YƐSÃÃ 35:2-23

²Ítɛ́ kɛ́túótɛ́ kudɔpìkù kusɑ́m̀pɔ́kù nɛ̀ kudiɛkù. Cómmú kɛ́ n dɛɛtɛ́.

³Youtɛ ɑ kpɑ̃nnì nɛ̀ ɑ cɑ́úkù, kɛ́bɑɑo bɛ̀ɛ̀ n fɛ̃́ũnko. N nɑ́kɛ́ fɔ̃́ɔ̃̀ tumɛ̀ n dɛɛtíwè.

⁴Bɛ̀ɛ̀ dɔ́ kɛ́ n kuɔ ifɛii bɛ̀ pĩ nkɛ̀ bɛ̀ɛ kɛ̃kɛ, bɛ̀ɛ̀ n dɔ́nɛ̀ mɛyɛi, ifɛii bɛ̀ pĩ kɛ̀ bɛ̀ɛ bótí bɛ fɔ̃nkúò,

⁵kɛ́nɑɑ́ ntiyontì kuyɑɑkù tɔ tì. Kuyie ntɔ̃nnìi bɛ̀ bɛ̀ti.

⁶Bɛ cɛɛ nɑɑ́ ndibiìnnì kɛ́ɑnkɛ, kɛ̀ Kuyie ntɔ̃nnì mbɛ̀ bɛ̀tì.

⁷Bɛ̀ sɔ̃̀ńtɛ́ kɛ n dii ticùɔ̀tì nti, kɛ n keù difɔ̃̀tìrì kɛ̀ m bo do kɛ́kú.

⁸Mɛhɑ́ɑ́rìmɛ̀ɛ bɛ̀ dɛ̀ɛ́tɛ́, bɛ̀ɛ tɑ bɛ̀ dìí ntìì cùɔ̀tì miɛkɛ, kɛ́do bɛ̀ keú dìì fɔ̃̀tìrì.

⁹Kɛ̀ diwɛ̀ì ní nni mbo, kɛ̀ nní nyɑ̃nku, Kuyie nni nteenɛ̀mɛ̀ kpɛ́í.

¹⁰N nɑ́ɑ́nnɛ̀ n yɛ̀mmɛ̀ mɛmɔu ndi, kɛ tú òmɔù í dɑ dònnɛ̀ fɔ̃́ nKuyie, fɔ̃́ɔ̃̀ ɔ̃ dɛɛtɛ́nɛ̀ ocĩ̀rì wèè ò kpeńnìnɛ̀, kɛ dɛɛrí osénnìwè nɛ̀ bɛ̀ɛ̀ fèkù o kpɛrɛ.

¹¹Bɛ̀ nɑ̀ɑ́ mbɛ̀ í yɑ̀ tì nti, Bɛ̀ m̀ bèkú nyí yɛ̃́ tì nti.

¹²Kɛ̀ n dɔ̀ɔ̀ri mɛsɑ̀ɑ̀ nkɛ̀ bɛ̀ n dɔ̀ɔ̀ri mɛyɛi, kɛ̀ m bo m mɑ́ɑ̀.

¹³N dootitɔbɛ̀ ɔ̃ mmɔ nkɛ̀ n dɑ́ɑ́tí kufɔ̀ɔ̀tɔ̃̀nkù nku, kɛ́bɛnkɛ n yɛǹcɑɑ̀rìmɛ̀ kɛ́boú dinùù kɛ́kɛ̃́kùnnɛ m mɑ́ɑ̀ kɛ́nsĩ́ĩ́, kɛ́mmbɑ́ɑ́ nKuyie nsɑ̃́ɑ̃̀,

¹⁴kɛ́ndò n nɛ́po yoo n tebitɛ, kɛ̀ n yììkɛ̀ ńsɔ̀ù, kɛ̀ n yɛ̀mmɛ̀ɛ cɑɑ̀rɛ̀ kɛ́ndò n yɔ̃ ku.

¹⁵Kɛ̀ n do dìì mɔ̀nnì bɛ̀ nɛ́ tíí kɛ́ nni ndɑú, kɛ́wɛ̃nnɛ́ kɛ́ nni ndɔɔri mɛyɛi, kɛ̀ bɛpɔ̀ɔ̀bɛ̀ n yí yɛ̃́ bɛ̀ nni nnɑ́ɑ́ ntiyɛiti.

¹⁶Bɛ̀ɛ̀ í dé Kuyie nnɛ̀ bɛ̀ɛ̀ dɑú bɛnìtìbɛ̀ kɛ̀ bɛ̀ wɛ̃nnɛ́ kɛ n dɑú mɛdiɛ̀, kɛ mɑɑ̀ nyɛbìɛ̀ n kpɛ́í.

¹⁷N Yiɛ̀ nKuyie nhɑ yó nni nwúónkomɑɑ̀? N dɛɛtɛ́nɛ̀ bɛ kó kuyonku, bɛ̀ tu yɛcìrícìrɛ̀ nyɛ.

¹⁸M bo ndɑ sɑ̃ntí ditĩ̀nnì cuokɛ̀, kɛ́ ndɑ sɑ̃ntí kubotí diɛkù cuokɛ̀.

¹⁹N dootitɔbɛ̀ bɑ́ nyɑ̃nku n kpɛ́í, bɛ̀ɛ̀ sɔ̃́ntɛ́ kɛ n níí bɛ̀ bɑ́ nni nhũũnnɛ̀ inuɔ.

²⁰Bɛ̀ í nɑ́ɑ́ ndiwɛ̀ì kó tinɑ́ɑǹtì bìtì! Bɛ̀ dɑ̀kii kɛ bo dɔ̀ɔ̀ mɛyɛi mmɛ dihɛì kó bɛnitisɑ̀ɑ̀bɛ̀.

²¹Kɛ ɑɑri tinùùtì kɛ tú: Àɑ̀ ti dɑ yɑ̀mu!

²²N Yiɛ̀ nKuyie nhɑ wúómmu dɛ̀ɛ̀ dɔ̀ɔ̀ri, bɑ́ ncĩ́ɛ̃́kɛ́, bɑ́ n dɛ́tɛ́nɛ̀.

²³Kuyie nyítɛ́ kɛ́ n kónnɛ́! N Yiɛ̀ nKuyie nhentɛ kɛ́kpɑ n kpɑ̀nnì.