Yɛbəc 7:5-47

⁵Kanu kənasɔŋ fɛ Abraham kɛ atɔf ŋaŋɛ, ali dəkəcəmbər kəcək, mba kənalɛkɛ kɔ temer kədesɔŋ kɔ ŋi kəbəp kəbənda ka dokom dɔn kɔ nkɔn eŋcepər-ɛ, mba tɛm tatɔkɔ ta ɛntayɔ wan-ɛ.

⁶Kɔ Kanu kəloku Abraham ntɛ: «Kəbənda ka dokom dam kəndeyi decikəra atɔf ŋɔlɔma. Andekɔ-cəmbər ŋa di dacar, patɔrəs ŋa meren masar maŋkəlɛ (400).

⁷Mba afum aka atɔf ŋaŋɔkɔ ŋandekɔ-cəmbər ŋa dacar mɔ, in’ endekɔ-bocər ŋa kiti. Kɔ teŋcepər-ɛ, ŋandewur ŋadekor-kor im nnɔ kəfo kaŋkɛ.»

⁸Ntɛ tatɔkɔ teŋcepər mɔ, kɔ Kanu kəŋcaŋəs kiyi kɔn tetin kɔ Abraham, ti tɔyɔnɛ kəmɛŋkərnɛ ka kəkəŋc arkun. Ti disrɛ kɔ Abraham oŋkom Isiyaka, k’ɛŋkəŋc kɔ tataka tɔn ta camət-maas. Itɔ Isiyaka ɛnayɔ sɔ Yakuba, kɔ Yakuba ɔyɔ sɔ ti awut ɔn arkun wəco kɔ mɛrəŋ, aŋɛ ŋayɔnɛ cas ca cusuŋka wəco kɔ mɛrəŋ ca Yisrayel mɔ.

⁹Ntɛ atem asu, awut a Isiyaka, ŋanayɔnɛ wɛŋc kəŋan Isifu kəraca mɔ, kɔ ŋaŋcaməs kɔ ntɛ tɔŋsɔŋɛ pakekərɛ kɔ Misira mɔ. Mba Kanu kənayi kɔ Isifu,

¹⁰kənayac kɔ pəcuca fəp. Kanu kəŋc-mar Isifu, kəc-sɔŋ kɔ kəcərɛ kəkɔt nde Firawona wəbɛ ka Misira fɔr kiriŋ. Firawona ɛnasɔŋ Isifu dekiriŋ da Misira kɔ da kəlɔ kɔn disrɛ fəp mɔ.

¹¹Kɔ dor dɔpɔŋ dende deyi Misira fəp kɔ atɔf ŋa Kanahan. Pəcuca pɛnabɛk, atem asu ŋaŋc-sɔtɔ fɛ yeri.

¹²Kɔ Yakuba ende pəne a cəgbay cəyi Misira, k’osom tɔcɔkɔ-cɔkɔ awut ɔn aŋɛ ŋantəŋnɛ atem asu mɔ.

¹³Ta mɛrəŋ, kɔ Isifu owurərnɛ awɛŋc ɔn, ntɛ tɔ kɔ Firawona ɔsɔtɔ kəcərɛ oŋ akomɛnɛ a Isifu.

¹⁴Kɔ Isifu osom awɛŋc ɔn a pakɛrɛ kɔ kas Yakuba, kəlɛkɛnɛ ka afum ɔn fəp, aŋɛ ŋaŋc-bəp afum wəco camət-mɛrəŋ kɔ kəcamət (75) mɔ.

¹⁵Kɔ Yakuba ontor atɔf ŋa Misira. Difɔ ɛnafi, kɔ atem asu alɔma.

¹⁶K’aŋkekərɛ cəbel cəŋan Səkɛm, k’aŋkɔ pawup nde kufu nkɛ Abraham ɛnawayɛ pəsam nnɔ kusuŋka ka Hamɔr kəyi mɔ.

¹⁷Tɛm ntɛ pənamar a Kanu kəlas temer ntɛ kənalɛkɛ Abraham mɔ tɛnalɔtərnɛ. Kɔ dokombəra dɛmbɛk, kɔ afum ŋaŋla oŋ kəla dəm Misira,

¹⁸haŋ kɔ wəbɛ wəlɔma ender pəndɛ dɛbɛ da atɔf ŋaŋɔkɔ nwɛ ɛnatɔ-cərɛ Isifu mɔ.

