Yɛbəc 4:9-36

⁹Ayifət su mɔkɔ teta pətɔt mpɛ ayɔnɛ wəbəc mɔ, kɔ ntɛ antaməs kɔ mɔ.

¹⁰Nəcərɛ ti bel-bel, fəp fonu kəbəp ka aYisrayel: Tewe ta Yesu Krist wəka Nasarɛt, wəkɔ nənacaŋ dəkətɔk kəpandən, akɔ Kanu kəntimi kɔ afi dacɔ mɔ, tewe tɔn tɔsɔŋɛ ntɛ fum wəkawɛ ɛŋcəmɛ nu dacɔ pətamnɛ mɔ.

¹¹Nkɔn Yesu ‹ɔyɔnɛ togbu mpɛ nəna acəmbər kəlɔ nənater mɔ, mba ɛnayɔnɛ togbu pɔtɔt, pa dacɔ.›

¹²Nkɔn gbəcərəm ɛntam kəsɔŋ su kəfis. Kanu kənasɔŋ fɛ tewe tɔlɔma ta fum nnɔ doru dandɛ ntɛ pəmar payacnɛnɛ mɔ.»

¹³Ntɛ abeki aŋɛ ŋanəŋk Piyɛr kɔ Saŋ ŋabaŋsɛ mɔ, kɔ pəŋciyanɛ ŋa, bawo ŋanacərɛ a afum gbəcərəm ŋanayi aŋɛ ŋanatɔ-təkəs mɔ. Kɔ ŋanɛpəl ŋa dacɔ akɔ ŋanayi kɔ Yesu mɔ.

¹⁴Mba ntɛ abeki apɔŋ ŋaŋc-nəŋk fum nwɛ anataməs pəcəmɛ ŋa fɔr kiriŋ mɔ, ŋanayɔ fɛ toloku.

¹⁵Kɔ aboc kiti a aSuyif ŋaloku Piyɛr kɔ Saŋ kəwur ka dukəlɔ ndɛ aŋc-yifət ŋa mɔ, kɔ ŋamɛŋksɛnɛ taŋan,

¹⁶kɔ ŋayifɛnɛ: «Cəke c’ andeyɔ afum akaŋɛ-ɛ? Bawo tɔsɔkər aka Yerusalɛm fəp a ŋa ŋasɔŋɛ kɔ tɛgbɛkərɛ ta Kanu tantɛ teyi. Afɔtam kəgbɛkəl ti.

¹⁷Mba, ntɛ aŋyɔ a ta tɛsam nnɔ afum ŋayi mɔ, pabeŋnɛ ŋa, pamɔnɛ ŋa kəc-lok-lokər nwɛ o nwɛ tewe tatɔkɔ.

¹⁸Kɔ ŋawe ŋa, kɔ ŋambeŋnɛ ŋa kətɔ-loku kɔ kətɔ-təksɛ afum tewe ta Yesu.

¹⁹Piyɛr kɔ Saŋ ŋayif ŋa: «Pəmar fɔr ya Kanu kiriŋ paleləs nəna patas Kanu Nkɔn ba? Nəna nəmɔmən ti bel-bel,

²⁰bawo səna səfɔtam kəyi ta səloku tɔkɔ sənəŋk kɔ tɔkɔ səne mɔ-ɛ.»

²¹Kɔ aboc kiti ŋaŋgbɔkərɛ sɔ kəbeŋəsnɛ ŋa, kɔ ŋasak ŋa. Ŋasɔtɔ fɛ tes ntɛ tɔŋsɔŋɛ ŋa kəsumpər mɔ teta afum. Fəp fəŋc-kor-koru Kanu teta tɔkɔ tɛnayi mɔ.

²²Fum nwɛ ɛnasɔtɔ tɛgbɛkərɛ ta kətaməs tatɔkɔ mɔ, ɛnatam kəsɔtɔ meren wəco maŋkəlɛ pəcepər.

²³Ntɛ asak Piyɛr kɔ Saŋ mɔ, kɔ ŋaŋkɔ ŋalɔmər afum aŋan tɔkɔ aloŋnɛ apɔŋ kɔ abeki a dɔtɔf ŋanaloku ŋa mɔ.

