Yɛbəc 26:5-16

⁵Ŋaŋcər’ em kəyɛfɛ ntɛ pənawon mɔ, ŋantam sɔ kəboŋc ti, bawo fɔr yaŋan yati ŋanatəŋnɛ mes kɔ mɔyɔ ma doru dem fəp, a cəFarisi c’ inayi, kəgba ka afum akɔ ŋananaŋkanɛ kəyeŋk mes dinɛ dosu mɔ.

⁶Mɔkɔ ayi kəkit’ im, bawo iŋgbɛkər amera temer ntɛ Kanu kənasɔŋ atem asu mɔ.

⁷Cusuŋka cosu ncɛ wəco kɔ mɛrəŋ cəŋsali tɛm fəp, daŋ kɔ pibi, ŋayɔ amera kəsɔtɔ ka kəlɛkɛ temer kaŋkɔ. Wəbɛ, teta kəgbɛkər amera kaŋkɔ kɔ aSuyif ŋamboŋc em mes.

⁸Teta ake tɔ nəntɔfaŋɛ kəlaŋ a Kanu kəntam kəyekti fum defi disrɛ-ɛ?

⁹Ina wəkawɛ yati, inacɛm-cɛmnɛ kəsiməs kɔ tewe ta Yesu wəNasarɛt səpɔ fəp.

¹⁰It’ ɛnayɔ Yerusalɛm, ina wəkawɛ yati inabɛr afum acempi alarəm dəbili kətam disrɛ nkɛ abɛ a aloŋnɛ ŋanasɔŋ im mɔ. Ntɛ ŋaŋc-loku kədif kəŋan mɔ, ina sɔ iŋc-wosɛ ti.

¹¹Iŋc-kɔ dəwɔlɔ wa dəkətola Kanu da aSuyif fəp, ic-tɔrəs alaŋ, iŋc-gbəc ŋa kəlɔməs tewe ta Yesu. Pəc-tɛl’ em nnɔ ŋayi mɔ, iŋc-bɛləs ŋa haŋ sədare səcuru.»

¹²«It’ ɛnasɔŋɛ dɔsɔk ndɛ indekɔ dare da Damas mɔ, kətam kɔ kəsom ka abɛ a aloŋnɛ apɔŋ.

¹³Daŋ dɛc-faŋ kəbəp, Wəbɛ Akripa, k’inəŋk dəndo dɔpɔ pəwaŋkəra mpɛ pɛnakɛl im kɔ afum akɔ sənasol mɔ. Pəmot mpɛ pənayɛfɛ dəkɔm mɔ, poc-mot pɛtas dec.

¹⁴Kɔ səntɛmpɛnɛ fəp fosu dəntɔf, k’ine dim doc-lok’ im cəArame: ‹Sol, Sol, ta ake tɔ məntɔrəs em-ɛ? Pəŋcuc’ am kəbər tɛfaŋ ta wəbɛ kam.›

¹⁵K’iyif: ‹Wəbɛ, an’ ɔfɔ-ɛ?› K’oluks’ em: ‹In’ ɔfɔ Yesu, nwɛ məna məyi kətɔrəs mɔ.

¹⁶Mba məyɛfɛ məcəmɛ wɛcək wam kəroŋ. Məcərɛ tes ntɛ tɔsɔŋ’ em kəwurər əm mɔ: Iyɛk-yɛk əm kəyɔnɛ ka wəbəc kem, məyɔnɛ sɔ wətəŋnɛ mes mɔkɔ mənəŋk nnɔ iyi mɔ kɔ mɔkɔ indesɔ-wurər əm mɔ.