Yɛbəc 21:4-25

⁴Ntɛ sənabəp di acɛpsɛ a Yesu mɔ, kɔ səyi di mata camət-mɛrəŋ. Kəcɔŋəs ka Amera ŋa Kanu disrɛ kɔ ŋaŋgbiŋər Pol a ta pəpɛ Yerusalɛm.

⁵Ntɛ kiyi kosu dəndo kənalip mɔ, kɔ səŋkɔ. Kɔ alaŋ fəp ŋaŋcəmbər su, kəyɛfɛ aran kəbəp awut haŋ kɔ səwur dare disrɛ, kɔ səŋkɔ səcəp suwu dəndo dɛgbɛp kətola Kanu.

⁶Ntɛ sənalembərnɛ ŋa mɔ, kɔ səmbɛkɛ debil, kɔ ŋa ŋalukus ndaraŋan.

⁷Kɔ səna, kələpəs kosu kəkɔt kɔ səmbɛkɛ dare da Tir kəkɔ ka dare da Pətolemay. Nde sənakɔ səyif awɛŋc asu aŋa alaŋ mɔ, kɔ səŋcepərɛnɛ di dɔsɔk din.

⁸Dɔckɔsɔk dɔ sənayɛfɛ di kəkɔ dare da Sesari. Dəndo sənabɛrɛ kəlɔ ka Filip, wəcam ka toloku tɔtɔt, nwɛ ɛnayɔnɛ wəkin ka afum camət-mɛrəŋ aŋɛ anayɛk-yɛk Yerusalɛm mɔ. Kɔ səŋcepərnɛ dəndo mata camət-mɛrəŋ.

⁹Filip ɛnayɔ awut aran maŋkəlɛ aŋɛ ŋanatɔ-cərɛ arkun mɔ, aŋɛ ŋaŋc-dəŋk moloku mmɛ Kanu kəŋc-mar ŋa kəcam mɔ.

¹⁰Ntɛ sənayi di mataka mɛlarəm mɔ, kɔ sayibɛ səlɔma səntor dare da Sesari kəyɛfɛ ka atɔf ŋa Yude, pac-we kɔ Akabus.

¹¹Ntɛ eŋc-der nnɔ səyi mɔ, k’ɛlɛk bɛlɛt ba Pol, k’oŋkotnɛ wɛcək kɔ waca. K’oloku: «Nəcəŋkəl ntɛ Amera Ŋecempi ŋa Kanu ŋoloku mɔ: Fum nwɛ ɔyɔ bɛlɛt bambɛ mɔ, tantɛ tɔ abɛ aSuyif alɔma ŋandekot kɔ Yerusalɛm, ŋabɛr kɔ atɔyɔnɛ Suyif dəwaca.»

¹²Ntɛ səne toloku tatɔkɔ kɔ afum akɔ ŋanayi su kəsək mɔ, kɔ səlɛtsɛnɛ Pol ta pəpɛ Yerusalɛm.

¹³Mba kɔ Pol oluksɛ su: «Ta ake tɔ nəmbokɛ, nəsɔŋ’ em abəkəc kəlɛcɛ-ɛ? Iwosɛ kəkot kem, iwosɛ sɔ kəfi kem Yerusalɛm teta tewe ta Wəbɛ Yesu.»

¹⁴Ntɛ anasɛp kɔ antɔ-tam Pol dəmoloku mɔ, kɔ səŋce kɔ. Kɔ səntola: «Kanu kəsɔŋɛ tɛfaŋ ta Wəbɛ teyi!

¹⁵Ntɛ səŋcepərɛnɛ mataka mamɔkɔ dare da Sesari mɔ, kɔ səlompəsnɛ, kɔ səlɛk dɔpɔ kəpɛ ka Yerusalɛm.

¹⁶Kɔ səsol kɔ acɛpsɛ a Yesu alɔma kɔ sənder kəyɛfɛ ka dare da Sesari. Kɔ ŋaŋkekərɛ su nda fum wəlɔma nwɛ pənamar səyi ndɔrɔn mɔ, pac-we kɔ Manasɔŋ. WəSipər ɛnayi, ɛnayɔnɛ wəcɛpsɛ wəka Yesu darəŋ kəyɛfɛ ntɛ pənawon mɔ.

¹⁷Kəbɛrɛ kosu Yerusalɛm, kɔ awɛŋc asu aŋa alaŋ ŋaselɛnɛ su pəbotu disrɛ.

¹⁸Dɔckɔsɔk kɔ səsol kɔ Pol, kɔ səŋkɔ ndena Sak. Kɔ abeki a kəloŋkanɛ ka alaŋ a Yerusalɛm fəp ŋambəpsɛnɛ dəndo.

¹⁹Kɔ Pol ɛfaynɛ ŋa, k’ɛyɛfɛ kəlɔmər ŋa tin tin tin mes fəp mmɛ Kanu kənamar kɔ kəyɔ aSuyif dacɔ mɔ.

²⁰Ntɛ ŋalip kəcəŋkəl Pol mɔ, kɔ ŋayɛk-yekəs Kanu. Kɔ ŋaloku Pol: «Məmɔmən, wɛŋc kosu, afum asu wul wɛlarəm ŋayɔnɛ alaŋ Yesu ŋasumpərɛnɛ sɔ sariyɛ waca mɛrəŋ.

²¹Awa aSuyif alɔma ŋacɛm-cɛmmɛ kəne a kətəksɛ kam disrɛ a məloku aSuyif aŋɛ ŋayi afum acuru dacɔ mɔ a ŋasak sariyɛ sa Musa: Ta ŋakəŋc awut, ta ŋacəmɛ mɔyɔ mokur ma aSuyif darəŋ.

²²Cəke c’ andeyɔ-ɛ? Bawo ŋaŋkɔ-ne a mənder nnɔ.

²³Awa məyɔ tɔkɔ səndelok’ əm mɔ. Səyɔ nnɔ arkun maŋkəlɛ aŋɛ ŋanasɔŋ Kanu temer mɔ.

²⁴Məlɛk ŋa, nəkɔ kəlɔ kɔpɔŋ ka Kanu, məsɔkəsnɛ kɔ ŋa. Kɔ məwosɛ-ɛ, məlɛk kəwurɛ pəsam pa kəway kəŋan ka kəloŋnɛ, ntɛ tɔŋsɔŋɛ ŋafonnɛ səbomp mɔ. Ti disrɛ fəp fəndetam kəcərɛ a mes mɔkɔ asɔŋɛ ŋa kəlaŋ tetam mɔ fəp mɔyɔnɛ fɛ kaŋce, a məna sɔ yati məleləs teta sariyɛ sa Musa.

²⁵Ntɛ tɔyɔnɛ ta atɔyɔnɛ Suyif aŋɛ ŋayɔnɛ alaŋ mɔ, sənəŋk fɔ pəntesɛ kəcicɛ ŋa reka kəbocɛ ŋa tɔŋc: A ta ŋasɔm sɛm nyɛ aloŋnɛnɛ molom mɔ, ta ŋadi mecir, ta ŋasɔm sɛm nyɛ antɔfay mera mɔ, ta ŋasumpər dalakɔ.»