YƐSÃÃ 22:1-31

¹Bɛdèmbɛ̀ kóo kótì dìèmmɛ̀ Dɑfiti yɛ̀nfɛ̀ bɛ̀ dìè nfɛ̀ nɛ̀ mɛtɑndɑɑmɛ̀.

²Áú Kuyie! Áú Kuyie! Dɛ̀ yĩ́mɛ kɑ̀ɑ n yóu? Kɛ̀ n kuɔ̀ nkɛ kuɔ̀ mbɑ́ ɑ í n dɛɛrí?

³Kuyie, nh ɔ̃ ntṹṹ nkɛ kuɔ̀mmu kɑ̀ɑ dò nyúó, kɛ̀ nní nyié nkɛ kuɔ̀ mbɑ́ n yí ompu.

⁴Kɛ̀ fɔ̃́ɔ̃̀ nɛ́ tú wèè dò mpɑ́íí, kɛ kɑri ɑ kpɑ̀ɑ̀tìkɑ̀rì kɛ̀ Isidɑyɛɛribɛ dɑ sɑ̃ntí.

⁵Ti yɛmbɛ̀ do duɔ́ nfɔ̃́ nwe bɛmɑ́ɑ̀, bɛ̀ do búɔ́ fɔ̃́ nwe kɑ̀ɑ bɛ̀ dɛɛrí.

⁶Bɛ̀ do ɔ̃ɔ̃ kuɔ́nnɛ̀ fɔ̃́ nwe kɑ̀ɑ bɛ̀ dɛɛtɛ́. Bɛ̀ do ĩkú fɔ̃́ɔ̃̀ ĩ́nkɛ̀ kɑ̀ɑ bɛ̀ dènnìnko ifɛi.

⁷Mí n nɑɑ́ ndibɛù ndi! N tɛ̃́nkɛ í tú onìtì, bɛnìtìbɛ̀ bɛmɔu sɑ̃̀ɑ̃́ mmí nwe, kubotí kumɔu sènkɛ̀rì mí nwe.

⁸Bɛnìtìbɛ̀ bɛmɔu n yɑ̀u kɛ dɑúmu, kɛ cɔ̃́ṹ kɛ́héunko bɛ yɔ.

⁹Kɛ nɑ́ɑ́ n kpɛ́í nkɛ tú: Ò yɛ̃ nhò duɔ́ nhomɑ́ɑ̀ ndi Kuyie, kuù tũntɛ o kpɛti, ò yɛ̃ nkù ò dɔ́mu, kù tũ nhò dɛɛtɛ́.

¹⁰N Yiɛ̀ nKuyie nfɔ̃́ɔ̃̀ n dènnɛní n yɔ̃ pɔutì miɛkɛ, fɔ̃́ɔ̃̀ n duɔ́ nho miɛ̀.

¹¹Bɛ̀ m pɛitɛ́ kɛ n duɔ́ fɔ̃́ nwe, nɛ̀ m pɛitɛ́nímɛ̀, Kuyie nfɔ̃́ɔ̃̀ ǹ te.

¹²Mɛyɛǹcɑɑ̀rìmɛ̀ mɛɛ̀ ǹ tɔ́kɛ́nɛ̀, ɑ bɑ́ n dɛ́tɛ́nɛ̀, òmɔù í bo wèè bo n tee.

¹³Yɛnɑɑdɑkɛ̀ pɛ́u yɛɛ̀ ǹ fitɛ́, Bɑsɑ̃ɑ̃ nɑɑdɑkɛ̀ yɛɛ̀ n cɛ̃̀tinɛ̀.

¹⁴Yɛ̀ ɑ̀ɑ̀tɛ tinùùtì nti kɛ bo m pĩ́, kɛ dò ndicìrícìrì dìì pĩ nkɛ kontí.

¹⁵N wɛ̃rímú muù sũ̀ɔ̃̀too mɛniɛ mbɛ̀ còúmmɛ̀ kɛtenkɛ̀ mɛ kɔ̃mɛ, kɛ̀ n kṹɔ̃̀ bɔ̀kíí, kɛ̀ n kɔ̃m̀bùɔ̀tì yìɛ̀tɛ mɛkùɔ̀ nkɔ̃mɛ.

