛ̀ wèè wetí ò mɔ̀kɛ dɛ̀ wenni kɛ pɛ̃ɛ̃tɛ́mu bɛyɛibɛ pɛ́u kó tikpɑ̀tì,

¹⁷Kɛ yɛ̃́ Kuyie nyóó pɔntɛmɛ̀ bɛyɛibɛ wɛ̃rímú, kɛ́ntɔ bɛsɑ̀ɑ̀bɛ̀.

¹⁸Kuyie nyɛ̃́mu bɛ̀ɛ̀ yié nku kuɔ́ bɛ we mɑ̀mɛ̀, kù yóó bɛ̀ duɔ́ ndɛ̀ yó ntú bɛ kpɛrɛ ndɛ sɑ̃́ɑ̃̀.

¹⁹Kɛ̀ dimɔ̀nnì yɛiri tùɔ̀kɛní ifɛi bɑ́ɑ́ bɛ̀ pĩ, bɑ́ kɛ̀ dikònnì bo bɛ̀ nyo nkɛ sɑ̀nnɛ̀.

²⁰Bɛyɛibɛ yóó kúmu, kɛ̀ Kuyie ndootitɔbɛ̀ɛ pɛ̃ɛ̃tɛ́ mutepóó nkɔ̃mɛ kɛ́nɑɑ́ nkuyukú.

²¹Oyɛiwe ɔ̃ɔ̃ pentɛ kɛ bɑ́ɑ́ tɛ̃́nnɛ́, kòo sɑ̀ɑ̀wè yie mɔkɛ mɛsémmɛ̀ kɛ pɑ̃ɑ̃.

²²Kuyie ndɔ̀ɔ̀ bɛ̀ mɛsɑ̀ɑ̀ mbɛɛ̀ yóó tiekɛ dihɛì, kɛ̀ kùu bɛti kù cɔ̃ɔ̃ bɛ̀.

²³Kɛ̀ Kuyie mpɛ́nsìrì onìtì borimɛ, kuù ɔ̃ɔ̃ duɔ́ nkòò nkérí kɛ í yĩɛ̃̀kù.

²⁴Kòò do ò bɑ́ nduɔ́, Kuyie nkuù ɔ̃ɔ̃ pĩ́ nho nɔ̀ùtɛ̀ kɛ́yíi.

²⁵Nɛ̀ m bɛmmɛ̀ kɛ yɑ̀ɑ kótɛ́nɛ̀, n yí yɑ̀ Kuyie mbɔntóo dɛ̀ osɑ̀ù, yoo ò yɑɑ̀bí mmúɔ́tɛ dɛ̀ mudiì.

²⁶Osɑ̀ù mɔ̀kɛ mɛsémmɛ̀ mmɛ sɑ̃́ɑ̃̀, kɛ penni o kpɛrɛ bɛtɔbɛ̀, kòo yɑɑ̀bí pɛ́ú dɛ kó mɛsɑ̀ɑ̀.

²⁷Yóu mɛyɛi nkɛ́ndɔɔri mɛsɑ̀ɑ̀, ɑ yɑɑ̀bí bo ḿbo sɑ̃́ɑ̃̀ dihɛì.