Yɛbəc 19:13-25

¹³Kɔ aSuyif alɔma ŋaŋkɔs-kɔs mofo mɛlarəm, kɔ ŋatubucnɛ Pol kəbɛləs ka yɔŋk yɛlɛc nnɔ acuy ŋayi mɔ, ŋac-loku: «Ilok’ əm: Məwur wəcuy wəkawɛ tewe ta Yesu wəkɔ Pol ɛŋcam mɔ.»

¹⁴Wəloŋnɛ wəpɔŋ wəka aSuyif wəlɔma ɛnayi pac-we kɔ Sefa. Awut ɔn atɛmp camət-mɛrəŋ ŋa ŋaŋc-yɔ mɔyɔ mamɔkɔ.

¹⁵Mba kɔ ŋawak kəbɛləs ŋɔŋk ŋɛlɛc-ɛ, ŋi ŋoloku ŋa: «Yesu, iŋcərɛ kɔ. K’iŋnɛpəl sɔ bel-bel fum nwɛ Pol ɔyɔnɛ mɔ, mba nəna, an’ɔ nəyɔnɛ-ɛ?»

¹⁶Kɔ fum wəkɔ ŋɔŋk ŋɛlɛc ŋɛnayi mɔ ɛŋgbəpərnɛ ŋa kəyɛfərɛnɛ, k’ɛntam ŋa fəp k’ambopər-bopər atɛmp aŋɛ, kɔ ŋayɛksɛ fəp faŋan dis fos kɔ ŋasak kəlɔ.

¹⁷ASuyif kɔ aKresi aka dare da Efesi ŋaŋcərɛ toloku tatɔkɔ, kɔ kənesɛ kəyi ŋa fəp, kɔ ŋaleləs oŋ tewe ta Wəbɛ Yesu.

¹⁸Afum alarəm aŋɛ ŋanawosɛ kəlaŋ Yesu mɔ, ŋaŋc-der ŋaloku fɔr ya afum fəp kiriŋ pəlɛc mpɛ ŋaŋc-yɔ mɔ.

¹⁹Kɔ afum akɔ ŋanayɔnɛ dure mɔ, ŋaŋc-kɛrɛ səbuk səŋan sa dure kɔ ŋaŋcɔf si fɔr ya afum fəp kiriŋ. Kəway ka səbuk sasɔkɔ kənabəp mɛŋcəmbəl ma gbeti wul wəco kəcamət (50.000).

²⁰Ti disrɛ kətam ka toloku ta Wəbɛ kəsam kɔ kəsɔtɔ fənɔntər.

²¹Ntɛ teŋcepər mɔ kɔ Pol olompəsnɛ kəkɔ dare da Yerusalɛm pəc-cepərɛnɛ tɔf ya Masedon kɔ Akaya. K’oloku: «K’iŋkɔbɛrɛ Yerusalɛm-ɛ, mɛnɛ idekɔsɔ-mɔmən Rom.»

²²Kɔ Pol osom Masedon amar ɔn mɛrəŋ Timote kɔ Erasto, mba kɔ nkɔn Pol eyi mataka mɔlɔma atɔf ŋa Asi.

²³Tɛm tatɔkɔ tɔ pəyama-yama pɔpɔŋ pɛnayi Efesi teta dɔpɔ da kəlaŋ ka Wəbɛ Yesu.

²⁴Wəgbɛc wəlɔma ɛnayi di, pac-we kɔ Demeteri, pəc-tubucnɛ kəlompəs ka wɔlɔ wa tɛrəŋka mpɛ aŋc-we Artemi mɔ. Agbɛc a wɔlɔ wa gbeti wawɔkɔ ŋaŋc-sɔtɔnɛ wi daka dɛlarəm.

²⁵Kɔ Demeteri oloŋka agbɛc kɔ akɔ ŋaŋc-dinɛ yɛbəc yayɔkɔ mɔ, k’oloku ŋa: «Arkun! Nəŋcərɛ ti bel-bel a yɛbəc yayɛ y’ andinɛ.