YƐKOTINƆ̀ 21:3-30

³A bo ndɔɔrimɛ̀ dɛ̀ɛ̀ wenni kɛ síɛ́, Kuyie ndɛ ndɔ́, kɛ̀ dɛ̀ pɛ̃ɛ̃tɛ́ ɑ bo kù fìémɛ̀ iwũɔ̃.

⁴Tɛpɔ̀tɛ̀ nɛ̀ tɛfentɛ̀ dɛɛ̀ feinko bɛnitiyɛibɛ kó mɛyɛi.

⁵Wèè pĩ́ mmutɔ̃mmú nɛ̀ tikɔ̃nyɑuti weè piɛti tikpɑ̀tì, wèè dɔ́ mɛcɑ̃ɑ̃ nkòò nɑɑ̀ nfɛdɑwɑnfɛ̀.

⁶Wèè wɑɑ̀ ntikpɑ̀tì nɛ̀ siyɑ́ɑ̀bìsí dɛ̀ í mɔkɛ mucɔ̃́ntimu dɛ̀ kɔ̀rìnɛ̀ mukṹṹ mmu.

⁷Onitiyɛiwe yɛi mmɛɛ̀ ɔ̃ɔ̃ ò kùɔ kɛ yɛ̃́ ò yetɛmɛ̀ ò bo dɔɔ̀mɛ̀ dɛ̀ɛ̀ sìɛ́.

⁸Onitiyɛiwe tũ nkùù cɛ í wenni, kòo nitisɑ̀ù borimɛ wenni.

⁹A bo mbomɛ̀ difii kɛ kpɛ̃nkɛ́ dɛ̀ tɔ̃ũnɛ̀ ɑ bo nhɑ̃nɛ̀mɛ̀ onitipòkù yɛkpɑ̀rɛ̀ yiɛ̀.

¹⁰Onitiyɛiwe dɔ́ mɛyɛi mmɛ nɛ̀ o yɛ̀mmɛ̀ mɛmɔu ò ɔ̃ɔ̃ í ncĩ̀ɛ̃́ mbɑ́ o nɛ́po.

¹¹Kɑ̀ɑ puotí tɛpɔ̀tɛ̀ yiɛ̀ nkuyɛìnkù ɔ̃ɔ̃ ciitɛ́mu, wèè mɔ̀kɛ mɛyɛ̀mmɛ̀ kòò yɛ̀útí mɛciì nnɛ̀ itié mbɛ̀ ò duɔ́ nyì miɛkɛ.

¹²Kuyie ndɔ́ dɛ̀ɛ̀ wenni dɛ̀ndɛ, kù wùómmu dɛ̀ɛ̀ dɔɔri bɛnitiyɛibɛ cɛ̃́ĩ, kɛ bɛ̀ tɑnnìnko mɛyɛi mmiɛkɛ.

¹³Kòo cĩ̀rì kuɔ̀ nkɑ̀ɑ cĩ̀ɛ̃́kɛ́, ɑ múnkɛ nɑɑ bo nkuɔ̀ nkɛ̀ bɛ̀ cĩ̀ɛ̃́kɛ́mu.

¹⁴Disɔ̀rì kó dipɑ̃nnì bónkùnko kɛmiɛkɛ, kɛ̀ dipɑ̃nnì dìì bɑ̀ńnɛ́ kɛ cũɔ̃́ diyɔ̀rì kɛ̀ dì kɔ̀ù kɛmiɛkɛ diɛkɛ̀.

¹⁵Onitisɑ̀ù ɔ̃ ndɔɔri ikuɔ́ yɛ̃mmɛ̀ kɛ̀ dɛ̀ ò nɑɑtimu, kɛ dò nkuyonku onitiyɛiwe borɛ̀.

¹⁶Onìtì wèè yóu mɛciì nkó kucɛ ò bo nɛinɛ̀ bɛcíríbɛ̀ bɑ̀mbɑ̀.

