Yɛbəc 20:5-28

⁵Afum akakɔ ŋanayi su kiriŋ kəkɔ, kɔ ŋaŋkɔ ŋakar su Torowas.

⁶Kɔ səna ntɛ mataka ma kəsata ka cəcom cətɔyɔ lebin meŋcepər mɔ, kɔ səlɛk abil dare da Filipi. Mata kəcamət disrɛ kɔ səmbəp ŋa dare da Torowas, nde sənacepərɛnɛ mata camət-mɛrəŋ mɔ.

⁷Tataka tɔcɔkɔ-cɔkɔ ta tataka toluksər, kɔ səloŋkanɛ kətepi ka kəcom. Pol nwɛ pənamar kəkɔ dɔckɔsɔk mɔ eyi kəlok-loku ŋa, k’ɔmbɔlsɛ moloku haŋ cɛk-cɛk.

⁸Səlamp səlarəm sənayi dəndo dukulɔ da dareŋc dadɔkɔ sənaloŋkanɛ mɔ.

⁹Wətɛmp wəlɔma pac-we kɔ Eyutik ɛnandɛ biŋkəli ba wundɛr kəroŋ tɛm tatɔkɔ Pol oŋc-lok-loku mɔ. Kɔ mere mɛŋgbəpərnɛ kɔ, k’ɛntɛmpɛnɛ kəyɛfɛ dukulɔ dakəroŋ da maas. Aŋkɔlɛk kɔ, tɛtəŋnɛ efi.

¹⁰Kɔ Pol ontor, k’ɔŋkɔ pəsipnɛ kɔ, k’ɛlɛk kɔ dəwaca, k’oloku: «Ta pəyi nu yama-yama. Eyi wəyeŋ!»

¹¹Ntɛ Pol ɛmpɛ sɔ mɔ, k’entepi kəcom kəsɔm, k’oŋcop sɔ moloku mɔn haŋ dɔsɔka. Ntɛ elip mɔ, k’ɔŋkɔ.

¹²K’aŋkɛrɛ wətɛmp wəkakɔ pəyi wəyeŋ, kɔ tɔyɔnɛ tɛcəpsɛ bəkəc tɔpɔŋ.

¹³Səna, sənanuŋkɛnɛ kəlɛk abil kəkɔ dare da Asɔs nde Pol ɛnaloku a səndekɔ-lɛk kɔ mɔ, bawo kəroru k’ɛnafaŋ kəkɔ.

¹⁴Ntɛ ɛnabəp su Asɔs mɔ, kɔ səlɛk kɔ kəkɔ ka Mitilɛn.

¹⁵Ntɛ səyɛfɛ kəcali dəkəba dəndo mɔ, kɔ səmbɛrɛ dɔckɔsɔk Kiyo. Dɔckɔsɔk damɛrəŋ kɔ səŋgbuŋɛnɛ Samɔs, tataka ta maas kɔ səmbəp Mileto.

¹⁶Pol ɛnafaŋ kəcepər dare da Efesi takəroŋ ta ɛŋcəmbərəs di-ɛ, ntɛ tɔŋsɔŋɛ ta owon sɔ Asi mɔ. Yerusalɛm ɛŋc-bɛlkər kəbəp, kɔ tɛntam kəyi-ɛ, a dɔsɔk da Pantɛkɔt dɛc-bəp.

¹⁷Tɛm ntɛ ɛnayi Mileto mɔ, k’osom dare da Efesi kəkɔ-wenɛ kɔ abeki a kəlonkanɛ ka alaŋ aka di.

¹⁸Ntɛ ŋander kəwe kɔn mɔ, kɔ Pol oloku ŋa ntɛ: «Nəŋcərɛ fəp fonu tɔkɔ isumpər nu mɔ, kəlɛk dɔsɔk dɔcɔkɔ-cɔkɔ ndɛ iŋcəmbər kəcək atɔf ŋa Asi mɔ.

¹⁹Imbəcɛ Wəbɛ kətorɛ baŋca disrɛ, ic-bok, ic-tɔrɔ, bawo aSuyif ŋaŋc-faŋ kəy’ em pəlɛc.

²⁰Tes o tes tɛntam kətesɛ nu iloku nu ti fɔr ya afum kiriŋ kəkɔ haŋ dəwɔlɔ wonu disrɛ, ali tin imɛŋkər fɛ nu.

²¹K’iŋgbiŋər sɔ aSuyif kɔ aKresi kəsəkpər bəkəc ŋakafəlɛ nnɔ Kanu kəyi mɔ, ŋagbɛkər Wəbɛ kosu Yesu kəlaŋ.

²²Ndɛkəl oŋ Amera ŋa Kanu ŋesekət’ im, Yerusalɛm iŋkɔ. Iŋcərɛ fɛ ntɛ tɔŋkɔ-bəp im di mɔ,

²³mɛnɛ Amera Ŋecempi ŋa Kanu ŋoŋlok’ im dare o dare ntɛ: A kətɔrɔ k’inder, pabɛr’ im dəbili.

²⁴Teta ina, mes ma ina darəŋ meyi, tɛfaŋ ta ina tɔyɔnɛ kəkɔtɛnɛ kəsom nkɛ asom im mɔ, mes mmɛ Wəbɛ Yesu olok’ im kəyɔ mɔ fəp m’ ifaŋ kəyɔ, ntɛ tɔyɔnɛ kəmentər sede sa toloku tɔtɔt kɔ kəmar ka Kanu mɔ.

²⁵Ndɛkəl oŋ intas, iŋcərɛ a nəfɔsɔ-nəŋk im, nəna fəp aŋɛ inacepər kəcam dɛbɛ da Kanu mɔ.

²⁶Ilip kəloku nu moloku fəp mmɛ Kanu kənasom im kəloku nu teta kəyac konu mɔ. Kɔ nəntɔyɔ oŋ tɔkɔ inatəks’ on mɔ, te mi teyi fɛ sɔ ti,

²⁷bawo iloku nu mɛfaŋ ma Kanu fəp, ali tin imɛŋkər fɛ nu.

²⁸Nəkɛmərnɛ nəna sərka kəbəp ka alaŋ aŋɛ ŋayi pəmɔ yɔcɔl nyɛ Amera Ŋecempi ŋa Kanu ŋɔsɔŋ nu kəkɛk mɔ. Nəkɛmbərnɛ kəloŋkanɛ ka alaŋ a Kanu, mecir mɔn yati mɔsɔtɔnɛ ŋa.