YƐKOTINƆ̀ 13:2-18

²Onitisɑ̀ù nɑ́ɑǹtì ò pɛí mɛsɑ̀ɑ̀ mmɛ, kòo yɛiwe ɔ̃ nwɑnti kɛ́dɔɔ̀ mɛyɛi.

³Wèè yɛ̃́ ò nɑ̀ɑ́ nkɛ tú mù weè kɑ̃nkɛ́ o fòmmu, wèè í yɛ̃́ ò nɑ̀ɑ́ nkɛ tú mù kòò cɑ̀ɑ̀ri o kɔ̃mu.

⁴Otɔ̃nnɛ́díétì í pɛ́ú ò dɔ́ dɛ̀, wèè dɔ́ mutɔ̃mmú weè dɛ̀ piɛti.

⁵Onitisɑ̀ù í dɔ́ siyɑ́ɑ̀bìsí, kòo nitiyɛiwe cɑɑ̀ri kɛ ɑ̃ɑ̃̀ omɑ́ɑ̀ ifɛi.

⁶Wèè dɔ̀ɔ̀ri mɛsɑ̀ɑ̀ mmɛ ɔ̃ nhò kɑ̃nkɛ́mu, kòo nitiyɛiwe yɛi nhò fétìnko.

⁷Bɛ̀mɑbɛ̀ ɔ̃ ndɔɔri kɛ dò mbɛ̀ kpɑ̀ɑ̀tirì bɑ́ bɛ̀ nɛ́ í mɔkɛ dɛ̀mɑrɛ̀, kɛ̀ bɛtɔbɛ̀ ndɔɔri kɛ dò mbɛ̀ tu bɛcĩ̀rìbɛ̀ kɛ̀ nɛ́ mɔkɛ dɛmɔu.

⁸Tikpɑ̀tì yiɛ̀ nhɔ̃ɔ̃ yietí mɔ̀nnì mɑrì kɛ́dɛɛtɛ́ o fòmmu, ocĩ̀rì yie í yĩɛ̃̀kù tìmɑtì.

⁹Onitisɑ̀ù dònnɛ̀ fìtírɛ̀ dɛ̀ɛ̀ cɔ̀ú dɛ̀ndɛ, kòo yɛiwe dònnɛ̀ fìtírɛ̀ dɛ̀ɛ̀ ku.

¹⁰Tɛpɔ̀tɛ̀ yiɛ̀ nce nyɛkpɑ̀rɛ̀ nyɛ, wèè ciì kòò yìé nyitié.

¹¹Bɛ̀ wɑɑ́ ntìì kpɑ̀tì pɛ́u dimɔ̀nnì dimɑ́ɑ̀ tì dèu mɛcɑ̃ɑ̃ mmɛ, bɛ̀ wɑɑ̀ ntì sɑ́m̀pɔ́ sɑ́m̀pɔ́ tiì dɛ̀úkú.

¹²Kɑ̀ɑ kèḿmú dɛ̀mɑrɛ̀ kɛ mɔntɛ́ dɛ̀ cɑ̀ɑ̀ri mɛyɛ̀mmɛ̀ mmɛ, kɑ̀ɑ dɔ́ dɛ̀mɑrɛ̀ kɛ dɛ̀ pɛ̀tɛ́, dɛ̀ duɔ̀ mufòmmu mmu.

¹³Wèè yetɛ itié nhò bo yɑ̀ dɛ kó tiyeti, wèè yetɛ ikuɔ́ kòo yɑ̀ dɛ kó mucɔ̃́ntimu.

¹⁴Mɛciì nyiɛ̀ nkó itié nyiì duɔ̀ mmufòmmu, kɛ dɛɛrí onìtì nɛ̀ dɛ̀ɛ̀ nɑ nhò tɔní mukṹṹ.

¹⁵Bɛ̀ dému mɛciì nyiɛ̀, kòo nitiyɛiwe borimɛ yóù.

¹⁶Mɛciì nyiɛ̀ nhɔ̃ɔ̃ totí o yɛ̀mmɛ̀ mmɛ kɛ́dɔɔ̀ tìmɑtì, kɛ̀ kuyɛìnkù bɛnkú ku yɛìntì.

¹⁷Ditɔ̃nnì yɛiri wɑɑ̀ mɛyɛi mmɛ, kɛ̀ ditɔ̃nnì sɑ̀ɑ̀rì tì tũ̀nni.

¹⁸Wèè yetɛ itié nhò yóó nɑɑ́ nfɛdɑwɑnfɛ̀ nfɛ kɛ̀ bɛ̀ɛ ò sènkɛ̀rì, wèè yie nyitié kɛ̀ bɛ̀ɛ ò sɑ̃ntɛ.