Yɛbəc 2:9-47

⁹AParto, aMede, aka Elam, aka Mesopotami, aka Yude, aka Kapados, aka Ponto, kɔ aka Asi,

¹⁰aka Firiki, aka Paŋfili, aka Misira, aka Libi andɛ a atɔf ŋa Sirɛn, aRom,

¹¹aSuyif kɔ acikəra aŋɛ ŋaŋc-tubucnɛ pətɔt pa dinɛ da aSuyif mɔ: Aka Krit, aka Arabi, səŋne ŋa ŋac-loku cusu cosu mes mɔpɔŋ ma Kanu!»

¹²Kɔ cusu cəwos ŋa kɔ pəyi ŋa yama-yama, kɔ ŋayifɛnɛ taŋan: «Cəke cɔ tantɛ toloku-ɛ?»

¹³Mba kɔ alɔma ŋaŋfani ŋa, ŋac-loku: «Member mobotu mɔ ŋanɛmbərɛ!»

¹⁴Kɔ Piyɛr ɛyɛfɛ k’ɛŋcəmɛ kɔ asom a Yesu aŋɛ wəco kɔ pin, k’ɛmpɛnɛ dim pəc-loku kənay nkɛ: «Afum a Yude kɔ nəna aŋɛ nəndɛ dare da Yerusalɛm mɔ, nəsu ləŋəs, nəcəŋkəl bel-bel moloku mem! Nəcərɛ ti:

¹⁵Afum akaŋɛ ŋaŋcis fɛ pəmɔ tɔkɔ nəcɛm-cɛmnɛ ti mɔ, bawo bət-bət b’ ayi bambɛ.

¹⁶Mba tɔkɔ aŋnabi Yowɛl ɛnaloku mɔ teyi kəcepər:

¹⁷‹Kɔ Kanu kəloku mata mɛləpəs: «Indesaməsər Amera ŋem nnɔ afum fəp ŋayi mɔ. Awut anu arkun kɔ aran ŋande ŋac-dəŋk cəsayibɛ-e. Indesɔŋ awut atɛmp anu kənəŋk ka mɔyɔ mem, indewɛrəpəs sɔ afum anu atem.›

¹⁸‹Ɛy,› Kanu kəloku, ‹Indeyerəs Amera Ŋecempi ŋem acar em arkun kɔ aran, mata mamɔkɔ, ŋandedəŋk cəsayibɛ-e.

¹⁹Indementər mes mɛwɛy-wɛy mɛlarəm dəkɔm kɔ mɛgbɛkərɛ ma Kanu nnɔ dəntɔf: Mecir, nɛŋc, kɔ acul ŋa kinimɛ.

²⁰Dec dendesəkpɛ kubump, kɔ ŋof ŋɛsəkpɛ mecir. Mamɔkɔ mendecepər a dɔsɔk da Wəbɛ dedebəp, dɔsɔk dadɔkɔ dɛmbɛk kɔ dentesɛ.

²¹Nwɛ o nwɛ endeboŋc tewe ta Wəbɛ Kanu mɔ endefis.›

²²Afum aka Yisrayel, nəcəŋkəl moloku mamɛ! : Yesu wəka Nasarɛt, fum nwɛ Kanu kəmentərɛ nu debeki dɔn mɔ, dəmes mɛwɛy-wɛy, dəmɔpɔŋ, dəmɛgbɛkərɛ pəmɔ tatɔkɔ nəŋcərɛ ti mɔ,

²³fum wəkawɛ anasɔŋ nu kədif kɔn pəmɔ tɔkɔ Kanu kənawosɛ ti kɔ kəsɔŋ tɔkɔtɛnɛ ta ti mɔ. Nənim kɔ nəŋcaŋ kɔ dəkətɔk kəpandən kəmar ka waca wa acikəra.

²⁴Kanu kəyekti kɔ kəŋgbintər kɔ pəcuy pa defi, bawo defi dɛnatam fɛ kəmɛŋkərnɛ kɔ.

²⁵Dawuda ɛnanuŋkɛnɛ kəloku dəyecicəs yecempi teta Yesu: ‹Iŋc-nəŋk Wəbɛ tɛm fəp fɔr yem kiriŋ, ifɔyikcɛ, bawo ey’ im kəca kətɔt.

²⁶It’ ɔsɔŋɛ ntɛ abəkəc ŋem ŋeyi dəkəsata mɔ, kɔ temer tem tesikəlɛ dəpəbotu. Dis dem yati dendekɔ-ŋesəmɛ kəgbɛkər amera.

²⁷Bawo məfɔdekɔ-sak im dabiya məfɔdekɔ-sak wəsoku kam pəte.

²⁸Məsɔŋ’ em kəcərɛ səpɔ sa kəcepərɛnɛ doru, kiyi kam ina kəsək kəndekɔ-las’ im pəbotu.›

²⁹Awɛŋc im aŋa! Nəwosɛ iloku nu ntɛ kəlaŋ disrɛ teta wətem Dawuda: Ɛnafi, k’awup kɔ, kɔ kufu kɔn kəyi su sɔ mɔkɔ dacɔ.

