6Afum akakɔ ŋac-kar a pəŋkɔ-kəf kɔ dənda abok ŋɛnadɛtərnɛ mɔ, kɔ pəyɔnɛ fɛ ti-ɛ pətɛmpɛnɛ pəfi. Ntɛ ŋaŋkar kɔ pəwon ta ŋaŋnəŋk tɔlɔm o tɔlɔm tɔsɔtɔ kɔ mɔ, kɔ ŋasəkpər tɛcɛm-cɛmnɛ taŋan, kɔ ŋaloku a kanu kɔ ɔyɔnɛ.
7Kəfo kaŋkɔ kəsək antɔf ŋɔpɔŋ ŋɛnayi di ŋa fum wəbeki wəpɔŋ wəka mokuru mamɔkɔ wəlɔma, pac-we kɔ Pubiliyu. Nkɔn ɛnasɔŋ su dəkəyi dɔtɔt mata maas.
8Papa ka Pubiliyu ɛnafəntərɛ ta ɛntamnɛ-ɛ, fiba kɔ kupur yeyi kɔ. Kɔ Pol ɛmbɛrər kɔ, k’ɔntola Kanu, pəc-deŋər kɔ waca, k’ɛntaməs kɔ.
9Ti disrɛ kɔ acu aka mokuru aləpəs akɔ ŋander sɔ, kɔ ŋa sɔ ŋantamnɛ.
10Kɔ aka dare ŋaleləs su bel-bel, ntɛ səndeyɛfɛ kəkɔ mɔ, k’asɔŋ su ca yɔkɔ pənamar su kəyɔ mɔ fəp.
11Ntɛ səŋcepərɛnɛ yof maas mɔ, kɔ səsɔtɔ abil nŋɛ ŋɛyɛfɛ dare da Alɛksandər, kɔ ŋɛŋcepərɛnɛ dɛrəŋ mokuru ma Malit. Abil ŋaŋɔkɔ ŋ’ aŋc-we «Diyɔskur.»
12Ntɛ səmbɛrɛ dare da Sirakus mɔ, kɔ səyi di mata maas.
13Kɔ səyɛfɛ dəndo, səsolnɛ agbɛp kɔ səŋkɔ səsumpər dare da Resiyo. Kɔ afef ŋa kəca-kətɔt ŋɛyɛfɛ dɔckɔsɔk, mata mɛrəŋ disrɛ kɔ səmbəp dare da Pusɔl.
14Difɔ sənabəp awɛŋc su aŋa alaŋ akɔ ŋanatola su kəyi di mata camət-mɛrəŋ mɔ. Tɔkɔt tantɛ tɔ sənakɔt kəbɛrɛ dare da Rom.
15Awɛŋc su aŋa alaŋ a dare da Rom aŋɛ ŋanane te tosu mɔ, ŋander kəfaynɛ su haŋ nde makit ma Apiyus, kɔ nde aŋc-we Dəkəyikiya Maas mɔ. Ntɛ Pol ɛnəŋk ŋa mɔ, k’eyek-yekəs Kanu, k’ɛmbɛrɛnɛ sɔ kəcəp abəkəc.
16Ntɛ səmbɛrɛ Rom mɔ, k’awosɛ Pol kəyi taciŋa kɔ wəsɔdar wəkɔ oŋc-bum kɔ mɔ.
17Ntɛ mata maas meŋcepər mɔ, kɔ Pol ewe afum alel aSuyif aŋɛ ŋanayi Rom mɔ. Ntɛ ŋambəpsɛnɛ mɔ, k’oloku ŋa: «Awɛŋc im aŋa, ali tes iləsərɛ fɛ afum asu, ali tes iləsər fɛ ta mes mosu mokur ma atem asu, mba ŋanasumpər im nde Yerusalɛm kɔ ŋambɛr im aRom dəwaca.
18Ntɛ ayifət im mɔ, abɛ akakɔ ŋanafaŋ kəsak im, bawo ŋananəŋk fɛ ntɛ o ntɛ pəmar padif’ em mɔ.
19Mba aSuyif ŋawosɛ fɛ. It’ ɛnasɔŋ’ em kəwe kiti ka wəbɛ ka tɔf ya Rom fəp ta ifaŋ kəboŋcɛ afum em tes-ɛ.
20Tes tatɔkɔ tɔsɔŋɛ ntɛ ifaŋ kənəŋkɛ nu, isɔŋɛ nu ti kəcərɛ mɔ, bawo teta kəgbɛkər amera ka afum a Yisrayel kəsɔŋɛ ntɛ ambɛr im gbekce yayɛ mɔ.»
21Kɔ afum alel a Rom ŋaloku kɔ: «Ali areka ŋɛfɛt ŋin səsɔtɔ fɛ kəyɛfɛ atɔf ŋa Yude tetam. Ali awɛŋc su aŋa wəkin ender fɛ pəloku su pɛlɛc pam.
22Mba səfaŋ fɔ sən’ am kəlok-loku məna yati tɔkɔ məŋcɛm-cɛmnɛ mɔ, bawo səŋcərɛ a kəgbɛkəlɛnɛ kəyi mofo fəp teta kəgba nkɛ məyi mɔ.»
Yɛbəc 28
Yɛbəc 28:6-22