Yɛbəc 27:7-34

⁷Mataka mɛlarəm disrɛ səc-kɔt mɛtɛn dəkəba. Pəcuca disrɛ pɔ sənadebəp Sinidi, mba ntɛ afef ŋɛnatɔ-wosɛ su kəkɔ pəbɔlɛ mɔ, kɔ səsumpər agbɛp ŋa atɔf ŋa Krɛt, kɔ səŋcepər Salmɔn.

⁸Kɔ səŋgbofnɛ dobo dadɔkɔ pəcuca disrɛ, kɔ səŋkɔ səbəp kəfo kaŋkɔ aŋwe «Cətənta Cətɔt,» ta pəmbɔlɛnɛ di kɔ dare da Laseya.

⁹Ntɛ tɛm tɛlarəm teŋc-cepər, akɔ kəkɔtɛnɛ abil kəŋc-yɔ kəyɔ dəm wɛy-wɛy mɔ, kɔ mata ma kəsuŋ meŋcepər-ɛ. Kɔ Pol eŋgbiŋər ŋa:

¹⁰«Anapa, inəŋk fɔ kəkɔt kosu kaŋkɛ kəyɔ wɛy-wɛy. Abil kɔ yɛcaməs yɔkɔ yeyi ŋi disrɛ mɔ yendelɛcɛ, səna aŋɛ səyi ŋi disrɛ mɔ yati sətɔrɔ.»

¹¹Mba wəbɛ wəsɔdar pəlaŋ wəgbɛk abil kɔ wəka ŋi, ta ewe moloku ma Pol daka-ɛ.

¹²Ntɛ tendeŋərnɛ ti mɔ, kətənta kənatesɛ fɛ kəcəpərɛnɛ dɛrəŋ. Kɔ ayi a abil ŋaŋɔkɔ disrɛ alarəm ŋaloku kəyɛfɛ ka di ŋabɛlər Fenik, kətənta ka Krɛt nkɛ kəŋkəŋkənɛ afef ŋɛdɛrəŋ mɔ.

¹³Kɔ afef ŋepic ŋɛyɛfɛ kəwur kəca-kətɔt, kɔ ŋaŋcɛm-cɛmnɛ a ŋantam kəyɔ tɛfaŋ taŋan. Kɔ ŋayekti abɛla ŋaŋan kɔ ŋasolnɛ dobo da Krɛt, ŋagbɛpɛnɛ di.

¹⁴Pəwon fɛ kɔ afef ŋɔpɔn ŋɔkɔ aŋc-we «Ɛrakilɔŋ» mɔ ŋowur kəyɛfɛ ka mɔrɔ ma dare.

¹⁵Kɔ afef ŋaŋɔkɔ ŋɛyɛfɛ kəcɛrŋɛnɛ abil ta antam sɔ kəcəmɛ afef ŋaŋɔkɔ kiriŋ-ɛ, kɔ səsaknɛ kɔ ŋeŋkekərɛ su nde ŋɛnafaŋ mɔ.

¹⁶Səyi kəcepər mokuru mɛfɛt mɔlɔma tantɔf, mmɛ aŋc-we Koda mɔ, kɔ səntam pəcuca disrɛ kəcəmbərəs abil.

¹⁷Ntɛ səliŋərnɛ ŋi mɔ, kɔ aŋɛ ŋayi kəbəc abil disrɛ mɔ ŋaŋkotɛ ŋi bənda yɔkɔ yɛnayɔnɛ yɛmɛŋkərnɛ mɔ, ŋac-nesɛ kəkɔ-loŋɛ agbɛp ŋa atɔf ŋa Siriti, bawo kɛrɛrɛ ka asəŋc kəyi di. Kɔ ŋaŋgbal aŋka, mba afef ŋosolɛ ŋa.

¹⁸Ntɛ afef ŋɛnanaŋkanɛ kəyikəc su mɔ, dɔckɔsɔk kɔ ŋaŋgbaləs yɛcaməs yɔlɔma dəkəba.

¹⁹Tataka ta maas, kɔ abəc a debil ŋasumpər gbalaŋi ba abil dəwaca waŋan kɔ ŋaŋgbal yi dəkəba.