³⁰Mba ntɛ Dawuda ɛnayɔnɛ sayibɛ mɔ, ɛŋcərɛ sɔ a Kanu kənadɛrəmɛ kɔ a kəndedəs wan-sɔ kɔn wəlɔma dɔcɔm da dɛbɛ dɔn kəroŋ.

³¹Dawuda ɛnanuŋkɛnɛ pənəŋk kəyɛfɛ ka Krist dəkufu , ɛnanəŋk ntɛ tendeder mɔ k’oloku ti: a anasak fɛ Krist dabiya, dis dɔn dɛnate fɛ dəkufu.

³²Yesu wəkakɔ, Kanu kəyekti kɔ, səna fəp səyɔnɛ atəŋnɛ aka ti.

³³Kɔ Kanu kəmpɛnɛ Yesu kəfo kəleli, k’ɛndəs kɔ kəca kɔn kətɔt. Kɔ Yesu ɔsɔtər nkɔn apa Kanu Amera Ŋecempi nŋɛ analoku kədesɔŋ mɔ, k’eyerəs tatɔkɔ nənəŋk kɔ nəne mɔ.

³⁴Bafɔ Dawuda ɛnapɛ dareŋc, nkɔn yati oloku: ‹Wəbɛ Kanu oloku wəbɛ kem: ‹Məndɛ nnɔ kəfo kəleli, kəca kem kətɔt,

³⁵haŋ ic-lip kəboc aterɛnɛ am fɔr yam kiriŋ mənas-nas ŋa.›

³⁶Pəmar aka Yisrayel fəp ŋacərɛ ti bel-bel: Kanu kənasɔŋɛ Yesu kəyɔnɛ wəbɛ wəyɛk-yɛk kɔn, Yesu wəkakɔ nəŋcaŋ dəkətɔk kəpandən mɔ.»

³⁷Ntɛ afum ŋane moloku mamɔkɔ mɔ, kɔ mosumpər ŋa, kɔ ŋayif Piyɛr kɔ asom a Yesu akɔ: «Awɛŋc su aŋa, cəke cɔ pəmar səyɔ oŋ-ɛ?»

³⁸Kɔ Piyɛr oloku ŋa: «Nəsəkpər mera yonu, nəlomp! Nwɛ o nwɛ pəsɔtɔ kəgbət dəromun tewe ta Yesu Krist disrɛ, ntɛ tɔŋsɔŋɛ paŋaŋənɛnɛ kiciya ka wəkayi mɔ, nəndesɔtɔ sɔ Amera Ŋecempi ŋa Kanu.

³⁹Bawo, kəpocɛ nkɛ Kanu kənasɔŋɛ temer mɔ, konu kɔ, kɔ awut anu kəbəp ka akɔ ŋayi pəbɔlɛ mɔ, haŋ kənay ka afum nkɛ Wəbɛ Kanu kosu endewe mɔ.»

⁴⁰Kɔ Piyɛr oloku ŋa sɔ moloku mɛlarəm ntɛ tɔŋsɔŋɛ ŋanenɛ kɔ mes mmɛ mɛnacepər fɔr yɔn kiriŋ mɔ. K’eŋgbiŋər ŋa, pəc-loku: «Nəyacnɛ dɛtɛmp dandɛ dɛŋkafəlɛ-kafəlɛ mɔ!»

⁴¹Afum alarəm ŋawosɛ kəgbət dəromun teta Kanu. Dɔsɔk dadɔkɔ afum wul maas (3.000) ŋambɛrɛnɛ akɔ ŋananuŋkɛnɛ kəlaŋ mɔ.

⁴²Kɔ ŋaŋcəŋkəl tɛm fəp kɔ bel-bel mɛtəksɛ ma asom a Yesu, kiyi kəŋan tes tin, kəpaŋnɛ kəŋan dap da yeri, kɔ kətola Kanu.

⁴³Kɔ kənesɛ kəsumpər nwɛ o nwɛ bawo Kanu kəŋc-mentərɛ mes mɔpɔŋ kɔ mes mɛwɛy-wɛy mɛlarəm waca wa asom a Yesu.

⁴⁴Akɔ ŋanalaŋ mɔ fəp ŋanayi tes tin ŋac-yerɛnɛ mpɛ o mpɛ ŋaŋsɔtɔ mɔ.

⁴⁵Kɔ ŋaŋcaməs daka dɔkɔ ŋanayɔ mɔ, kɔ ŋayer pəsam papɔkɔ ŋac-mɔmən tɔkɔ pəcucanɛ peŋcepərɛnɛ mɔ.

⁴⁶Dɔsɔk o dɔsɔk ŋaŋc-loŋkanɛ nde kəlɔ kəpɔŋ ka Kanu, ŋac-dinɛnɛ yeri kəfo kin nde wɔlɔ waŋan, ŋac-dinɛ yi mera yobotu kɔ bəkəc yoforu.

⁴⁷Ŋac-kor-koru Kanu, kɔ mes maŋan mɔmbɔt afum fəp. Kɔ Wəbɛ Yesu nkɔn ɛmbɛrɛnɛ dɔsɔk o dɔsɔk kəgba ka aŋɛ ɛŋc-yac mɔ.