¹⁹Wəbɛ wəkakɔ ender pəc-nɛmpəs, pəc-tɔrəs atem asu. K’ende pəsɔŋɛ ŋa kəsak cənaka cəŋan, ntɛ tɔŋsɔŋɛ ta akakɔ ŋantam kəyi doru mɔ.

²⁰Tɛm tatɔkɔ t’ anakom Musa, nwɛ ɛnabɔt Kanu kənəŋk mɔ. K’antɔmpər kɔ yof maas nde kəlɔ ka kas disrɛ,

²¹mba ntɛ tɔyɔ tɛnatɔyi mɛnɛ kəgbal kɔn mɔ, kɔ wan ka wəbɛ ka Misira wəran efir kɔ, k’ɔŋkɔ pədusum pəyɔ kɔ wan.

²²Kəcərɛ kəkɔt fəp k’ aMisira k’ anadusumɛ Musa, k’ɔsɔtɔ fənɔntər dəmoloku kɔ dəmɔyɔ.

²³Ntɛ Musa ɔsɔtɔ meren wəco maŋkəlɛ (40) mɔ, k’ende pəcɛm-cɛmnɛ kəkɔ-nəŋk awɛŋc aŋa, afum a Yisrayel.

²⁴Kɔ Musa ɔŋkɔ pətəŋnɛ wɛŋc wəkin wəka Misira pac-cakəra, k’ɛŋcəmɛnɛ wɛŋc wəkakɔ aŋc-tɔrəs mɔ. K’oluksɛ ayɛk ŋa wɛŋc, k’endif wəMisira.

²⁵Kɔ Musa ɛŋcɛm-cɛmnɛ a awɛŋc aŋa ŋaŋtam kəc-gbɛkərɛ a Kanu kəntam kəbaŋ ŋa kɔ ŋaŋcəmɛ kɔ darəŋ-ɛ, mba ŋanacərɛ fɛ ti.

²⁶Dɔckɔsɔk, kɔ Musa ɔŋkɔ pəbəp aYisrayel mɛrəŋ ŋac-sutɛnɛ, k’ɛyac ŋa, k’olompəs ŋa dacɔ. K’eyif ŋa: ‹Ta ake tɔ nəŋsutnɛnɛ tantɛ-ɛ? Dɛwɛŋca dɔ nəyɔ!›

²⁷Mba wəkɔ ɛŋc-cakəra wɛŋc mɔ, ɛwɛn Musa pəc-yif: ‹An’ ɔsɔŋ’ əm kəyɔnɛ wəbɛ kɔ wəboc kiti səna dacɔ-ɛ?

²⁸Kədif’ im kɔ məfaŋ ba, pəmɔ tɔkɔ məndifsa wəMisira mɔ?›

²⁹Kɔ moloku mamɔkɔ mɔsɔŋɛ Musa kəyɛksɛ, k’ɔŋkɔ pəndɛ decikəra atɔf ŋa Madiyaŋ. Difɔ ɛnakom awut arkun mɛrəŋ.

³⁰Ntɛ meren wəco maŋkəlɛ meŋcepər (40) mɔ, kɔ mɛlɛkɛ mowurər Musa nde tɛgbɛrɛ ta tɔrɔ ta Turisnina dəmemer ma nɛŋc ndɛ dɛŋcmar dɛrəntəm mɔ.

³¹Ntɛ Musa ɛnəŋk ti mɔ, kɔ pəŋciyanɛ kɔ kənəŋk ka tes tɛwɛy-wɛy tatɔkɔ, ntɛ ɔŋc-cɔŋnɛ kəkɔ-gbɛkərɛ mɔ, kɔ dim da Wəbɛ Kanu dender kɔ:

³²‹In’ ɔfɔ, Kanu ka atem am: Kanu ka Abraham, ka Isiyaka kɔ Yakuba!› Musa pəc-yikcɛ, ta oŋwosɛ sɔ kəgbətnɛ di-ɛ.

³³Kɔ Wəbɛ oloku kɔ: ‹Məwurɛ cɔfta cam dəwɛcək, bawo kəfo kaŋkɔ məŋcəmɛ mɔ, kəfo kəcempi kɔ.

³⁴Inəŋk pəcuy pa afum em aŋɛ ŋayi Misira mɔ, ine kəgbis kəŋan: Intor ideyac ŋa. Ndɛkəl oŋ, məder isom əm Misira.›

³⁵Musa wəkakɔ ŋanace a ŋac-loku: «An’ ɔsɔŋ’ əm kəyɔnɛ wəbɛ kɔ wəboc kiti səna dacɔ-ɛ?» Nkɔn Kanu kənasom pəyɔnɛ wəbɛ kɔ wəyac, kəbɛrɛnɛ ka mɛlɛkɛ mmɛ mɛnawurər kɔ nde dɛrəntəm mɔ.

