Text copied!
CopyCompare
Kitabu ka Kanu - Yɛbəc - Yɛbəc 16

Yɛbəc 16:16-36

Help us?
Click on verse(s) to share them!
16Dɔsɔk dɔlɔma səc-kɔ dəkətola Kanu da aSuyif, kɔ wəyecəra wəcar wəlɔma ender pəbəp su, pəyɔ ŋɔŋk nŋɛ ŋɔŋsɔŋɛ kɔ kəloku ntɛ tender mɔ. Wəyecəra nwɛ ɔŋc-sɔtɔnɛ ti abɛ ɔn pəsam pɛlarəm teta kəloku kɔn mes mmɛ mender mɔ.
17Kɔ wəyecəra nwɛ ɛŋcɛpsɛ su darəŋ Pol kɔ səna, pəc-kulɛ-kulɛ: «Afum akaŋɛ acar a Kanu nkɛ kəyi dareŋc mɔ ŋɔ! Dɔpɔ da kəyac dɔ ŋayi kəmentər un!»
18Ntɛ wəyecəra ɔyɔ mes mamɔkɔ mata mɛlarəm mɔ, kɔ tɔlɔləs Pol dis. K’ɛŋkafəlɛ, k’oloku ŋɔŋk: «Tewe ta Yesu Krist ilok’ əm, məwur wəyecəra wəkawɛ dəris!» Gbəŋcana babɔkɔ kɔ ŋɔŋk ŋaŋɔkɔ ŋowur kɔ dəris.
19Ntɛ abɛ ɔn ŋanəŋk fɔ tɔsɔtɔnɛ taŋan pəsam tɔsɔlər ŋa mɔ, kɔ ŋasumpər Pol kɔ Silas, kɔ ŋaŋkekərɛ ŋa nde abaŋka ŋa dare dacɔ abɛ a dare fɔr kiriŋ.
20Kɔ ŋaŋkɔ ŋamentər ŋa aboc kiti, ŋac-loku: «Afum akaŋɛ pəyama-yama pɔ ŋayi kəbɛrsɛnɛ dare dosu. ASuyif ŋɔ ŋayɔnɛ,
21aŋɛ ŋayi kəcam mɔyɔ maŋan mmɛ pəmar fɛ su kəwosɛ kəyɔ ka mi, səna aŋɛ səyɔnɛ aka Rom mɔ.»
22Kɔ kənay ka afum ŋayɛfɛ kɔ ŋaŋcəmɛ ŋa dəbəkəc. Kɔ aboc kiti a dare dadɔkɔ ŋawurɛ ŋa yamos, k’asutɛ ŋa cəŋgban-gban.
23Ntɛ alip kəsut ŋa pəlarəm mɔ, kɔ ŋambɛr ŋa dəbili, kɔ abɛ ŋaloku wəbum bili a pəkɛmərnɛ ŋa bel-bel.
24Ntɛ wəbum bili ene moloku mamɔkɔ mɔ, k’ɛmbɛr ŋa nde bili mbɛ ŋantɔtam kəwur mɔ, k’oŋkotərɛnɛ ŋa wəcək məmboŋk ma tɔk.
25Cɛk-cɛk cəndebəp, Pol kɔ Silas ŋac-tola Kanu, ŋac-leŋəs meleŋ mokor-korɛ Kanu, kɔ ayi dəbili ŋaŋne sim səŋan.
26Gbəŋcana babɔkɔ kɔ antɔf ŋeyikcɛ pəpɔŋ, kɔ tɔsɔŋɛ kəlɔ ka bili tantɔf kəcekəlɛ. Kɔ cumba fəp cəŋgbitɛ, kɔ gbekce fəp yoŋkoŋɛ.
27Kɔ wəbum bili entimɛ, k’ɛnəŋk ntɛ cumba ca bili cəŋgbitɛ mɔ, k’owurɛ dakma dɔn pəc-kɔ kədifnɛ, bawo ɛnacɛm-cɛmnɛ a afum aŋɛ ambɛr dəbili mɔ ŋayɛksɛ.
28Kɔ Pol oŋkulɛ-kulɛ pəpɔŋ: «Ta məyɔnɛ pəlɛc, səyi nnɔ fəp fosu!»
29Kɔ wəbum bili ewe nɛŋc, k’ɛmbɛrɛ katəna-katəna, k’ɔŋkɔ pətɛmpɛnɛ fɔr ya Pol kɔ Silas kiriŋ, pəc-yikcɛ kənesɛ disrɛ.
30K’owurɛnɛ ŋa nde doru k’eyif ŋa: «Abɛ, cəke cɔ pəmar iyɔ ntɛ tendeyac im mɔ-ɛ?»
31Pol kɔ Silas ŋaloku kɔ: «Məlaŋ Wəbɛ Yesu, andekɔ-yac əm, məna kɔ aka kəlɔ kam disrɛ fəp.»
32Kɔ ŋaloku kɔ toloku ta Wəbɛ, kɔ afum akɔ ŋanayi nde kəlɔ kɔn mɔ fəp.
33Pibi papɔkɔ kɔ wəbum bili ɛlɛk ŋa, k’eŋkekərɛ ŋa kəkɔ-yak gbali yaŋan. Wəbum bili kɔ afum ɔn fəp ŋasɔtɔ gbəŋcana babɔkɔ kəgbət dəromun teta Kanu.
34K’ɛmpɛnɛ ŋa nde ndɔrɔn, k’ɛŋcəmbər amɛsa, kɔ ŋawoləs kɔ aka kəlɔ kɔn disrɛ pəbotu pa kəlaŋ kɔn Kanu.
35Ntɛ dec dɔsɔk mɔ, kɔ aboc kiti a dare ŋasom afum aŋan alɔma kəkɔ-loku wəbum bili: «Məsak afum akaŋɛ.»
36Kɔ wəbum bili oluksɛ moloku mamɔkɔ Pol: «Aboc kiti a dare ŋasom afum nnɔ iyi mɔ, a isak’ un. Awa nəwur nəkɔnɛ bəkəc yoforu.»

Read Yɛbəc 16Yɛbəc 16
Compare Yɛbəc 16:16-36Yɛbəc 16:16-36