YƐKOTINƆ̀ 7:7-22

⁷kɛ́yɑ̀ idɑpùmbí, ìì í yɛ̃́ dɛ̀mɑrɛ̀, i miɛkɛ kɛ̀ dɛ̀mɑrɛ̀ tu kuyɛìnkù.

⁸Kɛ̀ dɛ̀ ncèntì dihɛì bɛnitipòbɛ̀ bɛ̀ɛ̀ dɔuti dɔutinɛ̀ bɛnitidɑɑbɛ̀ kó dikɑ̀rì, kɛ́tũnnɛ òmɔù cĩ́ɛ̃̀tɛ̀ kó kucɛ.

⁹Kɛ sɔ̃́ ndɛ dò ndiúríkɛ̀pɑ̀nnì, kɛ yuotóo kɛ bo kɛ biiri.

¹⁰Kòo ítɛ́ní kóò co kɛ bo ò ciitɛ́ kɛ sɑ̃̀ri onitipòkù wèè dɔuti dɔutinɛ̀ bɛnitidɑɑbɛ̀ o kɔ̃mɛ.

¹¹Kòo nɔ̀nfɛ̀ tònnì, kòo kɔ̃̀ntì yɑ̀ùti, bɑ́ ò í kɑrì o cĩ́ɛ̃̀tɛ̀,

¹²kɛ firì dihɛì, yɑɑ́rɛ̀bɛ̀ nɛ̀ sicɛ̃kɑɑ simɔu, kɛ wɑnti bɛnitidɑɑbɛ̀.

¹³Kòo pĩ́ ndɛ kóo dɑpɑ̀ɑ̀, kóò ɔrí bɑ́ ò í dé,

¹⁴kɛ dɔ̀: N sòò bɛ́i ndinùù mɑrì ndi Kuyie nyììkɛ̀ kɛ dì dɛ̀itɛ yíe.

¹⁵Dɛɛ̀ te kɛ̀ n yɛ̀nní ɑ wɑmmù kɛ mɛ ndɑ yɑ̀.

¹⁶M pitɛ́mu n dɔ́ù ĩ́nkɛ̀ tiyɑ̀ɑ̀tì kɛ dì sɑ̃̀ri Esibiti kó tiyɑɑ̀yɔ́ntì,

¹⁷kɛ dì yɔɔrɛ tùdɑ̀ɑ̀ríbɛ̀ bɛbotí bɛbotí.

¹⁸Kɔtɛní kɛ̀ tí nyié nkɛ yo nkunɑɑtí kɛ dɔɔri ti dɔ́mɛ̀ kɛ̀ dɛ̀ɛ wentɛ́nɛ̀.

¹⁹N dɔù ìtɛ́mu kɛ kɔ̀tɛ kupɔ̀ɔ̀kù dɛdɛ́tirɛ̀.

²⁰Ò tɔmu kudɔukù nɛ̀ idíítí ò í yóó konní kòo tɑ̃̀nkù pɑ̀nwè í yɛ̀nní.

²¹Kòo ò kpɛ̀ntɛ̀ kpɛ̀ntɛ̀ nɛ̀ kunùnɑɑtí.

²²Dɛndɛ kòo ò tũ̀nnɛ, kɛ́ndò mbɛ̀ kɔ̀rinɛ̀ fɛ̀ɛ̀ nɑ̀ɑ̀fɛ̀ mukɔ̀ù, kɛ dò mbɛ̀ boú kuwɑ́ɑ́tíkù kɛ bo puotí, kɛ kù tɑ̃ kɛ tɑ ku dinni, kɛ dò ntɛnɔ̀tɛ̀ ɔ̃ ntɑtimɛ̀ nticùɔ̀tì kɛ dɔ́ mɛcɑ̃ɑ̃. Bɑ́ ò í yɛ̃́ kɛ tú dɛ̀ yóó kṹntɛ́ o fòmmu.