YƐSÃÃ 145:5-18

⁵N yó nnɑ́ɑ́mmú ɑ yetidiɛrì nɛ̀ ɑ kpetì nɛ̀ ɑ sɑ̃nni, n yó nnɑ́ɑ́mmú bɛnìtìbɛ̀ ɑ tɔ̃ndiɛmù kpɛ́í.

⁶Bɛnìtìbɛ̀ yó nnɑ́ɑ́mmú ɑ kpeńnìmɛ̀ kɛ duò tikɔ̃m̀bùɔ̀tì, kɛ̀ mí nní nnɑ́ɑ́ nhɑ dɛumɛ̀.

⁷Bɛ̀ yó ndeninímu ɑ̀ sɑ̀ɑ̀ ndɛumɛ̀, kɛ pĩɛ̃kù ɑ túmɛ̀ timɔ́mmɔnti yiɛ̀.

⁸Ti Yiɛ̀ nKuyie mmɔ̀kɛ onìtì kó mɛsémmɛ̀ mmɛ kɛ sɑ̀, ku miɛkɛ í cɑ̃ɑ̃ kɛ pɛ́íkú kɛ̀ kù ti dɔ́ mɛdiɛ̀.

⁹Ti Yiɛ̀ nKuyie nnìtimu timɔu ti kpɛ́í, kù dɔ́mu mɛdiɛ̀ kù dɔ̀ɔ̀ dɛ̀ dɛmɔu.

¹⁰Ti Yiɛ̀ nKuyie nhɑ dɔ̀ɔ̀ dɛ̀ɛ̀ kó dimɑ̀ɑ̀ yó ndɑ sɑ̃ntímu, bɛ̀ɛ̀ dɔ̀ɔ̀ri ɑ dɔ́ dɛ̀ kɛ̀ bɛ̀ ndɛ́úkùnko ɑ yètìrì.

¹¹Bɛ̀ yó nnɑ́ɑ́mmú ɑ kpɑ̀tì dɛumɛ̀, kɛ́nnɑ́ɑ́ mutɔ̃ndiɛmù ɑ dɔ̀ɔ̀ mù kpɛ́í.

¹²Kɛ̀ dɛ̀ɛ yie nkɛ̀ bɛnìtìbɛ̀ɛ bɑntɛ́ ɑ pĩ́ mmùù tɔ̃ndiɛmù, ɑ kpeńnìmɛ̀ mɛdiɛ̀ nkɛ bɑkɛ́.

¹³A kpɑɑtìrìmu yɛmɔ̀rɛ̀ yɛmɔu, fɔ̃́ɔ̃̀ yó mbɑkɛ́ yɛmɔ̀rɛ̀ yɛmɔu.

¹⁴Ti Yiɛ̀ nKuyie nhɔ̃ ncúɔ́mu bɛ̀ɛ̀ duò, kɛ teénnɛ̀ bɛcĩ̀rìbɛ̀.

¹⁵Bɛnìtìbɛ̀ bɛmɔu bùɔ́ fɔ̃́ nwe, kɑ̀ɑ bo mbɛ̀ duɔ̀ mmudiì dikònnì bɛ̀ bo dìì mɔ̀nnì.

¹⁶Fɔ̃́ɔ̃̀ ɔ̃ɔ̃ yɑnnɛ ɑ nɔ̀ùtɛ̀, bɛ̀ɛ̀ kó dimɑ̀ɑ̀ bo kɛtenkɛ̀ ĩ́nkɛ̀ kɛ̀ bɛ̀ɛ di kɛ́nsɑ̀nnɛ̀.

¹⁷Ti Yiɛ̀ nKuyie nkó icɛ imɔu wetímu, kɛ̀ ku tɔ̃mmú mumɔu tú mɛsɑ̀ɑ̀ nkɔ̃mu.

¹⁸Bɛ̀ɛ̀ yu ti Yiɛ̀ nKuyie nkù ɔ̃ɔ̃ mbɛ̀ tɔ̀kɛ́nɛ̀mu, kù í yóu bɛ̀ɛ̀ kù yunɛ̀ timɔ́mmɔnti.