1Wèè dɔ́ kɛ́ciitɛ́ weè yie nyitié, kuyɛìnkù kuù í kemmu itié.
2Kuyie nhɔ̃ɔ̃ pɛ́nsìrì wèè dɔɔ̀rìmɛ̀ wenni wènwe, kɛ́bekɛ́nɛ̀ wèè yɛ̀mmɛ̀ í wenni.
3Òmɔù ɔ̃ɔ̃ í nfìí nhomɑ́ɑ̀ nɛ̀ kuyonku, wèè dɔ̀ɔ̀ri Kuyie ndɔ́mɛ̀ weè ɔ̃ nfííkú.
4Onitiposɑ̀ù duɔ̀ nho dɔù nwe kuyɛǹnɑɑtí, kòo yɛiwe do mmumɔmmú mùù cɑ̀ɑ́ nho dɔù.
5Bɛnitisɑ̀ɑ̀bɛ̀ kó mɛyɛ̀mmɛ̀ tu mɛsɑ̀ɑ̀mɛ̀ mmɛ, kɛ̀ bɛyɛibɛ kɔ̃mɛ tú mɛ̀ɛ̀ ɔ̃ ndɔ́ kɛ́ciitɛ́.
6Bɛyɛibɛ nɑ́ɑǹtì tu didíiǹtɑ̃́rì ndi dìì kɔ̀ù, kɛ̀ bɛsɑ̀ɑ̀bɛ̀ kpɛti tú tìì dɛɛrí bɛtɔbɛ̀ nɛ̀ mukṹṹ.
7Kɛ̀ bɛnitiyɛibɛ do bɛ kpɛrɛ mɑrɛ̀ ɔ̃ɔ̃ í nkpɑɑ́, bɛsɑ̀ɑ̀bɛ̀ cɛ̃́ĩ siì ɔ̃ nfííkú teii.
8Bɛ̀ sɑ̃ntí wèè ciì wènwe, kɛ sɑ̃́ɑ̃́ nkuyɛìnkù.
9A bo mmɔkɛmɛ̀ otɔ̃ntì òmɑ́ɑ̀ dɛ̀ tɔ̃ũnɛ̀ ɑ bo dɛ́úkùnnɛmɛ̀ ɑmɑ́ɑ̀ kɛ mɔ́ntɛ́ mudiì.
10Onitisɑ̀ù ɔ̃ ndɑkɛmu o wũɔ̃ kpɛ́í, kòo yɛiwe miɛkɛ ì cɔ̀ú.
11Wèè kuuti kupɑku weè mɔ̀kɛ tidiitì, wèè firì dɛtetìrɛ̀ ò í ciì.
12Bɛnitiyɛibɛ dɔ́ mucɔ̃́ntimu yɛimu mmu, bɛnitisɑ̀ɑ̀bɛ̀ bɛɛ̀ ɔ̃ɔ̃ cɔ̃ntɛ.
13Onitiyɛiwe nɑ́ɑǹtì ò pĩĩ mmu, kòo sɑ̀ù ɔ̃ɔ̃ yɛ̀ bɑ́ tìì miɛkɛ.
14Onìtì piɛti mɛsɑ̀ɑ̀ nho nɑ́ɑǹtì miɛkɛ nkɛ, bɛ̀ piɛti mɛ̀ɛ̀ botí mucɔ̃́ntimu mutɔ̃mmú miɛkɛ.
15Kuyɛìnkù yɛ̀mmɛ̀ ɔ̃ ndo nkù dɔ̀ɔ̀ri dɛ̀ wennimu, wèè ciì kòò yìé nyitié.
16Kuyɛìnkù kuù miɛkɛ cɔ́ú mmɛcɑ̃ɑ̃, wèè ciì kòò sɔ̀rì o miɛkɛ.
17Wèè nɑ̀ɑ́ ntimɔ́mmɔnti weè tũ̀nni tinɑ́ɑǹtì, wèè nɑ̀ɑ́ nsiyɑ́ɑ̀bìsí kòò tì cɑ̀ɑ̀ri.
YƐKOTINƆ̀ 12
YƐKOTINƆ̀ 12:1-17