Yɛbəc 27:27-43

²⁷Pibi pa wəco kɔ maŋkəlɛ p’ anakɔ pafɛcərɛnɛ su kəba ka Adiriya. Pibi dacɔ kɔ akɔtɛnɛ abil ŋaŋcərɛ a alɔtərnɛ antɔf ŋowosu.

²⁸Kɔ ŋantorɛ paka pelel pakotər pi kəbənda, kɔ ŋanəŋk fɔ putukum pɛmbəp mɛtər wəco maas kɔ camət-tin. Kɔ ŋaŋcɔŋnɛ kiriŋ kɔ ŋawak sɔ, kɔ ŋanəŋk fɔ pətukum pɛmbəp mɛtər wəco mɛrəŋ kɔ camət-mɛrəŋ.

²⁹Ntɛ ŋanesɛnɛ abil kəcaŋərɛnɛ masar mɔ, itɔ ŋanagbalɛ aŋka maŋkəlɛ tadarəŋ, kɔ ŋandɛ ŋac-kar pəwaŋkəra, mba pəc-won ŋa.

³⁰Mba ntɛ abəc a debil ŋanafaŋ kəyɛksər abil mɔ, kɔ ŋantorɛ agbaŋkɛ, ŋac-loku a ŋakɔ ŋagbal aŋka tekiriŋ ta abil.

³¹Kɔ Pol oloku wəbɛ wəsɔdar kɔ asɔdar, «Kɔ afum akaŋɛ ŋantɔyi debil-ɛ, nəfɔtam kəyi doru.»

³²Kɔ asɔdar ŋaŋcopu bənda ya agbaŋkɛ, kɔ ŋasak ŋi kɔ ŋɛntɛmpɛnɛ.

³³Ŋayi kəkar dec kəsɔk, kɔ Pol ewenɛ fəp fosu kəkɔ-di yeri, k’oloku: «Mɔkɔ tataka ta wəco kɔ maŋkəlɛ ntɛ nəyi kəkar, ta nəndi yeri mɔ.

³⁴Intola nu oŋ kədi yeri, bawo pəmar nədi yi ntɛ tɔŋsɔŋɛ nəyacnɛ mɔ. Ali wəkin nu dacɔ, kəfon kɔn da dəromp kəfɔ-sɔlər kɔ!»

³⁵Ntɛ Pol elip kəloku tatɔkɔ mɔ, k’ɛlɛk kəcom k’eyek-yekəs Kanu fɔr ya afum fəp kiriŋ, k’entepi ki, k’ɛyɛfɛ ki kəsɔm.

³⁶Kɔ fəp fəŋcəp bəkəc kɔ ŋayɛfɛ kəsɔm cəcom.

³⁷Sənayi afum masar mɛrəŋ wəco camət-mɛrəŋ kɔ camət-tin (276) akɔ ŋanayi abil ŋaŋɔkɔ disrɛ mɔ.

³⁸Ntɛ fəp fənɛmbərɛ mɔ, kɔ ŋaŋgbal malɔ mɛləpəs dəkəba ntɛ tɔŋsɔŋɛ abil ŋɛbɛrɛnɛ kəfoy mɔ.

³⁹Ntɛ dec dɔsɔk mɔ, abəc a debil ŋananɛpəl fɛ antɔf, mba ŋananəŋk kɛrɛrɛ, kɔ ŋaŋcɛm-cɛmnɛ kəcɔŋəs abil haŋ ŋabəp ki.

⁴⁰Kɔ ŋasikəli aŋka kɔ yontor dəkəba, kɔ ŋasikəlɛnɛ sɔ bənda ya yas nyɛ aŋc-gbɛkɛ abil mɔ. Kɔ ŋayekti abɛla abil dəkəro, kɔ afef ŋɛlɛk ŋa, kɔ ŋɔŋcɔŋəs abil kəca ka dəkɛrɛrɛ.

⁴¹Mba kɔ ŋaŋkɔ ŋapət kɛrɛrɛ acir mɛrəŋ dacɔ, kɔ kəro ka abil kəmətnɛ dɛsəŋc, ŋɛntam fɛ sɔ kəcɔŋnɛ kiriŋ. Kɔ yam yɔpɔŋ yender yosut abil ŋaŋan kɔ ŋɛləsər ŋi tadarəŋ.

⁴²Kɔ asɔdar ŋaŋcɛm-cɛmnɛ kədif ka kɛlmani-e, ta wəlɔma pəŋɛrəŋ pəyɛksər ŋa.

⁴³Mba wəbɛ wəsɔdar nwɛ ɛnacɛm-cɛmnɛ kəmar Pol ta efi dəkəba mɔ, ɛyaməsər asɔdar kəyɔ ka tɛfaŋ taŋan, k’oloku akɔ ŋanacərɛ kəŋɛrəŋ mɔ ŋanuŋkɛnɛ kətor dəkəba ŋaŋɛrəŋ ntɛ tɔŋsɔŋɛ ŋapɛ kare mɔ.