¹⁷Wèè dɔ́ kutenkù kó diwɛ̀ì ò bɑ́ɑ́ mɔɔtɛ o kpɛrɛ, wèè dɔ́ mɛnɑɑ̀ nnɛ̀ imɑɑ nhò bɑ́ɑ́ kpɑrìkɛ̀.

¹⁸Bɛnitiyɛibɛ bɛ̀ɛ̀ í mɔkɛ bɛ̀ tũ ndɛ̀ bɛ̀ bo yɑ̀ mɛyɛi, bɛsɑ̀ɑ̀bɛ̀ í yóó yɑ̀ mɛ̀.

¹⁹A bo nhɑ̃mɛ̀ tɛdɔntɛ̀ ĩ́nkɛ̀ dɛ̀ tɔ̃ũnɛ̀ ɑ bo nhɑ̃nɛ̀mɛ̀ onitipòkù yɛkpɑ̀rɛ̀ yiɛ̀ nwèè miɛkɛ pɛ́íkú mɛcɑ̃ɑ̃.

²⁰Mɛciì nyiɛ̀ nweè mɔ̀kɛ tikpɑ̀tì nɛ̀ dɛsɑ̀ɑ̀rɛ̀ o cĩ́ɛ̃̀tɛ̀, kɛ̀ kuyɛìnkù dɛ̀ cɑ̀ɑ̀ri dɛmɔu.

²¹Wèè dɔ̀ɔ̀ri dɛ̀ɛ̀ sìɛ́ kɛ niti ò ɔ̃ nfòù kɛ́mɔntɛmu kɛ̀ bɛ̀ ò dɔ̀ɔ̀ri mɛsɑ̀ɑ̀ nkoò dé.

²²Mɛciì nyiɛ̀ mbo nɑ kɛ́pi dihɛikperì bɛ̀ bɑ̀ɑ dì, kɛ́pɔntɛ bɛ yɛ̀mmɛ̀ do dò ndɛ̀ɛ̀ bɛ̀ kɑ̃nkɛ́.

²³Wèè yɛ̃́ ò nɑ̀ɑ́ nkɛ túmu weè yennínɛ̀ mɛyɛi.

²⁴Wèè mɔ̀kɛ tɛpɔ̀tɛ̀ nɛ̀ tɛfentɛ̀ ò ɔ̃ ndɑú bɛtɔbɛ̀ mbɛ kòo kpɛrɛ dɛmɔu tu tɛfentɛ̀ kpɛrɛ.

²⁵Otɔ̃nnɛ́díétì ɔ̃ ndɛ̀ yɑ̀ɑ́mmu dɛmɔu kɛ yɑ̀ɑ kúnɛ̀, kɛ yɛ̃́ o nɔ̀ùtɛ̀ í dɔ́mɛ̀ kɛ pĩ́ mmutɔ̃mmú.

²⁶Wenwe ɔ̃ ndɛ̀ dɔ́mu dɛmɔu, kòo nitisɑ̀ù yie níí pɑ̃ kɛ bɑ́ɑ́ súɔ́ ndɛ̀mɑrɛ̀ omɑ́ɑ̀.

²⁷Kuyie nyí dɔ́ bɛnitiyɛibɛ kó yɛpɑ̃rɛ̀, bɛ̀ yɛ̀ pɑ̃ɑ̃nnɛ̀ mɛyɛ̀mmɛ̀ yɛimɛ mmɛ.

²⁸Wèè soú nkɛ nɑ́ɑ́ nhò í yɑ̀ dɛ̀ ò í yóó nhɑ̃ kɛ bo. Wèè kèḿmú tinɑ́ɑǹtì weè mɔ̀kɛ ò nɑ̀ɑ́ ntì sɑ̃́ɑ̃̀.

²⁹Onitiyɛiwe ɔ̃ ntɑ̃́ omɑ́ɑ̀ ndi kòo nitisɑ̀ù tũ̀nni o fòmmu mɛsɑ̀ɑ̀.

³⁰Onìtì í mɔkɛ mɛciì mmɑmɛ̀ yoo mɛyɛ̀mmɛ̀ mɑmɛ̀ yoo iyɛntotí mɑì Kuyie mborɛ̀.