²⁰Mataka mɛlarəm disrɛ dec kɔ cɔs yoŋc-wur fɛ, afef ŋɛc-bɛk oŋ kəbɛk dəm, tɛləpəs kɔ səwurɛ mera kəyi sɔ doru.

²¹Ŋanadi fɛ yeri kəyɛfɛ ntɛ pənawon mɔ. Itɔ kɔ Pol ɛyɛfɛ k’ɛŋcəmɛ ŋa dacɔ, k’oloku: «Anapa, pəc-yɔnɛ fɔ nəcəŋkəl im ta nəyɛfɛ Krɛt nəyekti abɛla-ɛ, nədenabumnɛ pəcuy pampɛ pɔsɔtɔ su, kɔ ca nyɛ yɔsɔlər su mɔ.

²²Mba ndɛkəl oŋ, intola a aŋcəpəs nu bəkəc, bawo ali fum ɔfɔfi nu dacɔ, mɛnɛ abil ŋendelɛcɛ.

²³Itɔ nnɔ pibi mɛlɛkɛ mɔlɔma ma Kanu nkɛ iyɔnɛ wəkɔn kɔ nkɛ iŋkor-koru mɔ, mowurərn’ em.

²⁴Kɔ molok’ im: ‹Ta mənesɛ, Pol! Mɛnɛ məcəmɛ fɔr ya wəbɛ ka tɔf ya Rom fəp kiriŋ, tetam tɔ Kanu kəsakɛ akaŋɛ nəyi abil ŋaŋɛ disrɛ mɔ fəp kəyi doru.›

²⁵Nəcəpəsnɛ bəkəc arkun, bawo ilaŋ tɔkɔ Kanu kəlokun’ em mɔ tendeyi.

²⁶Mba mɛnɛ pakɔ-loŋɛ mokuru mɔlɔma.»

²⁷Pibi pa wəco kɔ maŋkəlɛ p’ anakɔ pafɛcərɛnɛ su kəba ka Adiriya. Pibi dacɔ kɔ akɔtɛnɛ abil ŋaŋcərɛ a alɔtərnɛ antɔf ŋowosu.

²⁸Kɔ ŋantorɛ paka pelel pakotər pi kəbənda, kɔ ŋanəŋk fɔ putukum pɛmbəp mɛtər wəco maas kɔ camət-tin. Kɔ ŋaŋcɔŋnɛ kiriŋ kɔ ŋawak sɔ, kɔ ŋanəŋk fɔ pətukum pɛmbəp mɛtər wəco mɛrəŋ kɔ camət-mɛrəŋ.

²⁹Ntɛ ŋanesɛnɛ abil kəcaŋərɛnɛ masar mɔ, itɔ ŋanagbalɛ aŋka maŋkəlɛ tadarəŋ, kɔ ŋandɛ ŋac-kar pəwaŋkəra, mba pəc-won ŋa.

³⁰Mba ntɛ abəc a debil ŋanafaŋ kəyɛksər abil mɔ, kɔ ŋantorɛ agbaŋkɛ, ŋac-loku a ŋakɔ ŋagbal aŋka tekiriŋ ta abil.

³¹Kɔ Pol oloku wəbɛ wəsɔdar kɔ asɔdar, «Kɔ afum akaŋɛ ŋantɔyi debil-ɛ, nəfɔtam kəyi doru.»

³²Kɔ asɔdar ŋaŋcopu bənda ya agbaŋkɛ, kɔ ŋasak ŋi kɔ ŋɛntɛmpɛnɛ.

³³Ŋayi kəkar dec kəsɔk, kɔ Pol ewenɛ fəp fosu kəkɔ-di yeri, k’oloku: «Mɔkɔ tataka ta wəco kɔ maŋkəlɛ ntɛ nəyi kəkar, ta nəndi yeri mɔ.

³⁴Intola nu oŋ kədi yeri, bawo pəmar nədi yi ntɛ tɔŋsɔŋɛ nəyacnɛ mɔ. Ali wəkin nu dacɔ, kəfon kɔn da dəromp kəfɔ-sɔlər kɔ!»