Yɛbəc 15:4-32

⁴Ntɛ ŋambɛrɛ Yerusalɛm mɔ, kɔ kəloŋkanɛ ka alaŋ, asom a Yesu, kɔ abeki a kəloŋkanɛ ŋambaŋ ŋa. Ntɛ tɔ Pol kɔ Barnabas ŋalɔm tɔkɔ Kanu kənayɔ fəp kɔ ŋa mɔ.

⁵Awa kɔ aFarisi alɔma aŋɛ ŋanayɔnɛ alaŋ mɔ ŋayɛfɛ kɔ ŋaloku: «Pəmar pakəŋc atɔyɔnɛ Suyif, pagbiŋər ŋa sɔ kəleləs sariyɛ sa Musa.»

⁶Asom a Yesu kɔ abeki a alaŋ aka Yerusalɛm ŋanabəpsɛnɛ kəkɔ-mɔmən ka tes tatɔkɔ.

⁷Ntɛ kəgbɛkəlɛnɛ kəwon ŋa dacɔ mɔ, kɔ Piyɛr ɛyɛfɛ k’oloku: «Arkun, awɛŋc im aŋa, nəŋcərɛ ti: A pəwon ntɛ Kanu kənayɛk-yɛk im nəna dacɔ kəcam ka toloku tɔtɔt ta Yesu, ntɛ tɔŋsɔŋɛ atɔyɔnɛ Suyif ŋatam kəne ti kɔ kəlaŋ ti mɔ.

⁸Kanu kəŋcərɛ bəkəc ya afum, Ki yati kəmentər a kəmbaŋ atɔyɔnɛ Suyif, bawo kəsɔŋ ŋa sɔ Amera Ŋecempi pəmɔ səna.

⁹Ali kəgbɛy kəfɛt ɛŋgbɛy fɛ su kɔ atɔyɔnɛ Suyif, bawo kəlaŋ k’ ɔsɔkəsɛ ŋa bəkəc.

¹⁰Ndɛkəl oŋ, ta ake tɔ nəfaŋ kədəkətərɛ Kanu-ɛ? Ntɛ nəfaŋ kəsarsər acɛpsɛ a Yesu tes tocu ntɛ, kəyɛfɛ atem asu haŋ səna yati səntɔtam kəsarɛ mɔ.

¹¹Mba səlaŋ a andeyac su kəmar ka Wəbɛ Yesu disrɛ pəmɔ ŋa atɔyɔnɛ Suyif.»

¹²Kənay ka afum fəp ŋanacaŋk, k’aŋcəŋkəl oŋ moloku ma Barnabas kɔ Pol. Kɔ ŋalɔm mes mɛwɛy-wɛy kɔ mɛgbɛkərɛ mmɛ Kanu kənasɔŋɛ ŋa kəyɔ atɔyɔnɛ Suyif dacɔ mɔ.

¹³Ntɛ ŋalip kəloku mɔ, kɔ Sak endeŋər: «Awɛŋc im aŋa! Nəcəŋkəl im!

¹⁴Simɔŋ ɔlɔm ntɛ tɔcɔkɔ-cɔkɔ Kanu kənader kəyɛk-yɛk tɔf ya doru fəp dacɔ, afum aŋɛ ŋayɔnɛ akɔn mɔ.

¹⁵Itɔ moloku ma sayibɛ-e mosolnɛ kɔ moloku ma Simɔŋ pəmɔ ntɛ aŋcic ti mɔ:

¹⁶‹Kɔ Wəbɛ oloku: «Kɔ tantɛ teŋcepər-ɛ, indeder sɔ. Indeyekti sɔ abal ŋa Dawuda nŋɛ ŋɛnatɛmpɛnɛ mɔ, indeyekti samba sa abal ŋaŋɔkɔ, Indecəmbər ŋi sɔ ŋolomp,

¹⁷ntɛ tɔŋsɔŋɛ afum aləpəs ŋatɛn ina Wəbɛ mɔ. Ɛy, dətɔf fəp nyɛ anakornɛ tewe tem mɔ.» Wəbɛ oloku tantɛ, nwɛ ɔŋyɔ mes mmɛ

¹⁸aŋcərɛ tɛm ntɛ pənawon mɔ.›

¹⁹It’ ɔsɔŋɛ ntɛ, ina Sak, iŋwosɛ sɔ a ta patɔrəs atɔyɔnɛ Suyif aŋɛ ŋantɛfərnɛ nnɔ Kanu kəyi mɔ.

