Yɛbəc 14:3-11

³Ti disrɛ, Pol kɔ Barnabas ŋambɔləsɛ kiyi kəŋan dəndo dare dadɔkɔ. Kɔ ŋalok-lokɛ kəgbɛkər mera yaŋan teta Wəbɛ. Kɔ Wəbɛ ɔsɔŋ ŋa fənɔntər fəyɔnɛ mes mɛwɛy-wɛy kɔ mɛgbɛkərɛ, pəc-mentər sɔ kaŋce ka mes mɔkɔ Pol kɔ Barnabas ŋaŋc-cam teta kəmar ka Wəbɛ.

⁴Kɔ kənay ka afum a dare dadɔkɔ ŋayersɛnɛ. Alɔma ŋanayinɛ aSuyif, alɔma ŋayinɛ asom a Yesu.

⁵Mba, aSuyif kɔ acikəra kəbəp ka abɛ aŋan ŋanalompəsnɛ kəkɔ-tɔrəs Pol kɔ Barnabas kəcacas kəŋan masar haŋ ŋadif ŋa.

⁶Ntɛ Pol kɔ Barnabas ŋane ti mɔ, kɔ ŋayɛksɛ kəkɔ-yacnɛ nde Listər kɔ Dɛrbɛ, sədare sa atɔf ŋa Likayoni, kɔ səkəsək sayi.

⁷Dəndo sɔ ŋaŋc-cam toloku tɔtɔt ta Yesu.

⁸Fum wəlɔma ɛnayi Listər pəyɔnɛ wəbəc, wɛcək wɔn wɛnafi. Kəyɛfɛ ntɛ aŋkom kɔ mɔ, ali ɔŋc-kɔt fɛ. Ɛnandɛ,

⁹pəc-cəŋkəl moloku ma Pol. Kɔ Pol ɛŋgbətnɛ kɔ. Ntɛ ɛnəŋk a wəbəc ɔyɔ kəlaŋ nkɛ kəntam kəyac kɔ mɔ,

¹⁰kɔ Pol olokɛ kɔ dim dɔpɔŋ: «Məyɛfɛ! Məcəmɛ wɛcək wam kəroŋ, məlomp!» Kɔ wərkun nwɛ oyoknɛ, k’ɛyɛfɛ k’ɛŋcəmɛ kəkɔt.

¹¹Kɔ kənay ka afum akakɔ ŋanəŋk ntɛ Pol ɔyɔ mɔ, kɔ afum kənay ŋampɛnɛ cəbebe ŋac-loku cəLikayoni: «Canu cəntəŋkəlɛ afum kɔ cəntor nnɔ ndorosu!»