YƐSÃÃ 145:1-11

¹Disɑ̃nni kó fɛyɛ̀nfɛ̀ Dɑfiti dèntɛ̀ fɛ̀. N yó nsɑ̃ntímu Kuyie nkùù n te, kuù tu n kóo kpɑ̀ɑ̀tì, n yó ndɛ́úkùnkomu ku yètìrì sɑ̃́ɑ̃̀.

²Bɑ́ dìì yiè n yó nkù sɑ̃ntímu, kɛ́dɛ́úkùnko ku yètìrì sɑ̃́ɑ̃̀ nɛ̀ m bo mbomɛ̀.

³Ti Yiɛ̀ nKuyie ndɛumu mɛdiɛ̀ kɛ mɑ̀nnɛ̀ disɑ̃nni, kù dɛumu kɛ í mɔkɛ kumɑ̀nku.

⁴Bɛnìtìbɛ̀ yɛmɔ̀rɛ̀ yɛmɔu kɔbɛ sɑ̃ntímu ɑ tɔ̃ndiɛmù, kɛ yó nnɑ́ɑ́ nhɑ tɔ̃mmú dɛumɛ̀.

⁵N yó nnɑ́ɑ́mmú ɑ yetidiɛrì nɛ̀ ɑ kpetì nɛ̀ ɑ sɑ̃nni, n yó nnɑ́ɑ́mmú bɛnìtìbɛ̀ ɑ tɔ̃ndiɛmù kpɛ́í.

⁶Bɛnìtìbɛ̀ yó nnɑ́ɑ́mmú ɑ kpeńnìmɛ̀ kɛ duò tikɔ̃m̀bùɔ̀tì, kɛ̀ mí nní nnɑ́ɑ́ nhɑ dɛumɛ̀.

⁷Bɛ̀ yó ndeninímu ɑ̀ sɑ̀ɑ̀ ndɛumɛ̀, kɛ pĩɛ̃kù ɑ túmɛ̀ timɔ́mmɔnti yiɛ̀.

⁸Ti Yiɛ̀ nKuyie mmɔ̀kɛ onìtì kó mɛsémmɛ̀ mmɛ kɛ sɑ̀, ku miɛkɛ í cɑ̃ɑ̃ kɛ pɛ́íkú kɛ̀ kù ti dɔ́ mɛdiɛ̀.

⁹Ti Yiɛ̀ nKuyie nnìtimu timɔu ti kpɛ́í, kù dɔ́mu mɛdiɛ̀ kù dɔ̀ɔ̀ dɛ̀ dɛmɔu.

¹⁰Ti Yiɛ̀ nKuyie nhɑ dɔ̀ɔ̀ dɛ̀ɛ̀ kó dimɑ̀ɑ̀ yó ndɑ sɑ̃ntímu, bɛ̀ɛ̀ dɔ̀ɔ̀ri ɑ dɔ́ dɛ̀ kɛ̀ bɛ̀ ndɛ́úkùnko ɑ yètìrì.

¹¹Bɛ̀ yó nnɑ́ɑ́mmú ɑ kpɑ̀tì dɛumɛ̀, kɛ́nnɑ́ɑ́ mutɔ̃ndiɛmù ɑ dɔ̀ɔ̀ mù kpɛ́í.