²⁰Mba pacicɛ ŋa a ŋakɛmərnɛ pətɔ-cemp mpɛ pɛyɛfɛ nnɔ kətola mɛrənka kəyi mɔ, kɔ dalakɔ, kɔ kəsɔm ka sɛm nyɛ antɔfay mɔ, ŋakɛmərnɛ sɔ kəmun mecir.

²¹Kəyɛfɛ dɛtɛmp dɔcɔkɔ-cɔkɔ, Musa ɔyɔ sədare fəp afum aŋɛ ŋaloku tetɔn mɔ, bawo aŋkaraŋ Tawureta tɔn dɔsɔk o dɔsɔk da kəŋesəm nde dəkətola Kanu da aSuyif.»

²²Asom a Yesu kɔ abeki kəbəp ka kəloŋkanɛ ka alaŋ Yesu kɔr-kɔr ŋande ŋamɔmən a pəmar payɛk-yɛk ŋa dacɔ afum alɔma akɔ pəmar a pasom Antiyɔk mɔ, kəbɛrɛnɛ ka Pol kɔ Barnabas. Ti disrɛ kɔ ŋayɛk-yɛk afum mɛrəŋ aŋɛ ŋanatɔmpər delel awɛŋc aŋa dacɔ mɔ: Yudas wəkɔ aŋc-we sɔ Barsabas mɔ, kɔ Silas.

²³Kɔ ŋasom ŋa kɔ areka nyɛ: «Awɛŋc anu, asom a Yesu kɔ abeki kɔ alaŋ ŋaŋcicɛ nu areka, nəna awɛŋc su aŋa aka Antiyɔk, aka Siri, aka Silisi aŋɛ ŋantɔyɔnɛ Suyif mɔ: Səyif un!

²⁴Səne a afum asu alɔma aŋɛ ŋawur nnɔ ndorosu mɔ, ŋantɔrəs nu kɔ ŋampempɛ nu moloku maŋan, mmɛ səntɔsom ŋa mɔ.

²⁵Ntɛ sənenɛnɛ akɔ səntəŋnɛ ti mɔ, itɔ sənəŋk fɔ pəntesɛ səyɛk-yɛk afum, səsom ŋa nde nəyi mɔ, kəbɛrɛnɛ ka Barnabas kɔ Pol, aŋɛ səmbɔtər mɔ,

²⁶afum aŋɛ ŋaŋcaməs kiyi kəŋan doru tewe ta Wəbɛ Yesu Krist mɔ.

²⁷Itɔ səsom Yudas kɔ Silas ŋakɔ ŋalok’ un ntɛ teyi areka ŋaŋɛ disrɛ mɔ.

²⁸Pənabas Amera Ŋecempi kɔ səna sɔ, a pəntesɛ fɛ a sənuŋkər nu mes mɔkɔ nəntɔtam kəsarɛ mɔ, mɛnɛ mes mɔkɔ mɛmar nu kəsumpər mɔ:

²⁹Ta nəsɔm sɛm nyɛ aloŋnɛnɛ mɛrəŋka mɔ, nəbɔlɛnɛ mecir kɔ sɛm nyɛ antɔfay mɔ, nəbɔlɛnɛ sɔ dalakɔ. Pəmar nəkɛmərnɛ mes mamɔkɔ fəp. Kanu kəsɔŋɛ a nətamnɛ.»

³⁰Ntɛ anasak asom aŋɛ mɔ, kɔ ŋawurnɛ kəkɔ Antiyɔk. Kɔ ŋaŋkɔ ŋaloŋka di alaŋ, kɔ ŋasɔŋ ŋa areka ŋaŋɔkɔ.

³¹K’aŋkaraŋ ŋi kɔ pəmbɔt ŋa, bawo areka ŋaŋɔkɔ ŋɛnacəpəs ŋa bəkəc.

³²Yudas kɔ Silas aŋɛ ŋanayɔnɛ sɔ sayibɛ-e mɔ ŋaŋc-gbiŋər awɛŋc aŋa alaŋ kɔ ŋacəpəs ŋa sɔ bəkəc dəmoloku mɛlarəm.