YƐKOTINƆ̀ 18:7-21

⁷Kuyɛìnkù nùù diì kù buɔ̀ nkɛ̀ ku nɑ́ɑǹtì kù pĩĩ timɑ́tì kɔ̃mɛ.

⁸Onɑ́ɑntɔutì nɑ́ɑǹtì ɔ̃ ndò mmucekɔ̀yuo mmu, kɛ wɛɛti kɛ cuutoo tipɔutì miɛkɛ.

⁹Wèè í pĩ́ nho tɔ̃mmú ò í cɑ̃́ɑ̃́nnɛ̀ wèè mù cɑ̀ɑ̀ri.

¹⁰Kuyie nyètìrì kpeńnì kɛ dò nkuduotí kperíkù nku, bɛ̀ɛ̀ borimɛ wenni bɛ̀ ɔ̃ɔ̃ sɔri kuù borɛ̀ kɛ bɑ́ nyĩɛ̃̀kù.

¹¹Tikpɑ̀tì yiɛ̀ nkpɑ̀tì tiì tu o kó disɔ̀rì, o yɛ̀mmɛ̀ dò ntiì ò kɑ̃nkɛ́ kuduotí kɔ̃mɛ.

¹²Tɛpɔ̀tɛ̀ tɛɛ̀ ɔ̃ɔ̃ niitɛ́ní kɛ́cɑɑ̀rɛ̀ onìtì, wèè kɛ̃́kùnnɛ omɑ́ɑ̀ kòo dɛukɛ.

¹³Wèè ɔ̃ɔ̃ tɛ̃́nnɛ́ tinɑ́ɑǹtì kɛ mu nyí tì kèè mɛsɑ̀ɑ̀ nhò yɛimmu kɛ ɑ̃ɑ̃̀ omɑ́ɑ̀ ifɛi.

¹⁴Kɑ̀ɑ mɔ nkɑ̀ɑ yɛ̀mmɛ̀ cɑɑ́nnì dɛ̀ ɔ̃ɔ̃ dɑ teennɛ̀mu, kɑ̀ɑ yɛ̀mmɛ̀ mɛ ncɑ̀ɑ̀rɛ̀ bɑ mbo nɑ kɛ́ mɛ̀ cɑ́tinnɛ?

¹⁵Mɛciì nyiɛ̀ nhɔ̃ nwɑnti kɛ yĩ́ɛ̃́tɛ́mu, wèè mɔ̀kɛ mɛyɛ̀mmɛ̀ kòò kemmu itié.

¹⁶Ticuuti ɔ̃ɔ̃ kpetɛ́ onìtì nwe kucɛ, kòo nɑ kɛ́tuɔkɛ bɛnitidiɛbɛ̀ borɛ̀.

¹⁷Wèè niitɛ́ kɛ beé nho kpɛti weè ɔ̃ ndò nhò nɑɑti, yóu kòo dootitɔù tuɔkɛní kɑ̀ɑ yɑ̀.

¹⁸Kɛ̀ di tɑ̃ũ tɛ́tɛ́ dɛ̀ bo nɑ kɛ́pɑɑ ndikpɑ̀nnì, kɛ́pɑtɛ bɛkperíbɛ̀.

¹⁹Bɛ̀ cɑ̀ɑ̀rɛ̀ wè ɔ̃ nkpeńnìmu kɛ́pɛ̃ɛ̃tɛ́ dihɛikperì, kɛ̀ yɛkpɑ̀rɛ̀ kpeńnì kɛ pɛ̃ɛ̃tɛ́ dimɑ́tìkpetínnì.

²⁰Nɛ̀ onìtì nɑ́ɑǹtì miɛkɛ nkɛ ò piɛtimɛ̀ mudiì, o nùù diì te kòò yo.

²¹Onìtì nɑ́ɑǹtì bo nte kòò nfòù yoo tì nte kòo kú, wèè nɔnnɛ̀ tinɑ́ɑǹtì ò yóó yɑ̀mu dɛ kó mucɔ̃́ntimu.