²⁴Ntɛ ŋane moloku mamɛ mɔ, kətəŋnɛ disrɛ kɔ ŋampɛnɛ sim nnɔ Kanu kəyi mɔ, ŋac-loku: «Wəbɛ, məna nwɛ məlompəs kɔm, antɔf, kəba kɔ ca yɔkɔ yeyi ki mɔ fəp,

²⁵dəAmera Ŋecempi ŋɔ mənalokɛ kusu ka kas kosu Dawuda wəmarəs kam: ‹Ake ’sɔŋɛ ntɛ mɛtɛlɛ mɔpɔŋ meŋcepərər afum a tɔf mɔ? Ake ’sɔŋɛ ntɛ afum ŋantəŋnɛ mes mmɛ mɔntɔdeləpsər mɔ?

²⁶Abɛ a doru kɔr-kɔr ŋalompəsnɛ teta kəyɛfərɛnɛ, kɔ akiriŋ ŋaloŋkanɛ kɔ ŋantəŋnɛ pəlɛc nnɔ Wəbɛ Kanu kɔ wəyɛk-yɛk kɔn ŋayi mɔ.›

²⁷Bawo kaŋce, Herodu kɔ Pɔŋse Pilat ŋantəŋnɛ pəlɛc dare dandɛ disrɛ atɔyɔnɛ Suyif kɔ aYisrayel nnɔ wəmarəs kam wəcempi Yesu eyi mɔ, nwɛ mənayɛk-yɛk mɔ.

²⁸Ŋanayɔ mes fəp mmɛ mənanuŋkɛnɛ kəwosɛ kəyɔ mɔ.

²⁹Ndɛkəl oŋ, Wəbɛ, məgbɛkərɛ kəbeŋəsnɛ kəŋan, məsɔŋɛ acar am kəbaŋsɛ kəloku toloku tam kaŋce disrɛ.

³⁰Məteŋci kəca ntɛ tɔsɔŋɛ kətaməs, mɛgbɛkərɛ, kɔ mes mɛwɛy-wɛy meyi tewe ta wəcar kam wəsoku Yesu.

³¹Ntɛ ŋalip kətola Kanu mɔ, kɔ kəfo kəŋkɔ ŋanaloŋkanɛ mɔ kəyikcɛ, kɔ Amera Ŋecempi ŋɔsɔŋɛ fəp faŋan kəloku toloku ta Kanu kəbaŋsɛ disrɛ.

³²Kənay nkɛ kənalaŋ mɔ, ŋasɔtɔ bəkəc yin yayi, kɔ ŋayɔnɛ sɔ akin ayi. Nwɛ o nwɛ oŋc-loku fɛ a nkɔn sona ɔyɔ daka dɔn, mba a fəp faŋan fɔ ŋanapaŋnɛ di.

³³Asom a Yesu ŋaŋc-loku tɔkɔ ŋananəŋk kəyɛfɛ ka Wəbɛ Yesu afi dacɔ mɔ. Kɔ kəmar ka Kanu kəyi alaŋ fəp kəroŋ.

³⁴Afum akaŋɛ dacɔ, nwɛ o nwɛ abəkəc ŋɛnalɛcɛ fɛ sɔ teta kətɔ-yɔ kɔn daka, bawo aŋɛ ŋanayɔ dalɛ, kɔ pəyɔnɛ fɛ ti, wɔlɔ mɔ, ŋanacaməs yi. Kɔ ŋaŋkɛrɛ kəway ka ca yayɔkɔ,

³⁵kɔ ŋaŋc-bocər ki asom a Yesu dəntɔf. Kəway kaŋkɔ k’ aŋc-yer nwɛ o nwɛ kɔ tɔkɔ pəcuca peyi kɔ mɔ.

³⁶Isifu wəka kor ka Levy ɛnayi, nwɛ asom a Yesu ŋaŋc-we Barnabas mɔ, tatɔkɔ kusu kəŋan «Wəcəpəs bəkəc.» Nde dare da Sipər anakom kɔ.