Yɛbəc 23:7-35

⁷Ntɛ Pol oloku moloku mamɔkɔ mɔ, kɔ kəgbɛkəlɛnɛ kəyi aFarisi kɔ aSadisi dacɔ, kɔ kəgbɛyɛnɛ kəyi.

⁸Kɔ aSadisi ŋaloku a kəyɛfɛ defi kəyi fɛ, mɛlɛkɛ meyi fɛ, yɔŋk kɔ arkifin yeyi fɛ. AFarisi kəca kəŋan, ŋanalaŋ a mamɔkɔ fəp meyi doru.

⁹Kɔ sim səmpɛ haŋ, kɔ atəksɛ sariyɛ kəca ka aFarisi ŋayɛfɛ kɔ ŋambupərɛ pəpɔŋ, ŋac-loku: «Sənəŋk fɛ ntɛ o ntɛ tɛlɛc nnɔ fum wəkawɛ eyi mɔ! Aŋcərɛ fɛ: Tɔlɔma ŋɔŋk, kɔ pəyɔnɛ fɛ ti-ɛ, mɛlɛkɛ molok-lokər kɔ.»

¹⁰Ntɛ kəgbɛkəlɛnɛ kəŋc-cɔŋnɛ oŋ kəcɔŋnɛ dəm kiriŋ mɔ, kɔ wəbɛ wəsɔdar wəpɔŋ enesɛ a ta ŋawatəri-watəri Pol, k’oloku asɔdar a ŋator ŋakɔ ŋalɛk Pol ŋaluksɛ kɔ nde asɔdar ŋandirɛ mɔ.

¹¹Dɔckɔsɔk pibi kɔ Wəbɛ Yesu ender Pol kənəŋk disrɛ, k’oloku: «Məbaŋsɛ! Tɔkɔ mənayɔn’ em sede fɔr ya aboc kiti nde Yerusalɛm mɔ, mɛnɛ məkɔ sɔ məyɔn’ em si Rom.»

¹²Ntɛ dec dɔsɔk mɔ, k’aSuyif alɔma ŋasek kədif Pol, kɔ ŋantəŋnɛ kəsɔŋɛnɛ temer kətɔ-di yeri, kətɔ-mun haŋ ŋac-lip ti.

¹³Afum aŋɛ ŋanasek kədif Pol kaŋkɔ mɔ, ŋaŋc-kɔ haŋ ŋacepər afum wəco maŋkəlɛ.

¹⁴Kɔ ŋaŋkɔ ŋabəp aloŋnɛ apɔŋ kɔ abeki a dɔtɔf kəkɔ-loku ŋa: «Səsɔŋɛnɛ temer kətɔ-di peri ta səntalip kədif Pol-ɛ.

¹⁵Nəna oŋ ndɛkəl kəbəp ka aboc kiti aSuyif, nəkɔ nətola wəbɛ wəsɔdar pəkɛrɛ nu Pol pəmɔ ntɛ nəŋfaŋ kəmɔmən tetɔn bel-bel mɔ. Səna səŋcəmɛ səc-kar kədif kɔn ta ɛntabəp un-ɛ.»

¹⁶Ntɛ wan ka wəkirɛ ka Pol ene pac-loku toloku ta kəcəpɛ kɔ towul pɛdifɛ pɔn mɔ, k’ɔŋkɔ nde asɔdar ŋandirɛ mɔ, k’ɛmbɛrɛ k’oloku ti Pol.

¹⁷Kɔ Pol ewe wəsɔdar wəpɔŋ wəlɔma k’oloku kɔ: «Məsolɛ wətɛmp nwɛ məkenɛ kɔ wəbɛ wəsɔdar wəRom, bawo ɛfaŋ kəsɔŋɛ kɔ kəcərɛ toloku tɔlɔma.»

¹⁸Kɔ wəsɔdar wəkakɔ ɛlɛk kɔ, kɔ ŋaŋkɔ ndena wəbɛ wəsɔdar wəRom. K’oloku kɔ: «Kelmani Pol ew’ em k’olok’ im a ikɛr’ am wətɛmp wəkawɛ, a ɛfaŋ kəsɔŋ’ am kəcərɛ toloku tɔlɔm.»

¹⁹Kɔ wəbɛ wəsɔdar wəRom osumpər kɔ kəca kɔ ŋawurnɛ kəsək. K’eyif kɔ: «Ake toloku tɔ məyɔ ntɛ məfaŋ kəlok’ im mɔ-ɛ?»

