YƐKOTINƆ̀ 16:3-26

³A dɔ́ kɛ́dɔɔ̀ tì, duɔ́ nti Kuyie nhɑ bo yɑ̀ tì dɔ̀ɔ̀mɛ̀.

⁴Kuyie ndɔ̀ɔ̀ bɑ́ dɛ̀ kɛ yɛ̃́mu kù dɛ̀ dɔ̀ɔ̀ mùù kpɛ́í, bɑ́ onitiyɛiwe kù ò dɔ̀ɔ̀ diyiè yɛiri kpɛ́í nkɛ.

⁵Kuyie nyí dɔ́ sifeí yɛmbɛ̀ kù yóó bɛ̀ kpetínnɛ́mu.

⁶Mɛsɑ̀ɑ̀ nnɛ̀ timɔ́mmɔnti dɛɛ̀ tũ̀nni mɛyɛi, kɑ̀ɑ dé Kuyie nhɑ ɔ̃ɔ̃ yóumu mɛyɛi.

⁷Kɛ̀ Kuyie mpɛ́nsìrì onìtì borimɛ bɑ́ o dootitɔbɛ̀ bɛ̀ ɔ̃ɔ̃ ò nɑrikɛnɛ̀mu.

⁸Kɑ̀ɑ dɔ̀ɔ̀ri dɛ̀ɛ̀ wenni kɛ pɛ̀tɛ́ sɑ́m̀pɔ́ dɛ̀ tɔ̃ũnɛ̀ ɑ bo dɔɔ̀mɛ̀ dɛ̀ɛ̀ í wenni kɛ́pɛ́tɛ́ mɛdiɛ̀.

⁹Onìtì ɔ̃ nwúómmu ò yóó dɔɔ̀ tì kɛ̀ Kuyie nkuù nɛ́ nte kòò tì dɔ̀ɔ̀.

¹⁰Okpɑ̀ɑ̀tì bekùnɛ̀ Kuyie nkó muwɛ̃rímú mmu ò ɔ̃ɔ̃ í nyetɛ́ o beéntì miɛkɛ.

¹¹Kuyie ndɔ́ tí mbeú kɛ̀ dɛ̀ wennimu, kuù ɑ̃nnɛ́ tɛbiètɛ̀ ti bo mbeú mɛ̀ɛ̀ botí.

¹²Okpɑ̀ɑ̀tì í dɔ́ bɛ̀ɛ̀ dɔɔ̀rìmɛ̀ í wenni, wèè dɔ̀ɔ̀ri dɛ̀ɛ̀ wenni weè kpɑ̀tì ɔ̃ nfííkú.

¹³Okpɑ̀ɑ̀tì dɔ́ wèè nɑ̀ɑ́ wènwe weti weti, kɛ dɔ́ wèè nɑ̀ɑ́ ntimɔ́mmɔnti.

¹⁴Kòo kpɑ̀ɑ̀tì miɛkɛ pɛikɛ ò bo nɑ kɛ́kuɔ onìtì, mɛciì nyiɛ̀ nweè bo nɑ kɛ́bónkùnnɛ okpɑ̀ɑ̀tì miɛkɛ.

¹⁵Okpɑ̀ɑ̀tì wɛ̀ì duɔ̀ mmufòmmu mmu, kòò dɔ̀ɔ̀ri mɛ̀ɛ̀ sɑ̀ɑ̀ ndò nfɛtɑboofɛ.

¹⁶A bo mmɔkɛmɛ̀ mɛyɛ̀mmɛ̀ dɛ̀ tɔ̃ũnɛ̀ ɑ bo mmɔkɛmɛ̀ mɛsɔɔ, kɑ̀ɑ bo nciìmɛ̀ tɔ̃ũnɛ̀ ɑ bo mmɔkɛmɛ̀ idíítí.

¹⁷Bɛnitisɑ̀ɑ̀bɛ̀ yennínɛ̀mu mɛyɛi nkó kucɛ, wèè dɑ̀kɛ o borimɛ kpɛ́í nhò dɔ́ o fòmmu mmu.

¹⁸Tɛpɔ̀tɛ̀ tɛɛ̀ ɔ̃ɔ̃ niitɛ́ kɛ́pĩ́ nhonìtì kóo cɑ̀kɛ, tɛfentɛ̀ tɛɛ̀ ɔ̃ɔ̃ niitɛ́ kɛ pĩ́ nhonìtì kòo do.

¹⁹A bo nwɛ̃nnɛ́mɛ̀ bɛnitisɑ̀ɑ̀bɛ̀ kɛ kpɑ ɑ kpɛrɛ dɛ̀ tɔ̃ũnɛ̀ ɑ bo wɛ̃nnɛ́nɛ̀mɛ̀ sifeí yɛmbɛ̀ kɛ̀ dí totí bɛ̀ ɛí dɛ̀.

²⁰Kɑ̀ɑ totí ɑ yɛ̀mmɛ̀ mɛsɑ̀ɑ̀ nkɛ dɔ̀ɔ̀ dɛ̀mɑrɛ̀ ɑ bo yɑ̀ diwɛ̀ì, wèè duɔ́ nhomɑ́ɑ̀ Kuyie ndɛ̀ bo nhò nɑɑti.

²¹Wèè nɑ̀ɑ́ ntinɑ́ɑǹtì tìì wenni bɛ̀ we ntú mɛciì nyiɛ̀, wèè nɑ̀ɑ́ ntinɑ́ɑnnɑtì bɛ̀ yìé nweè kpɛti.

²²Bɛ̀ɛ̀ mɔ̀kɛ mɛciì mɛ̀ bɛ̀ duɔ̀ mmufòmmu mmu, kɛ̀ kuyɛìnkù yɛìntì kù kɔ̀ù.

²³Mɛciì nyiɛ̀ nhɔ̃ɔ̃ totí o yɛ̀mmɛ̀ mmɛ kɛ bɛ́i nkɛ̀ bɛ̀ mɛ nyié nho nɑ́ɑǹtì.

²⁴Tinɑ́ɑǹnɑtì dònnɛ̀ mɛcekùɔ̀ mmɛ kɛ wɛɛti dinùù, kɛ duɔ̀ nkukɔ̃ǹnɑɑtí.

²⁵Onìtì yɛ̀mmɛ̀ ɔ̃ ndò nho borimɛ wennimu kɛ̀ mɛ̀ nɛ́ ò kɔ̀rinɛ̀ mukṹṹ.

²⁶Dikònnì diì ɔ̃ nte kòo nìtìi pĩ́ mmutɔ̃mmú, kɛ yɛ̃́ ò dɔ́mɛ̀ kɛ́di.