Yɛbəc 3:10-16

¹⁰Aŋc-nɛpəl kɔ, nkɔn ɛŋc-ndɛ nde kəlɔ kəpɔŋ nde «Kusuŋka Kətɔt» mɔ, pəc-tolanɛ daka nɔnɔfɔr disrɛ. Kənesɛ kɔ pəciyanɛ kəmbəp afum fəp teta tɔkɔ tɛnabəp kɔ mɔ.

¹¹Ntɛ fum nwɛ ɛnader pəyi oŋ ta ɛŋyɛfɛ Piyɛr kɔ Saŋ dəntɔf mɔ, kənesɛ disrɛ kɔ afum fəp ŋayɛksɛ kəkɔ nde akɛr nŋɛ aŋwenɛ «Akɛr ŋa Suleman», nde Piyɛr kɔ Saŋ ŋanayi mɔ.

¹²Ntɛ Piyɛr ɛnəŋk ti mɔ, k’oloku afum: «Aka Yisrayel! Ake ’sɔŋɛ ntɛ tantɛ t’ eŋciyanɛ nu mɔ? T’ake tɔ nəŋgbətnɛnɛ su pəmɔ fənɔntər fosu, kɔ pəyɔnɛ fɛ ti-ɛ, dosoku dosu disrɛ dɔsɔŋɛ fum wəkawɛ kəkɔt?

¹³Kanu ka atem asu Abraham, Isiyaka, kɔ Yakuba kəyek-yekəs wəcar kɔn Yesu. Mba nəna nəlɛk, kɔ nəsɔŋ abɛ, nəŋce kɔ fɔr ya Pilat kiriŋ, mba Pilat ɛnacɛm-cɛmnɛ kəsak kɔn.

¹⁴Nəna nənace nwɛ ɔyɔnɛ wəcempi kɔ wəlompu kɔ nəloku a pawosɛ kəsakɛ nu wədifət afum dare disrɛ.

¹⁵Nənadif wəkiriŋ wəka doru, mba Kanu kəyekti kɔ afi dacɔ. Sən’ ɔyɔnɛ atəŋnɛ aka ti.

¹⁶Anasɔŋ fənɔntər fum wəkawɛ nəŋgbətnɛ kɔ nəŋcərɛ mɔ. Kəlaŋ kɔn Yesu gbəcərəm kəsɔŋ fum wəkawɛ fənɔntər. Kəlaŋ kɔn, kəlaŋ Yesu yati kəsɔŋ kɔ kətamnɛ keŋ fəp fɔr yonu kiriŋ.