Yɛbəc 18:1-23

¹Ntɛ tatɔkɔ teŋcepər mɔ, kɔ Pol ɛyɛfɛ dare da Atɛn k’ɔŋkɔ Kɔrɛnt.

²K’ɔŋkɔ pəbəp di wəSuyif wəlɔma pac-we kɔ Akila, nwɛ anakom dare da Pɔnt mɔ, pətɛp kəc-der atɔf ŋa Itali kɔ wəran kɔn Pirsila, bawo wəbɛ Kəlod ɛnaloku a aSuyif fəp ŋawur Rom. Kɔ Pol ɔŋkɔ pəbəp ŋa.

³Ntɛ tɛnasurɛnɛ ŋapaŋnɛ yɛbəc yin yayi mɔ, kɔ eyi ndaraŋan, ŋac-bəc, ŋac-lompəs cəbal.

⁴Dɔsɔk da kəŋesəm fəp Pol ɛŋc-gbɛkəlɛnɛ kəlɔ ka dəkətola da aSuyif pəc-sɛp dəmoloku a aSuyif kɔ aKresi ŋawosɛ kəcəmɛ moloku mɔn darən.

⁵Ntɛ Silas kɔ Timote ŋanator Masedon mɔ, kɔ Pol ɛŋcəmɛ oŋ gbəcərəm kəcam ka toloku tɔtɔt, pəc-sɔŋɛ aSuyif kəlaŋ a Yesu ɔyɔnɛ wəbɛ nwɛ Kanu kəyɛk-yɛk mɔ.

⁶Mba ntɛ aSuyif ŋaŋc-gbɛkəl kɔ ŋac-lɔmsɛnɛ kɔ mɔ, k’oŋkoŋ-koŋər ŋa yamos yɔn teta kəyeŋkəs kəŋan səbomp, k’oloku: «Doru donu deyi nu dəwaca! Kɔ ina, isɔk ti disrɛ. Ndɛkəl oŋ, nda atɔyɔnɛ Suyif indekɔ.»

⁷Kɔ Pol ɛyɛfɛ di, k’ɔŋkɔ nda Titi Yusutu wəkor-koru Kanu wəlɔma, nwɛ kəlɔ kɔn kənasəŋkərɛnɛ kɔ kəlɔ ka dəkətola da aSuyif mɔ.

⁸Krispɔs, wəbɛ ka kəlɔ ka dəkətola wəlɔma ɛnalaŋ teta Wəbɛ Yesu kɔ aka kəlɔ kɔn disrɛ fəp. Kɔ aKɔrɛnt alarəm aŋɛ ŋaŋc-cəŋkəl mɔ ŋanayɔnɛ alaŋ, kɔ aŋgbət ŋa dəromun teta Kanu.

⁹Pibi disrɛ kɔ Wəbɛ oloku Pol kənəŋk disrɛ: «Ta mənesɛ! Məlok-loku, ta məcaŋk de,

¹⁰bawo ina iyi kɔ məna! Fum o fum ɔfɔtəp’ əm kəca kəyɔ ’m tes tɛlɛc, bawo iyɔ afum alarəm dare dandɛ disrɛ.»

¹¹Kɔ Pol eyi ŋa dacɔ teren tin kɔ yof camət-tin pəc-təksɛ ŋa toloku ta Kanu.

¹²Tɛm tatɔkɔ tɔ Rom dɛnadəs Kaliyɔŋ kəyɔnɛ ka wəbɛ nde atɔf ŋa Akaya. Kɔ aSuyif alɔma ŋantəŋnɛ kəyɛfərɛnɛ kɔ Pol, kɔ ŋaŋkekərɛ kɔ dəŋkiti.

¹³Kɔ ŋaloku: «Fum wəkawɛ, afum ŋ’ ɛfaŋ a ŋacəmɛ dɔpɔ da Kanu darəŋ, ndɛ deŋciyanɛ kɔ ndɛ sariyɛ səloku mɔ.»

¹⁴Pol ɛyɛfɛ kəkɔ-loku, mba Kaliyɔŋ oloku aSuyif: «Pəc-yɔnɛ a fum endif, kɔ pəyɔnɛ fɛ ti, tes tɛlɛc tɔpɔŋ tɔlɔma tɔyɔ-ɛ, k’iŋcəŋkəl nu, nəna aSuyif!

¹⁵Mba ntɛ pəyɔnɛ fɔ dəmoloku, dəmewe, kɔ pəyɔnɛ fɛ ti, teta sariyɛ sonu nəna a sərka sɔ nəyi kəgbɛkəlɛnɛ mɔ, nəna ŋɔ tatɔkɔ tɔmɔmən. Ina intola fɛ kəyɔnɛ wəboc kiti kaŋkɔ.»

¹⁶Kɔ Kaliyɔŋ ɛmbɛləs ŋa dəndo dəŋkiti.

¹⁷Kɔ aSuyif ŋaŋkɔ ŋantəp Sɔstɛn wəbɛ wəka kəlɔ ka dəkətola Kanu waca, kɔ ŋayɛfɛ kəsut kɔ dəndo dəŋkiti, mba Kaliyɔŋ ɛnawe fɛ ti ali daka.

¹⁸Kɔ Pol owon dare da Kɔrɛnt mataka mɔlɔma, k’ender pəlembərnɛ awɛŋc aŋa alaŋ, k’ɛlɛk abil kəkɔ atɔf ŋa Siri, nkɔn, Pirsila kɔ Akila. K’ofonnɛ domp nde dare da Seŋkəre kəmentər ka kəlip ka tes ntɛ ɛnadermɛ teta Kanu mɔ.

¹⁹Ntɛ ŋambɛrɛ dare da Efesi mɔ, kɔ Pol ɛsak Pirsila kɔ Akila. Kɔ Pol ɔŋkɔ kəlɔ ka dəkətola da aSuyif kɔ ŋaŋgbɛkəlɛnɛ kɔ ŋa.

²⁰Kɔ akakɔ ŋantola kɔ kəyi ka dəndo dare daŋan kərɛsna, mba ɛnawosɛ fɛ.

²¹K’elembərnɛ ŋa pəc-loku: «Indelukus nnɔ ndoronu kɔ Kanu kəwosɛ-ɛ.» K’ɛlɛk abil dare da Efesi,

²²k’ontor dare da Sesari nde ɛnacop mərənt mɔn mɔ. K’ɛmpɛ kərɛs Yerusalɛm kəkɔ-yif alaŋ. Ntɛ elip mɔ, k’ontor dare da Antiyɔk ŋa Siri.

²³Ntɛ tɛm tɔlɔma teŋcepər mɔ, kɔ Pol ɔŋkɔ k’eŋcepər atɔf ŋa Kalat kɔ Firiki pəc-cəpəs acɛpsɛ a Yesu bəkəc fəp.