Yɛbəc 13:5-18

⁵Ntɛ ŋambɛrɛ Salamin mɔ, kɔ ŋaŋcop kəluksɛ toloku ta Kanu nde kəlɔ ka dəkətola Kanu da aSuyif. Saŋ ɛnayi di pəc-mar ŋa.

⁶Ntɛ ŋaŋcali mokuru haŋ dare da Pafɔs mɔ, kɔ ŋambəp di fum wəwɛŋkɛ wəlɔma pəc-wenɛ sayibɛ, mba ta ɔyɔnɛ si-ɛ. WəSuyif ɛnayi, pac-we kɔ Bar-Yesu.

⁷Wəwɛŋkɛ wəkakɔ ndena Serkus Polu ɛnayi, nwɛ ɛnayɔnɛ wəkiriŋ wəka sədare sa atɔf ŋaŋɔkɔ mɔ. Nkɔn Serkus Polu wərkun wəcempi domp ɛnayi. K’ender k’ewe Barnabas kɔ Sol pəc-tɛn kənenɛ ŋa toloku ta Kanu.

⁸Elimas, itɔ tatɔkɔ «wəwɛŋkɛ» kusu kəŋan, ɛŋc-gbɛkəl moloku ma Barnabas kɔ Sol, pəc-tɛn kəkafəli kəlaŋ ka wəkiriŋ Serkus Polu.

⁹Mba Sol, nwɛ aŋc-we sɔ Pol mɔ, Amera Ŋecempi ŋeyi kɔ darəŋ, k’ɛŋgbətnɛ Elimas.

¹⁰Kɔ Sol oloku kɔ: «Məna wəkakɔ məla mowul kɔ yem mɔ, wəka amera ŋɛlɛc, wəter pəlompu fəp, məfɔsak kəkafəli-kafəli səpɔ sa Wəbɛ Kanu nsɛ səlomp mɔ ba?

¹¹Ndɛkəl kəca ka Wəbɛ kəy’ əm kəroŋ: Wətɔnəŋk məndeyɔnɛ! Tɛm tendebəp, məndeyi ta mənəŋk pəwaŋkəra pa dec-ɛ.» Gbəŋcana babɔkɔ kɔ fɔr yɔyɔ kɔ pafulu kɔ kubump kəwɛkərnɛ kɔ. K’ɛyɛfɛ kənana-nana pəc-tɛn kəca nkɛ kəŋkɔsumpər kɔ kəsolɛ mɔ.

¹²Ntɛ wəkiriŋ ka dɔtɔf ɛnəŋk ntɛ tɛnacepər mɔ, k’ɔyɔnɛ wəlaŋ. Mɛtəksɛ mmɛ ɛnanenɛ Barnabas kɔ Sol teta Wəbɛ mɔ mɛnabɔt kɔ dɛbəkəc.

¹³Ntɛ Pol kɔ asol ɔn ŋayɛfɛ dare da Pafɔs mɔ, kɔ ŋayekti abɛla kəkɔ ka Perke, nde atɔf ŋa Paŋfili. Kɔ Saŋ Mark ɛŋgbɛy ŋa, k’olukus Yerusalɛm.

¹⁴Kɔ ŋayɛfɛ Perke ŋacəmɛ dɔpɔ daŋan darəŋ haŋ Antiyɔk, atɔf ŋa Pisidi. Kɔ ŋaŋkɔ kəlɔ ka dəkətola da Kanu da aSuyif dɔsɔk da kəŋesəm, kɔ ŋandɛ.

¹⁵Ntɛ alip kəkaraŋ Tawurɛta Musa kɔ Sayibɛ-e mɔ, kɔ abɛ a kəlɔ ka dəkətola da Kanu ndɛ ŋaloku Barnabas kɔ Pol: «Awɛŋc su aŋa, kɔ nəyɔ toloku tecəpəsɛ abəkəc ntɛ nəŋfaŋ kəloku afum mɔ, nəloku ti.»

¹⁶Kɔ Pol ɛyɛfɛ, k’ondot kəca, k’oloku: «Arkun a Yisrayel, kɔ nəna aləpəs aŋɛ nəŋnesɛ Kanu mɔ, nəcəŋkəl!

¹⁷Kanu ka afum akaŋɛ, Kanu ka Yisrayel, kənayɛk-yɛk atem asu, kɔ kəsɔŋɛ ŋa kəla tɛm ntɛ ŋanayi decikəra Misira mɔ, kɔ Kanu kin kaŋkɔ kəwurɛnɛ ŋa atɔf ŋaŋɔkɔ fənɔntər fa kəca kɔn.

¹⁸Kɔ kəlɛkɛ ŋa mes mɛlɛc maŋan nde dətɛgbɛrɛ meren wəco maŋkəlɛ (40).