Yɛbəc 16:2-18

²Awɛŋc aŋa alaŋ aka Listər kɔ Ikoniyon ŋanatəŋnɛ kəyɔ kɔn mes mɔtɔt.

³Kɔ Pol ɛfaŋ kəkekərɛ Timote, k’ɛlɛk kɔ k’ɛŋkəŋc teta aSuyif akɔ ŋanayi atɔf ŋaŋɔkɔ mɔ, bawo fəp fənacərɛ a Timote kas wəKresi ɛnayi.

⁴Sədare nsɛ ŋaŋc-cepər mɔ, ŋaŋc-luksɛ moloku mmɛ asom a Yesu kɔ abeki alaŋ a Yerusalɛm ŋanasom ŋa kəkɔtɛnɛ mɔ, ntɛ tɔŋsɔŋɛ alaŋ atɔyɔnɛ Suyif ŋacəmɛ mi darəŋ mɔ.

⁵Aloŋkanɛ alaŋ ŋac-cəpəs bəkəc kəlaŋ disrɛ, ŋac-bɛrɛnɛ kəla dɔsɔk o dɔsɔk.

⁶Ntɛ Amera Ŋecempi ŋa Kanu ŋɛyamsɛ Pol kɔ Silas kəloku toloku tɔtɔt ta Kanu atɔf ŋa Asi mɔ, kɔ ŋaŋcali atɔf ŋa Firiki kɔ atɔf ŋa Kalat.

⁷Ntɛ ŋalɔtərnɛ atɔf ŋa Misi mɔ, kɔ ŋasɛp kəkɔ atɔf ŋa Bitini, mba Amera ŋa Yesu ŋɛnawosɛnɛ fɛ ŋa ti.

⁸Kɔ ŋasolnɛ atɔf ŋa Misi kɔ ŋantor dare da Torowas.

⁹Pibi disrɛ kɔ Pol ɔsɔtɔ kənəŋk kəyɛfɛ ka dareŋc. Ti disrɛ, wəka Masedon pəcəmɛ kɔ kəsək pəc-lɛtsɛnɛ kɔ: «Məder Masedon, məmar su!»

¹⁰Pol ɛnadesɔtɔ kənəŋk kaŋkɔ, kɔ səntɛn katina kəkɔ ka atɔf ŋa Masedon, səc-boc ti a Kanu kəwe su kəkɔ-cam di toloku tɔtɔt ta Yesu.

¹¹Kɔ səyɛfɛ Torowas kɔ səyekti abɛla kɔ səntɛfərnɛ kəkɔ ka Samotiras, dɔckɔsɔk kɔ səmbɛrɛ Neyapoli.

¹²Kɔ səyɛfɛ dəndo, kɔ səŋkɔ Filipi, dare dɔpɔŋ da atɔf ŋa Masedon dɔlɔma ndɛ aka Rom alarəm ŋanandɛ mɔ. Kɔ sənacepərɛnɛ mataka mɔlɔma dare dadɔkɔ.

¹³Dɔsɔk da kəŋesəm kɔ səwur dare dəkusu kəŋgbɔkɔ kəsək, nde sənacɛm-cɛmnɛ kəfo nkɛ səntam kətola Kanu mɔ. Kɔ səndɛ kəlok-lokər aran aŋɛ ŋanaloŋkanɛ di mɔ.

¹⁴Wəran wəlɔma ɛnayi ŋa dacɔ pac-we kɔ Ludy, pəc-caməs cəloto ca karɛ. Pakom kɔ dare da Tiyatir. Wəyek-yekəs Kanu ɛnayi. Pəc-cəŋkəl su, kɔ Wəbɛ eŋgbiti kɔ abəkəc, ntɛ tɔŋsɔŋɛ kɔ kəc-ne bel-bel moloku mmɛ Pol oŋc-loku mɔ.

¹⁵Ntɛ anagbət kɔ dəromun teta Kanu mɔ, Ludy kɔ aka kəlɔ kɔn disrɛ mɔ, k’ewe su kəyi nde ndɔrɔn mataka mɔlɔma, pəc-tola: «Kɔ nəŋcɛm-cɛmnɛ fɔ ilaŋ Wəbɛ bel-bel-ɛ, nəder nnɔ nderem, nəyi nnɔ kɔ səna.» K’ɛlɛtsɛnɛ su kəyi di.

¹⁶Dɔsɔk dɔlɔma səc-kɔ dəkətola Kanu da aSuyif, kɔ wəyecəra wəcar wəlɔma ender pəbəp su, pəyɔ ŋɔŋk nŋɛ ŋɔŋsɔŋɛ kɔ kəloku ntɛ tender mɔ. Wəyecəra nwɛ ɔŋc-sɔtɔnɛ ti abɛ ɔn pəsam pɛlarəm teta kəloku kɔn mes mmɛ mender mɔ.

¹⁷Kɔ wəyecəra nwɛ ɛŋcɛpsɛ su darəŋ Pol kɔ səna, pəc-kulɛ-kulɛ: «Afum akaŋɛ acar a Kanu nkɛ kəyi dareŋc mɔ ŋɔ! Dɔpɔ da kəyac dɔ ŋayi kəmentər un!»

¹⁸Ntɛ wəyecəra ɔyɔ mes mamɔkɔ mata mɛlarəm mɔ, kɔ tɔlɔləs Pol dis. K’ɛŋkafəlɛ, k’oloku ŋɔŋk: «Tewe ta Yesu Krist ilok’ əm, məwur wəyecəra wəkawɛ dəris!» Gbəŋcana babɔkɔ kɔ ŋɔŋk ŋaŋɔkɔ ŋowur kɔ dəris.