²⁰Kɔ wətɛmp nwɛ oloku: «ASuyif alɔma ŋantəŋnɛ a ŋawer əm alna Pol mətorɛnɛ ŋa kɔ ndena aboc kiti aSuyif, pəmɔ ntɛ ŋaŋfaŋ kəyifət kɔ ŋamɔmən tetɔn bel-bel mɔ.

²¹Mba məsɛp ta ŋatam əm dəmoloku de! Bawo afum wəco maŋkəlɛ kɔ tɔlɔm ŋa dacɔ ŋayi kəcəpɛ Pol towul pɛdifɛ pɔn. Ŋasɔŋɛnɛ temer kətɔ-di yeri, kətɔ-mun ta ŋantanim kɔ-ɛ. Tɛm tantɛ ŋalip kəlompəsnɛ. Kəwosɛ kam gbəcərəm kɔ ŋayi kəkar.»

²²Kɔ wəbɛ wəsɔdar wəRom ɛmɛŋkəs wətɛmp nwɛ a ta pəlɔmər sɔ nwɛ o nwɛ toloku tatɔkɔ oloku kɔ mɔ, k’ɛsak kɔ, k’ɔŋkɔ.

²³Kɔ wəbɛ wəsɔdar wəRom ewe asɔdar ɔn apɔŋ mɛrəŋ, k’oloku ŋa: «Nəlɛk asɔdar masar mɛrəŋ (200), ayɛksɛnɛ fəlɛs wəco camət-mɛrəŋ, kɔ atɔmpər mbəŋcəran masar mɛrəŋ (200), ŋalompəsnɛ kəkɔ ka Sesari pibi-ana.

²⁴Nəlompəs sɔ fəlɛs, ntɛ tɔŋsɔŋɛ pakenɛ wəbɛ Felikəs Pol pəyi wəyeŋ mɔ.»

²⁵Kɔ wəbɛ wəsɔdar wəRom eŋcicɛ Filikəs areka nŋɛ ŋɛnaloku ntɛ mɔ:

²⁶«Ina, Kolodu Lisiyas, iŋcic’ am areka ŋaŋɛ məna wəbɛ kem Felikəs, ic-yif əm.

²⁷Wərkun wəkawɛ, aSuyif alɔma ŋalɛk kɔ ŋac-kɔ kənim. Mba alok’ im a wəkom wəRom ɔfɔ, it’ ɔsɔŋ em kəder kɔ asɔdar em kəbaŋər ŋa kɔ.

²⁸Ntɛ ifaŋ kəcərɛ tes ntɛ amboŋcɛ kɔ mɔ, k’intorɛnɛ kɔ nde aboc kiti aŋan ŋayi mɔ.

²⁹K’inəŋk, k’amboŋcɛ kɔ tes-ɛ, kəgbɛkəlɛnɛ kɔ nkɛ kəŋkotərɛnɛ sariyɛ səŋan mɔ, mba ali tes ɛləsər fɛ ntɛ pəmar padifɛ kɔ, kɔ pəyɔnɛ fɛ ti-ɛ, pabɛr kɔ dəbili mɔ.

³⁰Ntɛ alok’ im kəsek kədif ka wərkun wəkawɛ oŋ mɔ, itɔ iŋken’ am kɔ katina. K’ilokɛnɛ amboŋcɛ ɔn tes, ŋakɔ ŋabokɛnɛ tetɔn nnɔ məna məyi mɔ. Dənda ɔfɔ lɔŋtaŋ.»

³¹K’asɔdar ŋayɔ pəmɔ tatɔkɔ wəbɛ kəŋan ɛnasom ŋa mɔ. Kɔ ŋalɛk Pol kɔ ŋaŋkekərɛ kɔ pibi disrɛ haŋ Antipatiri.

³²Dɔckɔsɔk kɔ asɔdar alɔma ŋaluksərnɛ nde ŋandirɛ mɔ, kɔ ŋasak ayɛksɛnɛ fəlɛs ŋakekərɛ kɔ.

³³Ntɛ ŋambɛrɛ Sesari mɔ, kɔ ŋasɔŋ areka ŋaŋɔkɔ Felikəs wəbɛ ka dɔtɔf, kɔ ŋamentər kɔ Pol.

³⁴Ntɛ wəbɛ ka dɔtɔf elip kəkaraŋ areka nŋɛ mɔ, k’eyif Pol wəka atɔf ŋere ŋ’ɔyɔnɛ-ɛ. Ntɛ ene a wəka Silisi ɔyɔnɛ mɔ,

³⁵kɔ wəbɛ Felikəs oloku: «Indecəŋkəl əm kɔ aboŋcɛ am tes ŋandeder-ɛ.» K’osom a pacaŋər Pol nde bili bɔkɔ bɛnayi nde abaŋka ŋa wəbɛ Herodu mɔ.