Yɛbəc 5:20-41

²⁰«Nəkɔ kəlɔ kəpɔŋ, nəloku afum moloku kɔ mes fəp ma tɔkɔtɛnɛ ta doru dandɛ.»

²¹Ntɛ ŋane moloku mamɔkɔ mɔ, kɔ asom a Yesu ŋaŋkɔ bət-bət suy nde kəlɔ kəpɔŋ, kɔ ŋaŋcop kətəksɛ di afum. Kɔ wəloŋnɛ wəpɔŋ ender kɔ akɔ ɛnasolɛ mɔ. Kɔ ŋawe aboc kiti aləpəs aSuyif kɔ abeki apɔŋ aka Yisrayel fəp, kɔ ŋasom a pakɔ pawurɛnɛ asom a Yesu dəbili, pakɛrɛ.

²²Kɔ asɔdar ŋafɔ ŋakɔ, mba ŋambəp fɛ ŋa dəbili, kɔ ŋalukus. Kɔ ŋaŋkɔ ŋaloku ti abɛ aŋɛ ŋanasom ŋa mɔ, ŋac-loku:

²³«Səŋkɔ səbəp cumba ca bili pacaŋ ci bel-bel, abum a ci ŋacəmɛ dəkəcəmɛ daŋan, mba səŋgbiti ali fum səŋbəp fɛ bili disrɛ.»

²⁴Ntɛ ŋane moloku mamɔkɔ mɔ, kɔ pəyi wəbɛ ka asɔdar a kəlɔ kəpɔŋ kɔ aloŋnɛ apɔŋ yama-yama te taŋan, kɔ ŋaŋyifnɛ cəke cɔ tes tantɛ tendeləpəsər-ɛ?

²⁵Kɔ fum wəlɔma ende pəloku ŋa: «Afum aŋɛ nənabɛr dəbili mɔ ŋayi nde kəlɔ kəpɔŋ, ŋac-təksɛ afum.»

²⁶Asɔdar a kəlɔ kəpɔŋ kɔ wəbɛ kəŋan ŋaŋkɔ kəlɛk asom a Yesu, kɔ ŋaŋkɛrɛ ŋa pəforu disrɛ, bawo ŋananesɛ afum kəcacas ŋa.

²⁷Ntɛ asɔdar ŋaŋkɛrɛ asom a Yesu mɔ, kɔ ŋaŋcəmbər ŋa fɔr ya aboc kiti aSuyif kiriŋ. Kɔ wəloŋnɛ wəpɔŋ eyifət ŋa,

²⁸k’oloku: «Bafɔ sənamɔnɛ nu kətəksɛ sɔ afum teta tewe tantɛ ba? Nəlas Yerusalɛm mɛtəksɛ monu! Kɔ nəloku gbɛs a mɛnɛ nəloŋər su pəlɛc pa defi da fum wəkawɛ.»

²⁹Piyɛr kɔ asom a Yesu ŋaloku: «Kəcəŋkəlɛ Kanu kəŋcepər ka afum!

³⁰Kanu ka atem asu kəntimi Yesu nwɛ nənacaŋ dəkətɔk kəpandən kɔ nəmələk kɔ mɔ.

³¹Kanu kəndəs kɔ kəca kɔn kətɔt pəmɔ ntɛ ɔyɔnɛ wəkiriŋ kɔ wəyac mɔ, ntɛ tɔŋsɔŋɛ pəsɔŋ aka Yisrayel kəsəkpər bəkəc ŋacəmɛ dɔpɔ da Kanu darəŋ, paŋaŋnɛnɛ ŋa kiciya kəŋan mɔ.

³²Səna səyɔnɛ atəŋnɛ a moloku kɔ mes mamɔkɔ fəp, səna kɔ Amera Ŋecempi nŋɛ Kanu kəsɔŋ aŋɛ ŋaleləs kɔ ŋawosɛ toloku tɔn mɔ.»

³³Pənatɛlɛ aboc kiti aŋɛ ŋaŋc-cəŋkəl ŋa mɔ haŋ pəcepərər, kɔ ŋafaŋ kədif ŋa.

³⁴Mba wəFarisi wəlɔma ɛnayi ŋa dacɔ, pac-we kɔ Kamaliyel. Wətəksɛ sariyɛ ɛnayi, nwɛ afum fəp ŋanabɔtər mɔ. K’ɛyɛfɛ aboc kiti aSuyif dacɔ, k’oloku a pawurɛnɛ afum akaŋɛ kərɛsna,

³⁵k’oloku: «Arkun a Yisrayel! Nəkembərnɛ bel-bel ntɛ nəndeyɔ afum akaŋɛ mɔ.

³⁶Towon fɛ, Tudas ɛnalɛknɛ, afum masar maŋkəlɛ (400) ŋanacɛk kɔ darəŋ. Mba anamələk kɔ, afum akɔ ɛnasolɛ mɔ fəp k’ambɛləs ŋa. Ali wəkin anasak fɛ.

³⁷Ntɛ tatɔkɔ teŋcepər mɔ, kɔ Yudas wəKalile ɛyɛfɛ tɛm ntɛ aŋc-lɔm afum a dɔtɔf mɔ. K’osolɛ sɔ afum alarəm. Nkɔn sɔ anamələk kɔ, aŋɛ ɛnasɛp kəkafəli kəcəmɛ kɔ darəŋ mɔ fəp, kɔ ŋasaməsər.

³⁸Ndɛkəl ic-lok’ un, ta nəcɛpsər afum akaŋɛ, nəsak ŋa ŋakɔ. Kɔ pəyɔnɛ fɔ mɛfaŋ, kɔ pəyɔnɛ fɛ ti mɔyɔ maŋan nda fum mɛŋyɛfɛ-ɛ, mendesɔlɛ.

³⁹Mba kɔ pəyɔnɛ fɔ nda Kanu mɛŋyɛfɛ-ɛ, nəfɔdetam kəsɔlɛnɛ mi de! Nəkɛmərnɛ kədeyɛfərɛnɛ kɔ Kanu de!» Kɔ ŋane moloku mamɔkɔ Kamaliyel ɛnasɛp kəloku ŋa mɔ.

⁴⁰Kɔ ŋawe asom a Yesu, kɔ ŋasut ŋa, kɔ ŋamɔnɛ ŋa kətɔsɔ-lok-lokɛ tewe ta Yesu, kɔ ŋasak ŋa.

⁴¹Kɔ asom a Yesu ŋawur ŋa aboc kiti dacɔ. Kɔ pəmbɔt ŋa kətɔrəs kəŋan teta kəleləs ka tewe ta Yesu.