³⁶Nkɔn Musa ɛnawurɛnɛ aYisrayel Misira pəc-yɔ mes mɛwɛy-wɛy kɔ mɛgbɛkərɛ ma Kanu, nde kəba Kəyim kɔ nde dətɛgbɛrɛ, meren mmɛ wəco maŋkəlɛ (40) disrɛ.

³⁷Nkɔn Musa wəkakɔ yati ɛnaloku aYisrayel: ‹Kanu kəndekɛrɛ nu sayibɛ pəmɔ ina, nwɛ kəndeyɛk-yɛk awɛŋc anu dacɔ mɔ, pəsom kɔ nnɔ nəyi mɔ.›

³⁸Nkɔn Musa, ntɛ afum ŋanaloŋkanɛ nde dətɛgbɛrɛ mɔ, nkɔn ɛnayɔnɛ sɔ wəcepərɛnɛ moloku atem asu dacɔ kɔ mɛlɛkɛ mmɛ moŋc-lok-lokər kɔ nde dətɔrɔ ta Turisnina mɔ. K’ɔsɔtɔ moloku meyi wəyeŋ, ntɛ tɔŋsɔŋɛ səcərɛ mi mɔ.

³⁹Atem asu ŋanafaŋ fɛ kəcəŋkəl kɔ, kɔ ŋawɛnəs kɔ. Ŋanacɛm-cɛmnɛ dəbəkəc kəluksərnɛ Misira.

⁴⁰Kɔ atem asu ŋaloku Aruna, ‹Məlompəsɛ su mɛrəŋka, mmɛ mendesolɛ su mɔ, bawo Musa nwɛ owurɛnɛ su Misira mɔ, səŋcərɛ fɛ ntɛ tɔsɔtɔ kɔ mɔ.›

⁴¹Mata mamɔkɔ, kɔ ŋalompəs tɛrəŋka ta tura, kɔ ŋaloŋnɛ nnɔ tɛrəŋka kiriŋ, kɔ ŋambocɛ kəsata yɛbəc ya waca waŋan.

⁴²Mba kɔ Kanu kəmbɛr ŋa kumunt, kɔ kəsakɛ ŋa kəkor-koru ca ya dareŋc. It’ aŋcic ti buk ba sayibɛ-e disrɛ: ‹Nəna aka Yisrayel, meren wəco maŋkəlɛ (40) mmɛ nəŋcepərɛnɛ dətɛgbɛrɛ mɔ, in’ ɔ nəŋc-difɛ sɛm kəloŋnɛ disrɛ ba?

⁴³Nənakekərɛ abal ŋa tɛrəŋka ta Mɔlɔk kɔ tɛrəŋka ta kɔs ka kanu konu Refaŋ. Nənapat mɛrəŋka teta kəc-tontnɛnɛ ka mi fɔr kiriŋ! Ti disrɛ kəkekərɛ nu k’ inder decikəra Babilɔŋ tadarəŋ.›

⁴⁴Atem asu ŋanayɔ dəndo dətɛgbɛrɛ abal ŋa sede nŋɛ anamɛŋk walakɛ wa masar nwɛ Kanu kənacicɛ Musa mɔ. Tatɔkɔ tɔ wəlok-lokər ka Musa ɛnaloku kɔ a pəyɔ, a ŋowurɛnɛ kɔ ŋɔkɔ ɛnanəŋk mɔ.

⁴⁵Ntɛ atem asu ŋasɔtɔ ŋi mɔ, kɔ ŋaŋkekərɛ nde atɔf nŋɛ Kanu kənabɛləs afum fɔr yaŋan kiriŋ mɔ. Yosuwe pəyɔnɛ ŋa wəkiriŋ. Abal ŋaŋɔkɔ ŋɛnayi di haŋ tɛm ta Dawuda.

⁴⁶Kɔ Dawuda ɔsɔtɔ kəmar ka Kanu, k’ontola sɔ kəsɔŋ kɔ kəfo nkɛ ɔŋkɔcəmbərɛ Kanu ka Yakuba dəkəyi mɔ.

⁴⁷Mba Sulemany ɛnader pəlɔ kəlɔ kaŋkɔ.