¹⁶N níí kuù kpeí tiyɑɑ̀kpetì kɔ̃mɛ, kɛ̀ n nɔ́ndɛnfɛ̀ dɑ̀ri n dɑ́ɑndɑɑkù. A n dɔú nkufɔ̃ti bɛ̀nnì ndi.

¹⁷Simɔɔ́ siì n cɛ̃̀ɛ̃̀tɛ kɛ bo n cɑ́ɑ́kɛ́, bɛnitiyɛibɛ bɛɛ̀ n dií kɛ bo m pĩ́, kɛ dùùtɛ n nɑɑ̀cɛ̀i nɛ̀ n nɔu.

¹⁸N yɔ̀kɛ̀ mɛdiɛ̀ mmɛ kɛ̀ n kṹɔ̃̀ feitɛ́. N dootitɔbɛ̀ n wùómmu kɛ m pɑkɛ́,

¹⁹kɛ totí n yɑ̀ɑ̀tì, kɛ tɑ̃ũ tɛ́tɛ́ n yɑɑ̀bòrì.

²⁰Fɔ̃́ nKuyie, nhɑ bɑ́ n dɛ́tɛ́nɛ̀, fɔ̃́ɔ̃̀ tu n wɛ̃rímú, cokɛ́ní mɛcɑ̃ɑ̃ kɛ́ n teennɛ̀.

²¹N dɛɛtɛ́nɛ̀ dikpɑ̀rìsiè, kɛ́ n dɛɛtɛ́nɛ̀ yɛmɔnìì.

²²N dɛɛtɛ́nɛ̀ dicìrícìrì nùù, kɛ́ n dɛɛtɛ́nɛ̀ yɛpɑɑnɑɑdɑyìè. A n teemmu,

²³m bo nnɑ́ɑ́ nhɑ kpɛ́í n kɔbɛ cuokɛ̀, m bo ndɑ sɑ̃ntí ditĩ̀nnì cuokɛ̀.

²⁴Díndi bɛ̀ɛ̀ dé Kuyie, nsɑ̃ntínɛ̀ kù, díndi Sɑkɔbu yɑɑ̀bí dimɔu, ndɛ́úkùnkonɛ̀ ku yètìrì. Díndi Isidɑyɛɛri yɑɑ̀bí dimɔu, nkpeutínɛ̀ ku ììkɛ̀.

²⁵Kù ɔ̃ɔ̃ í n wúónko mɛsémmɛ̀ yiɛ̀ nho sémmɛ̀ miɛkɛ, kù í ò yetírí, kù ɔ̃ɔ̃ í nhò bùtínnɛ́, kòò kù kuɔ́nnɛ̀ kù ɔ̃ɔ̃ kéntɛ́mu.

²⁶M bo ndɑ sɑ̃ntí ditĩ̀nnì diɛrì cuokɛ̀, kɛ́dɔɔ̀ bɛ̀ɛ̀ dɑ dé bɛ cuokɛ̀ m bɛ́i ntì.

²⁷Bɛcĩ̀rìbɛ̀ yóó dimu kɛ́nsɑ̀nnɛ̀, bɛ̀ɛ̀ wɑɑ̀ nKuyie nkɛ̀ bɛ̀ nkù sɑ̃ntí, kɛ́nfòù kɛ́mɔntɛ.

²⁸Itemmɑ̀nkɛ imɔu kɔbɛ yóó dentɛnɛ̀mu Kuyie nkpɛ́í, bɛ̀ wɛ̃tinímu ku borɛ̀, ibotí imɔu kɔbɛ yóó nínkúmu ku ììkɛ̀.

²⁹Kɛ yɛ̃́ ti Yiɛ̀ nKuyie nkuù tumɛ̀ okpɑ̀ɑ̀tì, kuù bɑkɛ́ ibotí imɔu.

³⁰Bɛ̀ɛ̀ duɔ́ kɛtenkɛ̀ miɛkɛ bɛmɔu bɛ̀ yóó kɔ̃nkɛmu ku ììkɛ̀, bɛ̀ɛ̀ kó dimɑ̀ɑ̀ tɑti kudɔnkù bɛ̀ bo nínkú ku ììkɛ̀. Mí n fòù Kuyie nkpɛ́í nkɛ,

³¹kɛ̀ n yɑɑ̀bí yó nkù ntũ̀, kɛ́nɑ́kɛ́ ku kpɛ́í mbɛ bí,