Yɛbəc 18:8-27

⁸Krispɔs, wəbɛ ka kəlɔ ka dəkətola wəlɔma ɛnalaŋ teta Wəbɛ Yesu kɔ aka kəlɔ kɔn disrɛ fəp. Kɔ aKɔrɛnt alarəm aŋɛ ŋaŋc-cəŋkəl mɔ ŋanayɔnɛ alaŋ, kɔ aŋgbət ŋa dəromun teta Kanu.

⁹Pibi disrɛ kɔ Wəbɛ oloku Pol kənəŋk disrɛ: «Ta mənesɛ! Məlok-loku, ta məcaŋk de,

¹⁰bawo ina iyi kɔ məna! Fum o fum ɔfɔtəp’ əm kəca kəyɔ ’m tes tɛlɛc, bawo iyɔ afum alarəm dare dandɛ disrɛ.»

¹¹Kɔ Pol eyi ŋa dacɔ teren tin kɔ yof camət-tin pəc-təksɛ ŋa toloku ta Kanu.

¹²Tɛm tatɔkɔ tɔ Rom dɛnadəs Kaliyɔŋ kəyɔnɛ ka wəbɛ nde atɔf ŋa Akaya. Kɔ aSuyif alɔma ŋantəŋnɛ kəyɛfərɛnɛ kɔ Pol, kɔ ŋaŋkekərɛ kɔ dəŋkiti.

¹³Kɔ ŋaloku: «Fum wəkawɛ, afum ŋ’ ɛfaŋ a ŋacəmɛ dɔpɔ da Kanu darəŋ, ndɛ deŋciyanɛ kɔ ndɛ sariyɛ səloku mɔ.»

¹⁴Pol ɛyɛfɛ kəkɔ-loku, mba Kaliyɔŋ oloku aSuyif: «Pəc-yɔnɛ a fum endif, kɔ pəyɔnɛ fɛ ti, tes tɛlɛc tɔpɔŋ tɔlɔma tɔyɔ-ɛ, k’iŋcəŋkəl nu, nəna aSuyif!

¹⁵Mba ntɛ pəyɔnɛ fɔ dəmoloku, dəmewe, kɔ pəyɔnɛ fɛ ti, teta sariyɛ sonu nəna a sərka sɔ nəyi kəgbɛkəlɛnɛ mɔ, nəna ŋɔ tatɔkɔ tɔmɔmən. Ina intola fɛ kəyɔnɛ wəboc kiti kaŋkɔ.»

¹⁶Kɔ Kaliyɔŋ ɛmbɛləs ŋa dəndo dəŋkiti.

¹⁷Kɔ aSuyif ŋaŋkɔ ŋantəp Sɔstɛn wəbɛ wəka kəlɔ ka dəkətola Kanu waca, kɔ ŋayɛfɛ kəsut kɔ dəndo dəŋkiti, mba Kaliyɔŋ ɛnawe fɛ ti ali daka.

¹⁸Kɔ Pol owon dare da Kɔrɛnt mataka mɔlɔma, k’ender pəlembərnɛ awɛŋc aŋa alaŋ, k’ɛlɛk abil kəkɔ atɔf ŋa Siri, nkɔn, Pirsila kɔ Akila. K’ofonnɛ domp nde dare da Seŋkəre kəmentər ka kəlip ka tes ntɛ ɛnadermɛ teta Kanu mɔ.

¹⁹Ntɛ ŋambɛrɛ dare da Efesi mɔ, kɔ Pol ɛsak Pirsila kɔ Akila. Kɔ Pol ɔŋkɔ kəlɔ ka dəkətola da aSuyif kɔ ŋaŋgbɛkəlɛnɛ kɔ ŋa.

²⁰Kɔ akakɔ ŋantola kɔ kəyi ka dəndo dare daŋan kərɛsna, mba ɛnawosɛ fɛ.

²¹K’elembərnɛ ŋa pəc-loku: «Indelukus nnɔ ndoronu kɔ Kanu kəwosɛ-ɛ.» K’ɛlɛk abil dare da Efesi,

²²k’ontor dare da Sesari nde ɛnacop mərənt mɔn mɔ. K’ɛmpɛ kərɛs Yerusalɛm kəkɔ-yif alaŋ. Ntɛ elip mɔ, k’ontor dare da Antiyɔk ŋa Siri.

²³Ntɛ tɛm tɔlɔma teŋcepər mɔ, kɔ Pol ɔŋkɔ k’eŋcepər atɔf ŋa Kalat kɔ Firiki pəc-cəpəs acɛpsɛ a Yesu bəkəc fəp.

²⁴WəSuyif wəlɔma aŋc-we Apɔlɔs, ɛnader Efesi. Dare da Alɛksandər dɔ anakom kɔ, fum wəcərɛ kəlok-loku ɛnayi, pəcərɛ sɔ kitabu bel-bel.

²⁵Dɔpɔ da Wəbɛ dɔ anatəksɛ kɔ, kɔ kəsumpər ka mes bel-bel, kaŋce k’ oŋc-lokɛ, pəc-təksɛ teta Yesu, mba mɛnɛ kəgbət dəromun ka Saŋ gbəcərəm kɔ ɛnacərɛ.

²⁶K’ɛyɛfɛ kəlok-lokɛ kəlaŋ disrɛ nde kəlɔ ka dəkətola da aSuyif. Ntɛ Pirsila kɔ Akila ŋane kɔ kəlok-loku mɔ, kɔ ŋalɛk kɔ ndaraŋan, kɔ ŋambɛrɛnɛ kɔ kətəksɛ kəcərɛ kəŋkɔ kənabut kɔ teta dɔpɔ da Kanu mɔ.

²⁷Ntɛ Apɔlɔs ɛnacɛm-cɛmnɛ kəcepər ka Akaya mɔ, kɔ awɛŋc aŋa alaŋ ŋaŋgbiŋər kɔ. Kɔ ŋaŋcicɛ acɛpsɛ a Yesu darəŋ aŋɛ ŋayi Akaya mɔ areka, ŋac-loku ŋa kəbaŋ kɔ bel-bel. Ntɛ ɛmbɛrɛ mɔ, k’entesɛ afum aka di, akɔ kəmar ka Kanu kənasɔŋɛ kəyɔnɛ alaŋ mɔ.